Hövzə Xəbər Agentliyinin verdiyi məlumata görə, Ayətullah Əlirza Ərafi 1405-ci il tir ayının 19-da (10 iyul 2026-cı il) Qum şəhərinin Qüds məscidində qılınan cümə namazının xütbələrində İran və İraq xalqlarının şəhid Ayətullah Xamenei ilə vida və dəfn mərasimlərində nümayiş etdirdikləri milyonluq qəhrəmanlığı yüksək qiymətləndirərək bildirib:
Şəhid Ayətullah Seyid Əli Xamenei İslamdan və İmam Xomeyninin düşüncə məktəbindən qaynaqlanan nurlu bir fikir sistemi və məktəb idi. Bu irs dərindən təhlil edilməlidir.
Şəhid Ayətullah Seyid Əli Xameneinin dəfn mərasimində xalqın yaratdığı qəhrəmanlığın mesaj və dərsləri
Birinci dərs: «إحدیالحسنیین» «İki gözəl aqibətdən biri» şüarının yenidən dirçəldilməsi
Qumun cümə imamı şəhid Ayətullah Seyid Əli Xameneinin tarixi dəfn mərasimini İran və İraqda İslam ümməti tərəfindən formalaşdırılmış sivilizasiya zəncirinin bir halqası adlandıraraq deyib:
İslam İnqilabı və İran xalqı bir daha «إحدیالحسنیین» şüarını dirçəltdi, şəhadəti və ölümü Allah yolunda məmnuniyyətlə qarşılamaq ruhunu ucaltdı, qanın qılınca qalib gəlməsi həqiqətini bir daha nümayiş etdirdi. İslamın məntiqi və sizin son qəhrəmanlığınız qanın qılınca, mətinliyin və müqavimətin nadanlıq və alçaqlığa qalib gəlməsi, ölüm və şəhadətin Allah yolunda sevinc və qürurla qarşılanması idi.
Ayətullah Ərafi vurğulayıb:
Dünya bilməlidir ki, bizim xalqımız Allah, ədalət və insanlıq yolunda ölümü məmnuniyyətlə qarşılayır. Gənclərimiz öz izzəti, İslam və İran uğrunda cihad və şəhadətə tam hazırdırlar.
İkinci dərs: «Biz bacarırıq»
Qumun cümə imamı sözlərinə davam edərək bildirib:
İslam İnqilabının iki rəhbərinin əsas məntiqi «Biz bacarırıq» şüarıdır. Bu düşüncəni İmam Xomeyni irəli sürdü, şəhid Ali dini lider Seyid Əli Xamenei isə onu öz fəaliyyəti ilə həyata keçirdi.
O əlavə edib:
Ey dünya xalqları! Siz də zillətdən qurtula, istiqlalın şirinliyini dada və böyük işlər görə bilərsiniz. Çünki bir xalq dünyanın ən böyük iqtisadi və hərbi gücünün ağır zərbələri qarşısında möhkəm dayanmağı bacardı.
Qəyyumlar Şurasının üzvü bildirib: Dünyada yeni münasibətlər və yeni siyasi tənliklərin formalaşması xalqın meydandakı iştirakı sayəsində mümkün oldu. İslam ümməti ayıq olmalı və bu böyük dərsdən nəticə çıxarmalıdır.
Üçüncü dərs: Xalqın iradəsi və dirçəlişinin əvəzsiz rolu
Ölkə üzrə Elmi hövzələrinin rektoru bildirib ki, xalqın iradəsi, milli dirçəlişi, maarifləndirmə və həqiqətlərin izahı uğrunda aparılan mübarizə də xalqın yaratdığı bu qəhrəmanlığın mühüm dərslərindən biridir.
Dördüncü dərs: Dini mədəniyyətin və ilahi dəyərlərin rolu
O bildirib: Dini mədəniyyətin, Aşura məktəbinin, ilahi dəyərlərə sədaqətin, dini mərcəiyyətin və ilahi vilayətin rolu bu əsrin möcüzəsini yaratmış, şəhid Ayətullah Seyid Əli Xameneini ən uca məqama yüksəltmiş əsas amillərdəndir. Bu iman sərmayəsi möhkəm qorunmalıdır.
