Hövzə Xəbər Agentliyinin beynəlxalq bürosu Şeyx Zəkzakinin ofisindən verilən məlumata istinadən xəbər verir ki, o, mərasimdə etdiyi çıxışında şəhid Ayətullah Seyid Əli Xamenei ilə Kərbəla hadisəsi arasında bəzi oxşarlıqlara diqqət çəkərək bildirib: Şəhid Ayətullah Seyid Əli Xameneinin şəhadəti İmam Hüseynin (ə) Kərbəlada İslam ümmətinə, o cümlədən bütün bəşəriyyətə aşkar etdiyi həqiqətlərdən bir qismini yenidən üzə çıxarmışdır.
O vurğulayıb ki, İmam Hüseyn (ə) Kərbəlada canını fəda etməklə haqq və batil arasında olan fərqi qəti şəkildə aydınlaşdırmış, bu hadisə isə ədalətin harada dayandığını və zülm cəbhəsində kimlərin yer aldığını tam aydın şəkildə göstərmişdir.
Nigeriya İslam Hərəkatının rəhbəri Şeyx İbrahim Zəkzaki qeyd edib ki, Kərbəla hadisəsində İmam Hüseyn (ə), onun səhabələri və ailəsi mühasirəyə alındıqdan sonra düşmənlər onları səssiz şəkildə şəhid etməyə çalışmış, lakin qısa müddət sonra həqiqətlər üzə çıxmış və həmin cinayəti törədənlər ifşa olunmuşdur.
O əlavə edib ki, şəhid Ayətullah Seyid Əli Xamenei də şəhadət təhlükəsindən xəbərdar olmasına baxmayaraq, öz yolunda sabitqədəm qalmış və mövqelərindən geri çəkilməmişdir.
Şeyx Zəkzaki 1980-ci ildə şəhid Ayətullah Seyid Əli Xameneiyə qarşı həyata keçirilmiş sui-qəsdi də xatırladaraq bildirib ki, həmin hadisə nəticəsində onun sağ əli ciddi şəkildə zədələnmiş və ömrünün sonunadək tam funksionallığını bərpa edə bilməmişdir, lakin buna baxmayaraq o, illərlə fəaliyyətini və mübarizəsini davam etdirmişdir.
Şeyx Zəkzaki vurğulayıb ki, onun yanında olan yoldaşları da qarşıda onları gözləyən təhlükələrdən xəbərdar idilər, lakin necə ki, İmam Hüseynin (ə) səhabələri o həzrətin yanında möhkəm dayandılar, onlar da öz rəhbərlərinin yanında qalmağı seçdilər.
O əlavə edib ki, düşmənlər rəhbər və yüksək rütbəli komandirlərin sui-qəsdlə aradan götürülməsi ilə müqavimət hərəkatının sona çatacağını zənn edirdilər, lakin sonrakı hadisələr bu təsəvvürün tamamilə yanlış olduğunu ortaya qoydu.
Nigeriya İslam Hərəkatının rəhbəri çıxışının digər hissəsində mülki şəxslərə qarşı həyata keçirilən hücumlara toxunaraq bildirib ki, bu hücumlar zamanı hətta uşaqlar və məktəb şagirdləri də hədəfə alınıb ki, bu da əsas məqsədin dinc əhali olduğunu göstərir.
O həmçinin bəzi ABŞ rəsmilərinin İrana qarşı hədələrinə və açıqlamalarına işarə edərək bildirib ki, bu bəyanat və addımlar onların İslam dünyasına qarşı düşmənçiliyinin mahiyyətini açıq şəkildə nümayiş etdirir.
Şeyx Zəkzaki qeyd edib ki, bu proseslər bir çox həqiqətləri ictimai rəyə açıq şəkildə göstərmiş və əsas düşmənçiliyin İslam İnqilabına və müsəlman ölkələrinin müstəqilliyinə qarşı yönəldiyini ortaya çıxarmışdır.
O, eyni zamanda İran İslam Respublikasının təzyiqlər qarşısında göstərdiyi müqaviməti yüksək qiymətləndirərək bildirib ki, İran təkcə öz milli maraqları üçün deyil, ədalət və azadlıq axtarışında olan bütün xalqlar üçün ilham mənbəyidir.
Şeyx Zəkzaki çıxışının sonunda vurğulayıb: Biz öz əhdimizə sadiq qalacağıq və şəhidlərin uğrunda can verdiyi yolu davam etdirəcəyik.
Mərasimin sonunda Şeyx Zəkzaki cümə gecələrində oxunan “Kumeyl duası” və digər duaları oxuyaraq, şəhid Ayətullah Seyid Əli Xamenei və digər şəhidlər üçün rəhmət diləmiş, həmçinin İslam əsgərlərinin qorunması üçün dua etmişdir.
Rəyiniz