Hövzə Xəbər Agentliyinin verdiyi məlumata görə, “Vəhdət həftəsi”nin başlanması münasibətilə daim “milli birlik”, “təbyin cihadı” və “ictimai təsəvvürlərin formalaşdırılması” prinsiplərini ön plana çəkən İslam İnqilabının şəhid rəhbəri Ayətullah Seyid Əli Xameneinin strateji çıxışlarından bir qismi dəyərli oxucuların diqqətinə çatdırılır.
Bir
Mənəvi kamillik yolunu gedən insanlar inanırlar ki, Rəbiül-əvvəl ayı həqiqi mənada “həyatın baharı” və “yaşamın baharı” hesab olunur. Çünki bu ayda İslamın əziz Peyğəmbəri həzrət Məhəmməd (s), eləcə də onun əziz nəvəsi İmam Sadiq (ə) dünyaya göz açıb. İslam Peyğəmbərinin (s) mövludu uca Allahın bəşəriyyət üçün müəyyən etdiyi bütün bərəkətlərin başlanğıcıdır.
İki
Əlamət və göstəricilərdən belə qənaətə gəlirəm ki, bu gün düşmənin əsas səyləri xalq arasında mövcud olan bu həmrəyliyi, birlik və həmfikirliliyi zədələməyə yönəlib. Düşmən müxtəlif üsullardan istifadə etməklə bu məqsədini həyata keçirməyə çalışır.
Xalq diqqət yetirməlidir ki, bu müqəddəs birlik, bu böyük həmrəylik və xalqın qəlb və iradəsindən qaynaqlanan bu polad sipər heç bir şəkildə zədələnməməlidir. Allaha şükür olsun ki, bu gün ölkədə birlik mövcuddur və xalq bu birliyi qorumalıdır. Ölkənin məsul şəxsləri, xüsusilə də üç hakimiyyət orqanlarının rəhbərləri də Allaha şükür, tam birlik və qarşılıqlı həmrəylik şəraitində fəaliyyət göstərirlər. Bu həmrəylik və birlik qorunub saxlanılmalıdır.
Üç
Birlik dedikdə, əlbəttə ki, dini məzhəblərin birləşməsi nəzərdə tutulmur. Yəni bir məzhəbin ardıcıllarının digər məzhəbə keçməsi və nəticədə hamının vahid bir məzhəbə mənsub olması nəzərdə tutulmur. Heç bir halda məqsəd bu deyil.
Həmçinin burada coğrafi birlik də nəzərdə tutulmur. Məsələn, ötən əsrin 60–70-ci illərində bəzi ərəb ölkələrinin həyata keçirməyə çalışdıqları və birlik elan edərək vahid dövlət olduqlarını iddia etdikləri təşəbbüslər kimi. Belə bir təşəbbüs nə reallaşdı, nə də reallaşdırılması mümkün idi. Birlikdə məqsəd İslam ümmətinin mənafelərinin qorunması istiqamətində həmrəylik, qarşılıqlı yaxınlaşma və birgə fəaliyyət göstərməkdir.
Dörd
İlk növbədə İslam ümmətinin mənafelərinin dəqiq olaraq harada və hansı məsələlərdə cəmləşdiyini müəyyənləşdirmək lazımdır. Daha sonra bu istiqamətdə xalqlar bir-biri ilə razılığa gəlməlidirlər. Dövlətlər də ilahi iradəyə uyğun və düzgün istiqamətdə hərəkət etdikləri təqdirdə, İslam ümmətinin mənafelərinin qorunması istiqamətində bir-biri ilə həmrəy və həmfikir olacaqlar.
Buna görə də dövlətlər İslam ümmətinin mənafelərinin qorunması istiqamətində bir-biri ilə razılığa gəlməli və müəyyənləşdirməlidirlər ki, İslam ümmətinin bu gün nələrə ehtiyacı var. Kimə qarşı və hansı yanaşma əsasında düşmən mövqeyi nümayiş etdirmək, kimlə dostluq və əməkdaşlıq etmək və bunu hansı şəkildə həyata keçirmək lazımdır.
Nəticə etibarilə, bu vəhdətdən məqsəd danışıqlar və müzakirələr zamanı bu istiqamətlər üzrə razılığa gəlmək və həmin istiqamətdə birgə hərəkət etməkdir. Əslində, əsas məqsəd hegemonluq siyasətinin planları qarşısında əməli həmrəylik nümayiş etdirməkdir.
Beş
Dünya hegemonluğunun və onun başında dayanan cinayətkar Amerikanın qarşı çıxdığı məhz sizin dininiz və elminizdir. Onlar sizin dininizə qarşıdırlar. İslam və Quranın kölgəsində formalaşmış xalqın genişmiqyaslı imanına və möhkəm birliyinə düşmənçilik bəsləyirlər. Nəhayət, onlar sizin elm və biliyinizə də qarşı çıxırlar.
