Hövzə Xəbər Agentliyinin verdiyi məlumata görə, Bəhreyndə Demokratiya və İnsan Hüquqları naminə fəaliyyət göstərən “SALAM” təşkilatı vurğulayıb ki, Böyük Britaniyanın siyasətləri insan hüquqları sahəsində real islahatların həyata keçirilməsinə deyil, Bəhreyndə repressiya mexanizmlərinin və cəzasızlıq mühitinin möhkəmlənməsinə xidmət edib.
Təşkilat öz internet saytında “Bağlı qapılar arxasında: Böyük Britaniyanın Bəhreyndə insan hüquqlarına təsirinin təhlili” adlı hesabat dərc edərək bildirib ki, Böyük Britaniyanın ardıcıl hökumətləri Bəhreyndə islahatların dəstəklənməsi ilə bağlı açıq və təkrarlanan öhdəliklər vermələrinə baxmayaraq, strateji, iqtisadi və təhlükəsizlik maraqlarını insan hüquqları məsələlərindən üstün tutublar.
Hesabat Böyük Britaniyanın diplomatiyası, təhlükəsizlik əməkdaşlığı, ticarət siyasətləri, institusional dəstək proqramları və insan hüquqlarının pozulması ilə bağlı fərdi halların geniş təhlili əsasında hazırlanıb.
Təşkilat əlavə edib ki, 2011-ci ildə Bəhreyndə demokratiya tələbi ilə keçirilən etirazların yatırılmasından sonra ölkədə vətəndaş və siyasi hüquqların davamlı şəkildə geriləməsi müşahidə olunub. Bu prosesə müxalif qrupların ləğvi, müstəqil media qurumlarının bağlanması, siyasi liderlərin, din xadimlərinin və insan hüquqları müdafiəçilərinin həbsdə saxlanılması daxildir. Bununla yanaşı, beynəlxalq təşkilatlar tərəfindən işgəncə, ədalətsiz məhkəmə prosesləri və cəzasızlıq halları sənədləşdirilib. Təşkilatın bildirdiyinə görə, bu geriləmə prosesi Böyük Britaniyanın Bəhreyndəki tərəfdaşlarına göstərdiyi çoxtərəfli dəstəyin davam etdiyi dövrə təsadüf edib.
Təşkilat həmçinin qeyd edib ki, 2026-cı ildə ifadə azadlığına qarşı məhdudiyyətlər daha da sərtləşib. Belə ki, məlumatlara əsasən, Bəhreyn rəsmiləri sosial şəbəkələrdə fikir bildirdiklərinə, etiraz aksiyalarında iştirak etdiklərinə və İran, sionist rejim və Amerika Birləşmiş Ştatlarının iştirak etdiyi regional hadisələrlə bağlı siyasi fəaliyyət göstərdiklərinə görə ən azı 300 nəfəri həbs ediblər.
Hesabatda vurğulanıb ki, Böyük Britaniyanın Bəhreynlə əlaqələri ölkədə insan hüquqları vəziyyətinin yaxşılaşmasına səbəb olmayıb. Eyni zamanda, iki ölkə arasındakı ticarət danışıqlarında insan hüquqları məsələləri yer almayıb və Böyük Britaniyanın Bəhreyn qurumlarına təhlükəsizlik və institusional dəstəyi davam edib. Halbuki həmin qurumlar genişmiqyaslı insan hüquqları pozuntularında iştirak etməkdə, bu pozuntuları ört-basdır etməkdə və ya onları legitimləşdirməkdə ittiham olunurlar.
“SALAM” təşkilatı Böyük Britaniya hökumətini təhlükəsizlik və maliyyə yardımlarını aydın insan hüquqları meyarlarına bağlamağa, ticarət sazişlərinə icrası məcburi olan hüquqi təminatlar daxil etməyə və fərdi insan hüquqları məsələlərinin qaldırılmasında daha ardıcıl və açıq mövqe nümayiş etdirməyə çağırıb.
Bəhreyn
Rəyiniz