Hövzə Xəbər Agentliyinin verdiyi məlumata görə, Ayətullah Cavadi Amuli ölkənin Baş Polis Komandanı general Əhmədrza Radanla görüşündə İmam Həsən Əsgəridən (ə) nəql olunan bir hədisə toxunaraq gecə namazını və Allah-Taalaya səmimi bağlılığı Allaha yaxınlaşmağın ən yaxşı yollarından biri hesab edərək bildirib:
İmam Həsən Əsgəri (ə) buyurur:
«اِنَّ الوُصُولَ اِلی اللهِ عَزّوجلَّ سَفَرٌ لا یُدرَکُ اِلّا بِامتِطاءِ اللَّیلِ»
“Uca və Əziz Allaha çatmaq uzun bir səfərdir və bu səfər yalnız gecəni minik vasitəsi etmək, yəni gecə namazı qılmaqla mümkün olar.”
Bu yol uzun yoldur, bu səfər uzun səfərdir və miniksiz getmək mümkün deyil. Onun miniyi isə gecə namazıdır. İnsan təklikdə, gecə namazı zamanı, başqalarının iştirakı olmadan öz zəifliklərini və həqiqi ehtiyaclarını Allah-Taalaya bildirir. Məhz bu səmimi əlaqə insanın inkişaf və kamilləşməsi üçün zəmin yaradır.
Ayətullah Cavadi Amuli daha sonra Qurani-Kərimdə “əmanət” anlayışına toxunaraq İslam sistemində məsuliyyət və əmanətdarlığın əhəmiyyətini vurğulayıb və deyib: Müqəddəs ayədə buyurulan:
إِنَّا عَرَضْنَا الْأَمَانَةَ عَلَی السَّمَاوَاتِ وَالْأَرْضِ وَالْجِبَالِ...
“Şübhəsiz, Biz əmanəti göylərə, yerə və dağlara təqdim etdik...”
ifadəsi yalnız Quranın, malın və ya maddi bir əşyanın əmanət olması mənasını daşımır. Burada söhbət insanın əmanət məqamına yüksəlməsindən və Allahın əmanətini qoruyan şəxs, yəni “Əminullah” olmasından gedir.
O əlavə edib: Necə ki, bir şəxsə əmirlik məqamı verildikdə o, “əmir” adlanır, Allahın əmanət məqamı insana tapşırıldıqda da insan “Əminullah” olmalıdır. Bu məqam çox ağır məsuliyyətdir və onu qorumaq həqiqi əmanətdarlıq tələb edir.
Ayətullah Cavadi Amuli polis qüvvələrinin və İslam sistemindəki digər məsul şəxslərin üzərinə düşən vəzifələrə toxunaraq vurğulayıb: İnsanların canı, insanların malı, insanların namusu və insanların torpağı Allahın əmanətidir və məsul şəxslər bu əmanətləri qorumağa çalışmalıdırlar.
O, idarəçilik, maliyyə məsuliyyətləri, təhlükəsizliyin qorunması və digər ictimai vəzifələrin də əmanət olduğunu bildirərək qeyd edib: Hər hansı məsuliyyəti üzərinə götürən şəxs bilməlidir ki, bu məsuliyyət onun şəxsi mülkü deyil. Bu, düzgün şəkildə qorunmalı və haqqı ilə yerinə yetirilməli olan bir əmanətdir.
Ayətullah Cavadi Amuli daha sonra:
هُوَ الَّذِی أَیَّدَکَ بِنَصْرِهِ وَبِالْمُؤْمِنِینَ
“Odur ki, səni Öz yardımı və möminlərlə qüvvətləndirdi” “Ənfal” surəsinin 62-ci ayə
ayəsinə toxunaraq mömin insanların iştirakı və dəstəyini ilahi yardımın mühüm amillərindən biri hesab edib və müsəlmanların Xeybər döyüşündəki qələbəsinə işarə edərək bildirib: Zahiri hesablamalara görə müsəlmanların düşmən üzərində qələbə qazanması olduqca çətin olduğu bir şəraitdə ilahi yardım və möminlərin iştirakı qələbəyə səbəb oldu.
Ayətullah Cavadi Amuli son illərdə baş verən hadisə və proseslərə, həmçinin İslam Respublikasının hegemon güclər qarşısında göstərdiyi müqavimətə toxunaraq xalqın iştirakını sistemin qüdrətinin ən mühüm amillərindən biri hesab edib və vurğulayıb: Nə qədər ki, xalq meydandadır, din və sistemlə birlikdə hərəkət edir, ilahi yardım da cəmiyyətə şamil olacaq.
O, məsul şəxslərin xalqla həmrəy olmasının zəruriliyini vurğulayaraq qeyd edib: Əgər xalq problemlərlə üzləşdiyi zaman məsul şəxslərin də onların yanında olduğunu, təhlükəsizlikdə, rahatlıqda və cəmiyyətin çətinliklərində onlarla şərik olduğunu hiss etsə, bu həmrəylik xalqla sistem arasındakı əlaqələrin daha da möhkəmlənməsinə səbəb olacaq.
Ayətullah Cavadi Amuli çıxışının sonunda şəhidlərin uca məqamına toxunaraq onların xatirəsinin və yolunun yaşadılmasının zəruriliyini vurğulayıb və polis qüvvələrinin bütün əməkdaşlarına, eləcə də İslam sisteminə xidmət edən bütün şəxslərə əmanəti layiqincə yerinə yetirmək və xalqa səmimi şəkildə xidmət göstərməkdə uca Allahdan uğur diləyib.
Xəbərin sonu
Rəyiniz