Hövzə Xəbər Agentliyinin verdiyi məlumata görə, İslam İnqilabının böyük rəhbəri həzrət İmam Xomeyninin (r) anım mərasimi çərşənbə günü axşam saatlarında, İslam İnqilabının Ali Məqamlı Rəhbərinin ofisinin təşkilatçılığı ilə, müxtəlif təbəqələrdən olan insanların və məsul şəxslərin iştirakı ilə həzrət Məsumənin (s.ə) müqəddəs hərəminin ərazisində keçirilib.
Mərasimdə çıxış edən Ayətullah Möhsün Əraki Qədir-Xum hadisəsinə toxunaraq bildirib ki, Qədirin böyük mesajı yalnız tarixi bir hadisə deyil. Əksinə, Peyğəmbəri-Əkrəmin (s) buyurduğu: «مَنْ کُنْتُ مَوْلَاهُ فَهَذَا عَلِیٌّ مَوْلَاهُ اللَّهُمَّ وَالِ مَنْ وَالاهُ وَ عَادِ مَنْ عَادَاهُ وَ انْصُرْ مَنْ نَصَرَهُ وَ اخْذُلْ مَنْ خَذَلَهُ»
«Mən kimin mövlasıyamsa, Əli də onun mövlasıdır. İlahi! Onu sevəni sev, ona düşmən olanla düşmən ol, ona yardım edənə yardım et, onu tək qoyanı tək qoy»
kəlamında dinin həqiqətinin, İslam cəmiyyətinin kimliyinin və bəşəriyyətin gələcək yolunun mühüm hissəsi bəyan edilmişdir.
Əhli-beyt (ə) məktəbinin baxışında İslam cəmiyyətinin aydın kimliyi
Qum Elmi Hövzəsinin Müəllimlər Birliyinin üzvü əlavə edib ki, Əhli-beyt (ə) məktəbinin düşüncə sistemində İslam cəmiyyəti aydın və dəqiq müəyyən edilmiş bir kimliyə malikdir. Bəşər tarixinin hərəkəti də ilahi ədalətə, Allaha bəndəliyə və salehlərin hakimiyyətinə əsaslanan bir cəmiyyətin qurulmasına doğru istiqamətlənmişdir.
Ekspertlər Məclisinin Rəyasət Heyətinin üzvü vurğulayıb ki, şiə təfəkkürünə görə insan cəmiyyətinin başlanğıcı, inkişaf yolu və son aqibəti, eləcə də bu prosesdə ilahi rəhbərlərin rolu aydın və planlı şəkildə izah olunmuşdur. Bu anlayış şiə məktəbinin ən mühüm elmi və mənəvi sərvətlərindən biri hesab olunur.
Ali Hövzələr Şurasının üzvü sözlərinə davam edərək vurğulayıb ki, «علی مع الحق و الحق مع علی» «Əli haqq ilədir və haqq da Əli ilədir» məzmunlu hədis, eləcə də Qurani-Kərimlə vilayət arasındakı ayrılmaz bağlılıq İslamın ən dərin təlimlərindəndir və müsəlmanların fərdi və ictimai həyatının müxtəlif tərəflərini izah edir.
İran xalqının qlobal təzyiqlər qarşısındakı müqavimətinə yüksək qiymət
Ayətullah Əraki İran xalqının dünya güclərinin təhdid və təzyiqləri qarşısında nümayiş etdirdiyi möhkəm iradəyə toxunaraq bildirib ki, bu müqavimət həqiqətən təqdirəlayiqdir. Bu gün dünyanın bir çox yerində insanlar belə bir sual verirlər: İran xalqını ən böyük hegemon qüvvələrin qarşısında mətanətlə dayanmağa, ən ağır şəraitlərdə belə birlik və möhkəmliyini qorumağa vadar edən amil nədir?
Komandanların şəhadəti milli birliyi gücləndirib, müqavimət mədəniyyətini genişləndirib
Məsləhətin Müəyyənləşdirilməsi Şurası üzvü İran xalqının və şiə cəmiyyətlərinin tarixi təcrübələrinə işarə edərək qeyd edib ki, İran xalqı müxtəlif tarixi mərhələlərdə sübut edib ki, komandanların, elmi və ictimai elitanın, görkəmli şəxsiyyətlərin şəhadəti milli iradənin zəifləməsinə, geri çəkilməsinə və ya dağılmasına səbəb olmur. Əksinə, bu hadisələr müqavimət ruhiyyəsinin güclənməsinə, ictimai həmrəyliyin artmasına və təhdidlər qarşısında milli iradənin daha da möhkəmlənməsinə şərait yaradır.
