Hövzə Xəbər Agentliyinin verdiyi məlumata görə, müasir həyat tərzində ailəni sarsıdan əsas problemlərdən biri dəbdəbəpərəstliyin hökm sürməsi və bunun doğurduğu təzyiqlərdir. Ailə məsələləri üzrə tanınmış mütəxəssis Höccətül-İslam vəl-müslimin Təraşiyun bu problemdən danışarkən fərdi və ailədaxili baxışların yenidən nəzərdən keçirilməsinin vacibliyini vurğulayıb və ailə həyatında tarazlığın qorunması üçün tövsiyələr verib.
Sual:
Həyat yoldaşım həddindən artıq dəbdəbəpərəstdir!
Höccətül-İslam vəl-müslimin Təraşiyunun cavabı:
Birinci məqam: Öz baxışlarımızı yüksəltməliyik. Görək, bizim üçün həqiqətən nə önəmlidir? Qarşı tərəfin süfrəsində neçə növ çərəz və ya ləpə olması vacibdir, yoxsa onun bizimlə necə davranması, necə ünsiyyət qurması və necə danışması?
Şübhəsiz ki, bu gün insanların düşüncə və baxış səviyyəsi yüksəlib. İnsanlar əvvəlki kimi yalnız nə yediklərinə, nə içdiklərinə və nələrə sahib olduqlarına görə qiymət vermirlər. Əslində biz bəzi məsələləri həddindən artıq böyüdürük, halbuki bunlar insanların çoxu üçün əhəmiyyət daşımaya bilər. Biz elə şeylər görürük ki, başqaları onları görmür. Elə düşünməyək ki, həyatımız bu zahiri şeylərlə böyüyür və ya biz bunlarla böyük görünürük. Biz elə hesab edirik ki, bunlarla hörmət qazanırıq. Halbuki həqiqətdə insanı böyük göstərən onun davranışı, əxlaqı və rəftarıdır.
Məsələn, ailə məhkəmələrinə baxın. Görün neçə kişi həyat yoldaşını zahiri gözəlliyinin olmamasına görə boşamaq istəyir? Belə hallar demək olar ki, yoxdur. Mən uzun illər ailə məsləhətçisi kimi fəaliyyət göstərmişəm. Barmaqla sayılacaq qədər az hallarda belə səbəblə müraciət edən olub. Amma ailə məhkəmələrində əsas problemlərə baxanda görürük ki, əsas məsələ əxlaq, davranış və rəftardır. İnsanlar daha çox qarşı tərəfin pis davranışı və əxlaqı ucbatından boşanmaq və ya məhkəməyə müraciət etmək qərarına gəlirlər. Bu mədəniyyəti cəmiyyətimizdə formalaşdırmalıyıq.
İkinci məqam: Ailədə sanki bir davranış və həyat prinsipləri nizamnaməsi olmalıdır. Həyat yoldaşları bir-birinin imkan və gücünü mütləq nəzərə almalıdırlar. Mən həyat yoldaşımın imkanlarını nəzərə almalıyam, xanım da ərinin maddi və fiziki imkanlarını nəzərə almalıdır.
Məsələn, mən 15 qonaq dəvət edirəm, halbuki həyat yoldaşımın 10 nəfərdən artıq qonağı qəbul etmək imkanı yoxdur. Sonra da deyirəm: “Mənim anam 30 qonağa xidmət edirdi, sən niyə bacarmırsan?” Bu düzgün yanaşma deyil. Hər kəsin gücü və imkanı fərqlidir. Həyat yoldaşının imkanını nəzərə almaq və ona dəstək olmaq lazımdır.
Eyni şəkildə xanım da ərinin maddi imkanlarını nəzərə almalıdır. Ondan yalnız imkanı çatan qədər gözlənti olmalıdır, imkanından artıq yox. Şübhəsiz ki, həddindən artıq gözləntilər ailədə ilk növbədə ər-arvad arasındakı etimadı sarsıdır, münasibətlərə zərbə vurur və ailənin təməlini zəiflədir.
Səs yazısını yükləmək üçün buraya klikləyin.
Rəyiniz