Hövzə Xəbər Agentliyinin verdiyi məlumata görə, həzrət Məhəmməd Peyğəmbərin (s) mövludunun 1500-cü ildönümü, vəhdət həftəsi və Qum şəhərində İslam vəhdəti üzrə 40-cı beynəlxalq konfransın elmi bölməsinin keçirilməsi çərçivəsində “Məhəmməd Peyğəmbərin (s) elm və maarifinə dair tədqiqat mövzuları” adlı 12 cildlik külliyyatın təqdimatı keçirilib. Təqdimat mərasimində ölkə üzrə Elmi hövzələrinin rektoru Ayətullah Ərafi və İslam Məzhəblərinin Yaxınlaşdırılması üzrə Ümumdünya Assambleyasının baş katibi Höccətül-islam vəl-müslimin Həmid Şəhriyari iştirak ediblər.
Baxın:
60 min tədqiqat mövzusu – heç bir təkrar olmadan
Bu dəyərli əsər Elmi hövzə tədqiqatçılarının onillik elmi səyləri nəticəsində hazırlanıb. Külliyyat həzrət Məhəmməd Peyğəmbərin (s) şəxsiyyəti, həyat yolu və maarifinin müxtəlif aspektlərinin araşdırılması məqsədilə 60 min tədqiqat mövzusunu və 28 elmi istiqaməti əhatə edir.
Əsərin hazırlanmasında müxtəlif İslam və humanitar elmlərin imkanlarından kompleks şəkildə istifadə olunub və 60 min tədqiqat mövzusu arasında heç bir təkrar mövcud deyil.
Bundan əlavə, daha ixtisaslaşmış və praktiki istiqamətə malik 5 min tədqiqat mövzusunun da hazırlanması nəzərdə tutulur. Bu mövzular tamamlanıb sistemləşdirildikdən sonra gələcəkdə tədqiqatçıların istifadəsinə təqdim ediləcək.
Maarifin tətbiq olunan nəzəriyyələrə çevrilməsi
Bu dəyərli külliyyatda İslam Peyğəmbəri həzrət Məhəmməd (s) haqqında bu günün çağırışları və sualları əsasında müxtəlif elmi mövzu və istiqamətlər üzrə 60 min tədqiqat sualı və problemi müəyyənləşdirilib, irəli sürülüb və təsnifləşdirilib. Həmçinin Peyğəmbərin (s) həyatının və maarifinin öyrənilməsi sahəsində mövcud elmi boşluqlar və yeni elmi yanaşmalar müəyyənləşdirilərək araşdırılıb. Əsas məqsədlərdən biri Rəsulullahın (s) hədis və maarifinin necə tətbiqi və praktiki nəzəriyyələrə çevrilə biləcəyini ortaya qoymaqdır.
Elmi hövzələrin bəşəriyyətə hədiyyəsi
İslam dünyasında analoqu olmayan işlərdən biri hesab edilən “ Həzrət Məhəmməd Peyğəmbərin (s) elm və maarifinə dair tədqiqat mövzuları” adlı 12 cildlik külliyyat, Qum Elmi hövzəsinin və Əmirəl-mömininin (ə) məktəbinin davamçılarının həzrət Məhəmməd Peyğəmbərin (s) bərəkətli varlığı sayəsində bəşəriyyətə, dinşünaslara və peyğəmbər irsini araşdıran tədqiqatçılara təqdim etdiyi dəyərli bir töhfədir.
Bu mərhələ yalnız ilk addımdır. Növbəti mərhələlərdə müəyyən edilmiş məsələlərin prioritetləşdirilməsi, onların elmi baxımdan izahı və araşdırılması, daha sonra isə bu məsələlərin məqalə, kitab, elmi toplantılar, azad fikir müzakirələri və nəzəriyyə yaradıcılığı formasında elmi nəticələrə çevrilməsi istiqamətində işlər aparılacaq.
Həzrət Məhəmməd Peyğəmbərə (s) yeni elmi və sivilizasiya yönümlü yanaşma
Qum Elmi hövzəsinin, Beynəlxalq məsələlər üzrə müavinliyin, Tədqiqat üzrə müavinliyin və hövzə və ölkənin ehtiyac duyduğu tədqiqatları dəstəkləmə katibliyinin əməkdaşlığı ilə hazırlanmış bu dəyərli elmi külliyyat həzrət Məhəmməd Peyğəmbərə (s) yeni sivilizasiya və elmi yanaşmanın formalaşmasına zəmin yarada və İslam dünyasında elmi yaxınlaşma və həmrəyliyin güclənməsinə şərait yarada bilər.
Xəbərin sonu – 313/3
Rəyiniz