İran xalqının müqavimətinin kökü vilayət mədəniyyəti və Aşura məktəbindədir
O bildirib ki, bu xüsusiyyət vilayət mədəniyyətindən və Aşura məktəbinin təlimlərindən qaynaqlanır. İslam tarixi bu həqiqətin çoxsaylı nümunələrini özündə ehtiva edir. Bunun ən parlaq nümunəsi həzrət İmam Hüseynin (ə) qiyamıdır. Peyğəmbər (s) ailəsinə və onun səhabələrinə qarşı bütün çətinliklərə, müsibətlərə və təzyiqlərə baxmayaraq, bu hərəkat dayanmadı, əksinə İslam tarixində qalıcı və təsirli bir cərəyanın formalaşmasına səbəb oldu.
Məsləhətin Müəyyənləşdirilməsi Şurasının üzvü vurğulayıb ki, Aşura qiyamı zaman keçdikcə azadlıqsevər xalqlar və cəmiyyətlər üçün əbədi bir nümunəyə çevrilmiş, müqavimət, fədakarlıq və dözümlülük mədəniyyətini tarix boyu yaşatmışdır.
Şiə cəmiyyətinin zülm və haqsızlığa qarşı tarixi müqaviməti
Ekspertlər Məclisinin sədr müavini şiəliyin tarixi keçmişinə toxunaraq bildirib ki, şiə cəmiyyəti əsrlər boyu müxtəlif təzyiqlərə, zülmlərə və istibdadçı hakimiyyətlərə qarşı müqavimət göstərmişdir. Bu müqavimət yalnız müasir dövrlə məhdudlaşmır, əksinə, şiələrin dərin dini, etiqadi və mədəni dəyərlərinə söykənən uzun bir tarixi ənənəyə malikdir.
Elmi Hövzələrin Ali Şurasının üzvü əlavə edib ki, bu dəyərli irs ilk növbədə Əmirəl-möminin həzrət Əli (ə) tərəfindən qorunub saxlanılmış, daha sonra isə İmam Həsən Müctəba (ə) onun mühafizəsi və davam etdirilməsi istiqamətində mühüm rol oynamışdır. Bununla belə, Kərbəla hadisəsi və İmam Hüseynin (ə) qiyamı İslam və şiəlik tarixində dönüş nöqtəsi hesab olunur. Məhz həmin hadisə şiə düşüncə və etiqad məktəbinin geniş, dinamik, müqavimətli və tarixə təsir göstərən bir ictimai qüvvəyə çevrilməsinə zəmin yaratmışdır.
Şiə məzhəbinin davamlılığı – alimlər və sosioloqlar üçün araşdırma mövzusu
Ayətullah Əraki şiə cəmiyyətinin davamlılığının elmi şəkildə araşdırılmasının vacibliyini vurğulayaraq deyib: Şiə məktəbinin əsrlər boyu yaşamasının və öz varlığını qorumasının sirri tarixçilər, mütəfəkkirlər, tədqiqatçılar və sosioloqlar üçün mühüm araşdırma mövzusudur. Çünki şiə cəmiyyəti on dörd əsrdən artıq müddətdə öz dini, mədəni və ictimai kimliyini qoruyub saxlamağa nail olmuş, eyni zamanda canlılığını və təsir gücünü itirməmişdir.
O bildirib ki, bu tarixi davamlılıq müxtəlif dövrlərdə şiələrin çoxsaylı təzyiqlər, məhdudiyyətlər və təhdidlərlə üzləşməsinə baxmayaraq baş vermişdir. Buna rəğmən onlar öz kimliklərini qoruyaraq inkişaf və kamillik yolunu davam etdirmişlər.
Qədir-Xum – şiə cəmiyyətinin vilayətlə dərin bağlılığının mənbəyi
Ekspertlər Məclisinin sədr müavini çıxışının davamında vurğulayıb ki, şiə cəmiyyətinin qüdrəti, sabitliyi və tarix boyu davam etməsinin əsas səbəbi onun vilayət prinsipi ilə qurduğu dərin bağlılıqdır. Bu bağlılıq Həzrət Peyğəmbər (s) tərəfindən Qədir-Xum hadisəsində İslam ümməti üçün bəyan edilmiş və məhz həmin mənəvi bağ şiə cəmiyyətinin tarix boyunca birliyinin, möhkəmliyinin və davamlılığının ən mühüm amilinə çevrilmişdir.
Allah yolunda müqavimət – İran xalqının inkişaf və tərəqqisinin amili
Ayətullah Əraki Həzrət Peyğəmbərin (s) risalətinin tərbiyəvi və ictimai nəticələrinə də toxunaraq bildirib ki, Allah Rəsulu (s) bəşəriyyətə yalnız kamil ilahi insan nümunəsini təqdim etməmiş, həm də öz peyğəmbərlik missiyasının ən böyük tərbiyəvi nailiyyətini ortaya qoymuşdur.
Qum Elmi Hövzəsinin Müəllimlər Birliyinin üzvü əlavə edib: Əmirəl-möminin həzrət Əli (ə), Qurani-Kərimlə yanaşı, Peyğəmbəri-Əkrəmin (s) doğruluğunun ən böyük nişanələrindən biridir. Bu məqam ilahi rəhbərliyin əhəmiyyətini və cəmiyyətin Qurani və vilayət əsaslı dəyərlərdən bəhrələnməsinin zəruriliyini göstərir.