Qum şəhərinin cümə imamı vurğulayıb: Bu dəyərlər arasında dini rəhbərlik və vilayəti-fəqih xüsusi və yüksək məqama malikdir və onu qorumaq lazımdır. Bu gün də İmam Xomeyni (r) və şəhid Ayətullah Seyid Əli Xameneinin nurlu yolunun davamı olaraq, həzrət Ayətullah Seyid Müctəba Xameneinin rəhbərliyi ilə özünü davam etdirməkdədir. Bu dəyərlər sistemi qorunmalı və yaşadılmalıdır.
Beşinci dərs: Müasir silahların əhəmiyyəti
O bildirib: Müasir silahlar bu xalqın əsas sərvətlərindəndir və onları əldən vermək olmaz. Mədəni, siyasi, ictimai, təhlükəsizlik, diplomatik və həmçinin iqtisadi qüdrətə ehtiyacımız var, lakin aldanmamalıyıq. Çünki bütün bu sahələrin dayağı hərbi və silah gücüdür.
Ölkə üzrə Elmi hövzələrinin rektoru vurğulayıb ki, xalqımız dövlətin və Silahlı Qüvvələrin yanındadır və digər sahələrlə yanaşı, hərbi qüdrətin də gündən-günə artırılmasını dəstəkləyir.
Altıncı dərs: İran xalqının izzəti və əzəməti
Qum şəhərinin cümə imamı deyib: Düşmənlər İran xalqı üçün təslimiyyət, zillət və məhv planlaşdırmışdılar. Lakin sizin iştirakınız göstərdi ki, bunlar yalnız çirkli və sərxoş düşüncələrin məhsulu olan mənasız xəyallardır.
Ölkə üzrə Elmi hövzələrin rektoru bildirib: İran xalqı Allahın lütfü ilə bütün çətinliklərə sinə gərərək öz izzətini, əzəmətini və həmçinin şərəfini qorudu. Bu gün düşmənlər xalq üçün nəzərdə tutduqları zillətin əvəzinə onun əzəmətini görürlər. İranın və müqavimət cəbhəsinin əzəmətini, qüdrətini və müqavimətini görə bilməyən gözlər kor olsun. Trampın gözü də kor idi və onu qaranlıq gələcək gözləyir.
Yeddinci dərs: Müqavimət cəbhəsinin davamlı həyatı və yeni yüksəlişlər
Ayətullah Ərafi bildirib ki, yeni yüksəlişlərin yaranması və müqavimət mədəniyyətinin inkişafı İran xalqının və İslam ümmətinin iradəsinin bəhrəsidir.
O vurğulayıb: Düşmənlərin bütün təsəvvürlərinin əksinə olaraq, müqavimət cəbhəsi əvvəlki bütün mövqelərində yaşayır və bu gün bölgədə yeni müqavimət ocaqları da formalaşır. Allahın izni ilə, ABŞ-ın qan tökən ordusu və qəsbkar İsrail rejiminin qarşısında iki il əvvəlkindən daha güclü və daha möhkəm bir müqavimət zənciri yaranacaq.
Səkkizinci dərs: İslam dünyasının vahid ruhu və kimliyi
Ölkə üzrə Elmi hövzələrin rektoru bildirib ki, şəhid Ayətullah Seyid Əli Xameneinin dəfn mərasimi İslam ümmətinin vahid kimliyə malik olduğunu nümayiş etdirdi.
O qeyd edib ki, bu mərasim sərhədləri və coğrafi məhdudiyyətləri aşan qəlb və könül həmrəyliyi göstərdi. Bu, şəhid Ayətullah Seyid Əli Xameneinin və İran xalqının ən böyük nailiyyətlərindən biridir ki, İslam ümmətini vahid bayraq altında bir araya gətirdi. Allahın köməyi ilə bu yol Trampın, Netanyahu və İslam düşmənlərinin qarşısında da davam edəcək.