Altı
Dünya hegemonluğunun və onun başında dayanan cinayətkar Amerikanın qarşı çıxdığı əsas iki mühüm xətt xalqımızın “dini” və “elmi”dir. Onlar xalqın dərin imanına, İslam və Quranın kölgəsində formalaşmış möhkəm birlik və həmrəyliyə, eləcə də ölkənin elmi tərəqqisinə qarşı çıxırlar.
Hər kəs milli birliyi qorumalıdır. Çünki ölkəmizin bu həmrəylik və birliyə hər zamankından daha çox ehtiyacı var. Böyük İran xalqı bir çox məsələlərdə vahid mövqeyə və ortaq iradəyə malikdir. Bu baxımdan, ölkənin məsul şəxsləri, xüsusilə üç hakimiyyət orqanlarının rəhbərləri qarşılıqlı həmrəylik, həmrəylik və sıx əməkdaşlıq yolu ilə milli birlik və həmrəyliyin daha da möhkəmləndirilməsi istiqamətində səylər göstərməlidirlər. Şübhəsiz ki, dövlət və hakimiyyətin müxtəlif strukturları arasında birlik və əməkdaşlıq nə qədər güclənərsə, milli qüdrət və həmrəylik də bir o qədər möhkəmlənəcək.
Cəmiyyətdə müxtəlif fikir və baxışların mövcudluğu təbiidir. Lakin bu fikir ayrılıqlarının həlli yolu dialoq və danışıqlardan keçir. Təəccüblüdür ki, bəzi şəxslər dünya ilə qarşılıqlı əlaqə və danışıqların vacibliyini vurğuladıqları halda, daxili fikir ayrılıqlarının həlli və ölkə daxilindəki qüvvə və ünsürlərlə qarşılıqlı münasibətlər məsələsində nə üçün dialoq yolundan uzaqlaşırlar? Xəbərdarlıq edilməlidir ki, bu günlərdə səslənən bəzi fikirlər nəinki birlik və həmrəyliyə xidmət etmir, əksinə, ixtilaf və təfriqə toxumları səpir. Halbuki bu gün ölkəmizin cəmiyyətə parçalanma və ixtilafı deyil, birlik və həmrəyliyi aşılayan sözlərə hər zamankından daha çox ehtiyacı var.
Yeddi
Bəziləri yanlış olaraq düşünürlər ki, şiə məzhəbinin haqq olduğunu sübut etmək sünni qardaşların böyük şəxsiyyətlərinə və müqəddəslərinə hörmətsizlik və təhqir etməkdən keçir. Halbuki belə bir yanaşma Məsum İmamların (ə) praktiki yolu ilə tamamilə ziddiyyət təşkil edir.
İslam dünyasında digər İslam məzhəblərinin müqəddəslərinə qarşı pis danışmaq və təhqir etmək məqsədilə “şiəlik” adı altında fəaliyyət göstərən media vasitələri və şəbəkələr konkret olaraq xarici qüvvələrin maliyyə mənbələrindən və İngiltərə tərəfindən maliyyələşdirilir. Bu, məhz “İngilis şiəliyi” adlandırılan cərəyandır. Heç kəs düşünməməlidir ki, Əhli-beytin (ə) maarifinin təbliği və şiə etiqadlarının möhkəmləndirilməsi təhqir və təfriqə yolu ilə həyata keçirilir. Çünki bu cür addımlar nəinki nəticə vermir, əksinə, tamamilə əks nəticə doğurur və İslam ümmətinin birliyinə ciddi zərər vurur.
Səkkiz
İran İslam Respublikası həqiqi mənada “İslam ümmətinin birliyi” zərurətinə inanır. Bu etiqad dövlətin əsas prinsiplərində öz kökünü tapır. Belə ki, mərhum Ayətullah Bürucerdi (r) kimi görkəmli mərcəi-təqlid alimləri vəhdətin əsas carçılarından olmuş və daim İslam dünyasının böyük şəxsiyyətləri və sünni alimləri ilə əlaqələr saxlayaraq dialoq aparmışlar.
Bu inanc dərin və səmimi imana əsaslanır və onu yalnız “siyasi taktika” kimi təqdim etməyə çalışan bəzi şəxslərin təsəvvür və iddialarının əksinə olaraq, bu mövqe din və iman ilə bağlı bir vəzifədir.
İslam dünyasının birliyi müxtəlif mərhələ və səviyyələrə malikdir. Onun ilk və ən fundamental mərhələsi “bir-birinə təcavüz etməmək” prinsipinə bağlılıqdır. Belə ki, İslam cəmiyyətləri, ölkələri və dövlətləri bir-birinə qarşı hər hansı addım atmamalı və bir-birinin mənafelərinə zərər vurmamalıdırlar. Daha yüksək mərhələlərdə isə əsas hədəf bütün İslam dünyasının “yeni İslam sivilizasiyasına” nail olmaq məqsədilə həmrəy və vahid istiqamətdə hərəkət etməsidir. İran İslam Respublikası da bu məqsədin həyata keçirilməsi üçün uzunmüddətli hədəflər müəyyənləşdirib.
Rəyiniz