Cəmiyyətin vilayət və intizar mədəniyyəti ilə əlaqəsinin yenidən canlandırılması
Ayətullah Əraki İmam Xomeyninin (r) vilayət məktəbinin ictimai imkanlarını yenidən dirçəltmək sahəsindəki roluna işarə edərək deyib: İmam Xomeyni (r) cəmiyyətin vilayət və intizar mədəniyyəti ilə əlaqəsini gizli və passiv bir potensialdan fəal və təsirli ictimai qüvvəyə çevirməyi bacardı. Bu bağlılıq dini və vilayi təlimlərin xalqın ictimai və siyasi həyatında əməli və təsirli rol oynaması üçün geniş zəmin yaratdı.
İnqilabdan sonra vilayət yolunun davamı
O vurğulayıb ki, bu yol İmam Xomeyninin (r) vəfatından sonra da şəhid Ayətullah Seyid Əli Xameneinin (r) rəhbərliyi ilə davam etmiş, cəmiyyətin ilahi dəyərlər və vilayət məktəbinin təlimləri ilə əlaqəsinin daha da dərinləşməsinə səbəb olmuşdur.
Ayətullah Əraki xatırladıb ki, cəmiyyətin daxili və xarici təzyiqlər, eləcə də müxtəlif təhdidlər qarşısında sabitliyi və dayanıqlılığı məhz bu möhkəm bağlılıq və vilayət rəhbərliyinin hidayətləri sayəsində təmin olunmuşdur.
Vilayət – cəmiyyətin Allahla və ilahi qüdrət mənbələri ilə əlaqəsidir
Ekspertlər Məclisinin sədr müavini bildirib ki, vilayət əslində cəmiyyətin uca Allah və ilahi dəyərlərlə bağlılığı və əlaqəsi deməkdir. Bu əlaqəni qoruyan hər bir cəmiyyət çətinlikləri aşmaq və düşmənçiliklərlə mübarizə aparmaq gücünə malik olur.
O əlavə edib ki, vilayət təlimləri yalnız insanın və cəmiyyətin ilahi həyat yolunda istiqamətlənməsinə xidmət etmir, eyni zamanda tarix boyu ictimai sabitliyin və dini kimliyin qorunmasının da təminatçısıdır.
Ayətullah Əraki iman və müqavimətin ilahi yoldakı roluna toxunaraq deyib: Allah yolunda və ilahi dəyərlər uğrunda müqavimət göstərən cəmiyyət məğlubiyyətdən qorxmur. O, hər bir müqavimət mərhələsini daha böyük inkişaf və kamilliyə aparan bir addım kimi qiymətləndirir.
Elmi Hövzələrin Ali Şurasının üzvü bildirib ki, məhz bu ruh yüksəkliyi xalqların daxili və xarici təzyiqlər qarşısında öz kimliyini və ictimai birliyini qoruyub saxlamasının əsas təminatıdır.
İran xalqının kimliyi və tarixi keçmişi
Məsləhətin Müəyyənləşdirilməsi Şurasının üzvü İnqilabdan əvvəlki dövrə toxunaraq deyib ki, İran xalqı İslam İnqilabından öncə böyük tarixi və sivilizasiya irsinə malik olsa da, müxtəlif tarixi mərhələlərdə təhqirə, asılılığa və milli potensialının bir hissəsinin itirilməsinə məruz qalmışdır. Məhz həmin dövr cəmiyyətdə izzətin, özünəinamın və milli müstəqilliyin yenidən bərpasına olan ehtiyacı daha da artırmışdı.
İslam İnqilabı – milli izzətin dirçəlişində dönüş nöqtəsi
Ayətullah Əraki davam edərək bildirib ki, İslam İnqilabı milli izzətin, özünəinamın, elmi inkişafın və ölkənin müstəqilliyinin yenidən bərpası üçün zəmin yaratdı. İran xalqı dini və inqilabi dəyərlərə söykənərək inkişaf və tərəqqi yolunu davam etdirdi, milli potensiallarını hərəkətə gətirməyə nail oldu.
Müstəqilliyin müdafiəsində Aşura və Əhli-beyt (ə) məktəbindən ilham
O vurğulayıb ki, bu gün İran xalqı Aşura mədəniyyətindən və Əhli-beytin (ə) həyat yolundan ilham alaraq öz kimliyini, izzətini və müstəqilliyini qorumaq istiqamətində hərəkət edir.
Elmi Hövzələrin Ali Şurasının üzvü çıxışının sonunda əlavə edib ki, bu ruhiyyə xalqın şüarlarında, ictimai iştirakında və müxtəlif xalq təşəbbüslərində aydın şəkildə müşahidə olunur. Bu da xalqın ilahi və inqilab dəyərlərinə bağlılığının davam etdiyini, tərəqqi və dayanıqlılıq yolunda həmin dəyərlərə sadiq qaldığını göstərir.
Xəbərin sonu
Rəyiniz