Doqquzuncu dərs: Şəhid Ayətullah Seyid Əli Xameneinin qanının qisasını almağın şəri və qanuni haqqı
Qum şəhərinin cümə imamı şəhid Ayətullah Seyid Əli Xameneinin qanının qisasını almağın şəri və qanuni haqqına toxunaraq dedi:
Aşura rəmzi olan qırmızı bayraqların dəfn mərasimində verdiyi mesaj bu idi ki, şəhidlərin və şəhid Ayətullah Seyid Əli Xameneinin qanının qisasını almaq bizim şəri və qanuni haqqımızdır. Bu qisas hələ qalır və mütləq alınacaq.
Onuncu dərs: İran xalqının oyanışının region dövlətlərinə mesajı
O, region dövlətlərinə müraciətlə edərək bildirib: Bizim ayağa qalxmağımızın sizə mesajı budur ki, muzdluluqdan və şeytani güclərə asılılıqdan uzaqlaşın. ABŞ və İsrailin gücündən qorxmayın, onlardan ayrılın. Qapalı qapılar arxasında bizə dediklərinizi açıq şəkildə də bəyan edin. Xalqlar sizi qəbul edəcəklər. Əks halda, bu asılılığı davam etdirsəniz, İnqilabın iradəsi qarşısında məğlub olacaqsınız.
On birinci dərs: ABŞ və sionist rejimin tənəzzülü
Qum şəhərinin cümə imamı əlavə edib: ABŞ və işğalçı sionist rejim bilməlidirlər ki, onların qüdrəti tənəzzülə uğrayır və onlar regionu tərk etməyə məcbur olacaqlar. İslamın və müqavimət cəbhəsinin gücü onları bu bölgədən çıxaracaq və mövcud regional tənasübü dəyişdirəcək.
On ikinci dərs: Ölkənin qurulması üçün yeni model
Ayətullah Ərafi bildirdi ki, ölkənin inkişaf modeli inqilabçı düşüncə, müqavimət ruhu və cəmiyyətin iradəsi əsasında qurulmalıdır.
O əlavə edib ki, icra, qanunvericilik və məhkəmə hakimiyyətləri, eləcə də bütün dövlət qurumları Ramazan ayında baş vermiş müharibənin təcrübəsi, İslam İnqilabının parlaq nailiyyətləri və iki böyük inqilab rəhbərinin zəngin irsi əsasında yeni bir baxış formalaşdırmalıdırlar.
Ölkə üzrə Elmi hövzələrin rektoru vurğulayıb ki, yeni yanaşmalar, daxili potensiala arxalanmaq, yad qüvvələrə ümid bağlamamaq, inqilabçı düşüncə və həmçinin İslam məntiqinə söykənmək əsas prinsiplərdən olmalıdır.
Qum şəhərinin cümə imamı məsul şəxslərə müraciətlə bildirib: Küçələrdəki xalq və müqavimət meydanları sizinlədir. Böyük xalqımız İnqilabın məntiqini qəbul edib və bu yol bütün qərarlarımızda və tədbirlərimizdə öz əksini tapmalıdır.
Böyük qəhrəmanlıqlar halqası formalaşdı
O bildirib ki, ötən həftə dünyanın ən böyük gücünə qarşı dörd ay davam edən mübarizəni tamamlayan böyük qəhrəmanlıqlar halqası formalaşdı.
O deyib: Kərbəla, Nəcəf, Tehran, Qum və Məşhəd şəhərlərində bir həftə ərzində baş tutan, eləcə də İslam dünyasının müxtəlif bölgələrində müxtəlif mərasimlərlə davam edən bu hadisələr İslam ümmətinin yaratdığı nurani bir zəncir, böyük sivilizasiya hərəkatı və bənzəri az görünən tarixi hadisədir.
