Hövzə Xəbər Agentliyinin tərcümə qrupunun verdiyi məlumata görə, Höccətül-İslam vəl-müslimin Seyid Sacid Əli Nəqəvi düşmənin atəşkəs şərtlərini qəbul etməsinə münasibət bildirərək vurğulayıb ki, bu gün İran şərəf və vüqarla dayanır, ABŞ və İsrail isə geri çəkilməyə məcbur olmuşdur.
Höccətül-İslam vəl-müslimin Seyid Sacid Əli Nəqəvinin yayımladığı bəyanatda qeyd edilir: İran İslam Respublikası öz tarixi fədakarlıqları hesabına azadlığını, müstəqilliyini və mədəni kimliyini qoruyub saxlamış və İslam dünyasının qürur mənbəyinə çevrilmişdir. Eyni zamanda, Pakistanın diplomatiya sahəsindəki fəal və təsirli rolu da yüksək qiymətləndirilmişdir.
O bildirib ki, 15 günlük atəşkəsin elanından və İranın on maddəlik şərtlərinin qəbulundan artıq qırx gün ötür. Bu müddət ərzində İslam İnqilabının şəhid rəhbəri həzrət Ayətullah Seyid Əli Xameneinin (Allah ona rəhmət eləsin) pak qanı, həzrət Ayətullah Seyid Müctəba Xameneinin (Allah onu qorusun) müdrik rəhbərliyi və İran xalqının böyük fədakarlıqları nəticəsində ölkə şərəflə dayanmış, düşmən isə geri çəkilməyə məcbur olmuşdur. O vurğulayıb ki, müdrik və uzaqgörən xalqlar ən böyük qurbanları verməyə hazırdır, lakin öz izzətini, azadlığını, müstəqilliyini, hüquq və resurslarını heç vaxt güzəştə verməzlər. Böyük İran xalqı da məhz bu yanaşma ilə yalnız öz dəyərlərini qorumaqla kifayətlənməmiş, eyni zamanda İslam dünyasının nüfuzunu artıraraq regionda sülh, sabitlik və əməkdaşlıq üçün yeni perspektivlər yaratmışdır.
Pakistan Şiə Alimlər Şurasının sədri qeyd edib ki, Pakistanın fəal diplomatiyası regional sülhün təmin olunması üçün bütün tərəflərlə davamlı və geniş əlaqələr qurması, həmçinin məsuliyyətli və sülhpərvər nüvə dövləti kimi fəaliyyət göstərməsi yüksək qiymətləndirilməlidir. O əlavə edib ki, bu amillər Pakistanın həm İslam dünyasında, həm də qlobal miqyasda mövqeyini daha da gücləndirmişdir.
Sonda bu görkəmli din alimi xəbərdarlıq edib ki, imperializm və sionizm əldə olunmuş nailiyyətləri zəiflətmək üçün yeni təxribatlara əl ata bilər və bu proses diqqətlə izlənilməlidir.
O, əldə olunan uğur münasibətilə İran və Pakistan xalqlarını təbrik etmiş, onlara xeyir və müvəffəqiyyət arzulamışdır.
Rəyiniz