Hövzə Xəbər Agentliyinin verdiyi məlumata görə, çərşənbə axşamı 25 avqust 2026-cı il (12 rəbiül-əvvəl 1448-ci il) tarixinə təsadüf edən gündə Nigeriyanın müxtəlif şəhər və bölgələrində İslam Peyğəmbərinin (s) mövludu münasibətilə genişmiqyaslı yürüş mərasimləri keçirilib.
Nigeriyanın müxtəlif şəhərlərində hər il təşkil olunan bu mərasimlər bu il də kişilər, qadınlar, uşaqlar, gənclər və yaşlılar olmaqla, cəmiyyətin müxtəlif təbəqələrinin geniş iştirakı ilə keçirilib. Mərasim iştirakçıları ağ və ətirli geyimlərdə küçələrdə nizamlı sıralar şəklində hərəkət ediblər.
Rəhmət Peyğəmbərinin (s) sevənləri sırasında Şeyx İbrahim Yəqub Zəkzakinin rəhbərlik etdiyi Nigeriya İslam Hərəkatının tərəfdarları da geniş şəkildə iştirak ediblər. Onlar mərasimdə yüksək nizam-intizam və həmrəylik nümayiş etdirərək İmam Xomeyninin (r), Şəhid Ayətullah Seyid Əli Xameneinin (r), Şəhid Seyid Həsən Nəsrullahın, İslam İnqilabının Ali Məqamlı Rəhbəri həzrət Ayətullah Seyid Müctəba Xameneinin, Şeyx İbrahim Zəkzakinin və müqavimətin digər tanınmış rəhbərlərinin bayraq və şəkillərini özləri ilə aparıblar.
İştirakçılar yürüş boyunca İslam Peyğəmbərinə (s) və onun pak Əhli-beytinə (ə) məhəbbət və ehtiramlarını ifadə etməklə yanaşı, İslam Peyğəmbərinin (s) və Əhli-beytin (ə) mədhi və tərifinə həsr olunmuş nəğmələr səsləndirib, şeirlər söyləyiblər.
Həmçinin mərasim zamanı əhaliyə və tamaşaçılara müxtəlif şirniyyatlar və hazırlanmış yeməklər paylanıb, şəhərlərdə bayram və sevinc ab-havası hökm sürüb.
Qeyd edək ki, bu mərasim Nigeriyada İslam Peyğəmbərinin (s) mövludu münasibətilə keçirilən yürüşlərin ilk mərhələsi hesab olunur. Yürüşlərin növbəti mərhələsinin isə 30 avqust 2026-cı il (17 rəbiül-əvvəl) tarixində Nigeriyanın müxtəlif şəhər və bölgələrində keçirilməsi nəzərdə tutulur.
Rəyiniz