Qum şəhərinin cümə imamı qeyd edib ki, şəhid Ayətullah Seyid Əli Xameneinin dəfn mərasimində nümayiş olunan qəhrəmanlıq tarixin dərinliklərində böyük dəyişikliklərə səbəb olan möhtəşəm siyasi və mənəvi hadisə idi.
O əlavə edib: Halal olsun o ümmətə ki, zamanın tələblərini düzgün dərk etdi, öz yerini tanıdı və zülm, qətliam və qan tökülməsi qarşısında təslim olmadı.
O, xalqın ayıqlığına və həlledici anlarda vaxtında meydana çıxmasına görə təşəkkür edib, həmçinin bu möhtəşəm mərasimə dəstək göstərən bütün məsul şəxslərə, dövlət qurumlarına, xeymə sahiblərinə, o cümlədən müqəddəs ziyarətgahların rəhbərlərinə və həmçinin bu hadisədə xidmət göstərən hər kəsə minnətdarlığını bildirib.
İmam Səccad (ə) və həzrət Zeynəbin (s.ə) Aşuradan sonrakı missiyası
Ayətullah Ərafi birinci xütbəsində bildirib ki, Aşura Bəni-Üməyyənin Peyğəmbər (s) ailəsinə, risalət və vilayət xəttinə son zərbəni vurmaq məqsədilə hazırladığı misilsiz hadisə idi. Bəni-Üməyyə imamət və vilayət ailəsini fiziki cəhətdən aradan qaldırmaqla ilahi hidayət yolunu məhv etmək istəyirdi.
Haqq cəbhəsinin Bəni-Üməyyəyə qarşı strategiyaları
Birinci strategiya: Əbədi fədakarlıq və zülmə qarşı müqavimət
O bildirib ki, haqq cəbhəsi düşmənin planlarına qarşı iki əsas strategiya seçmişdi.
Birinci strategiya son həddə qədər fədakarlıq göstərmək və zülm ordusuna qarşı müqavimət idi. Buna görə də İmam Hüseyn (ə) Aşura hərəkatını məhz bu əsas üzərində qurmuşdu.
Qumun cümə imamı əlavə edib ki, ilahi inayətlə çox dərin və dəqiq bir plan hazırlanaraq həyata keçirildi. Bu planın əsasında ən ağır müsibətlərə dözmək, eyni zamanda qəhrəmanlıq ruhunu və Allaha məhəbbəti qorumaq dayanırdı.
İkinci strategiya: İmam Səccadın (ə) çoxşaxəli fəaliyyəti
O vurğulayıb ki, birinci strategiya ikinci strategiya olmadan tamamlanmazdı. Yeni dövrün əsas bayraqdarı İmam Səccad (ə) idi.
Şəhid Məhəmməd Baqir Sədr İmam Səccadın (ə), İmam Baqirin (ə) və İmam Sadiqin (ə) dövrünü vahid strateji xəttə malik bir mərhələ hesab edirdi.
Ayətullah Ərafi əlavə edib ki, İmam Səccad (ə) və həzrət Zeynəbin (s.ə) misilsiz rolu olmasaydı, Aşura məktəbinin memarlığı öz məqsədinə çatmazdı. Məhz onların həyata keçirdiyi strategiyalar sayəsində ikinci strateji mərhələ formalaşdı.
İmam Səccad (ə) və həzrət Zeynəbin (s.ə) rəhbərlik strategiyaları
Birinci strategiya: Müsibətləri fürsətə çevirmək
Qum şəhərinin cümə imamı bildirdi ki, İmam Səccad (ə) və həzrət Zeynəbin (s.ə) müdrik rəhbərliyi sayəsində Əhli-beytə (ə) qarşı yönəlmiş ən ağır təhdidlər ən böyük fürsətlərə çevrildi.
Ölkə üzrə Elmi hövzələrin rektoru əlavə edib ki, düşmənlərin Kərbəla faciəsi üçün hazırladığı plan sonda həqiqi İslamın dirçəlişinə səbəb oldu və Bəni-Üməyyə hakimiyyətinin süqutunu sürətləndirdi. Zahirdə Bəni-Üməyyənin məclislərində ağır müsibətlər yaşamış kiçik bir əsir dəstəsi görünürdü, lakin əslində həmin məclislərdə həzrət Zeynəb (s.ə) və İmam Səccadın (ə) sözü qarşısında əsir olan Bəni-Üməyyə idi.
O qeyd edib ki, İmam Səccad (ə) və həzrət Zeynəb (s.ə) xütbə söylədikdə, həqiqətdə Bəni-Üməyyə əsir vəziyyətinə düşürdü. Beləliklə, haqqın məntiqi, ağıl, hikmət və cəsarət həqiqət düşmənlərini məğlub edir və onları məhvə aparan yola salırdı.
İkinci strategiya: Aşura həqiqətinin düzgün təqdim edilməsi
O əlavə etdi ki, İmam Səccadın (ə) ikinci mühüm strategiyası Aşura hadisəsini düzgün şəkildə izah etmək idi. Çünki Aşura yanlış yozumlar və təhriflər təhlükəsi ilə üz-üzə idi. Bu böyük hadisənin həqiqi mahiyyətini gələcək nəsillərə çatdırmaq və Aşura məktəbinin əsaslarını düzgün izah etmək İmam Səccadın (ə) əsas missiyalarından biri idi.
Üçüncü strategiya: Ümmətin maarifləndirilməsi və düşmənin rüsvay edilməsi
Elmi Hövzələrin rektoru bildirib ki, İmam Səccadın (ə) üçüncü strategiyası düşməni rüsvay etmək və İslam ümmətini haqq, ədalət və həqiqət düşmənlərinə qarşı ayıq-sayıq olmağa çağırmaq idi.
Dördüncü strategiya: Aşura məktəbinin yenidən təqdim edilməsi
O vurğuladı ki, İmam Səccad (ə) Aşuranın böyük dərslərini yenidən bəyan edərək onu hərtərəfli bir məktəbə çevirdi. Aşura yalnız hərbi və təhlükəsizlik hadisəsi deyildi. Baxmayaraq ki, bu hadisə qeyri-bərabər döyüş şəraitində baş vermiş və iman, şücaət və fədakarlığın ən uca nümunələri nümayiş etdirilmişdi, onun dərinliyində insanı tərbiyə edən və həyat bəxş edən ilahi maarif xəzinəsi mövcuddur. İmam Səccad (ə) bu böyük irsi həzrət Peyğəmbərin (s) risalətindən qaynaqlanan kamil bir məktəb kimi cəmiyyətə təqdim etdi.
Qum şəhərinin cümə imamı qeyd edib ki, İmam Səccad (ə), İmam Baqir (ə) və İmam Sadiqin (ə) dövrünün əsas ruhu Aşuradan qaynaqlanırdı. Bu imamlar Aşuranın etiqadi, əxlaqi, ictimai və siyasi ölçülərini izah edərək onun məktəbini kamilləşdirdilər və nəticədə Əhli-beyt (ə) məktəbi ilə həqiqi İslam dini daha da möhkəmləndi.
O əlavə etdi ki, İmam Səccad (ə) insanlara dua və ibadət yolunu, Allah qarşısında təvazökarlığı, həmçinin haqq və ədalət düşmənləri ilə mübarizə üsulunu öyrətdi və bununla da Aşuranı əbədi yaşatdı.
Qum şəhərinin cümə imamı sonda vurğuladı ki, əgər İmam Səccadın (ə) və Kərbəla əsirlərinin bu böyük strateji fəaliyyəti olmasaydı, Aşura Kərbəla çölündə qalardı və onun ilahi mesajı gələcək nəsillərə çatmazdı.
O bildirib ki, İmam Səccad (ə) Aşuranın bayrağını bütün dünyada ucaltdı və bu böyük hərəkatı əbədi və ölməz etdi.
Fotolar | Qum şəhərində cümə namazının əzəmətli mənəvi-siyasi mərasimi
Rəyiniz