Hövzə Xəbər Agentliyinin verdiyi məlumata görə, İslam İnqilabının Ali Məqamlı Rəhbəri Abadan adasında baş vermiş Zülfüqari əməliyyatının ildönümü münasibətilə bəyanat yayıb. Bu bəyanatın tam mətni aşağıdakı kimidir:
Bağışlayan və mehriban Allahın adı ilə
9 Aban 1359-cu il — (31 oktyabr 1980-ci il)
birinci müharibənin başlanmasından cəmi qırx gün sonra İslam döyüşçülərinin Bəs rejiminin təcavüzkar qüvvələrinə qarşı həyata keçirdikləri qəhrəmanlıq əməliyyatının və xalqın misilsiz şücaətinin, eləcə də həmin qüvvələrin Abadan adasından qovulmasının ildönümüdür.
İran xalqının səkkizillik İran-İraq müharibəsi dövründə qazandığı ilk qələbə hesab edilən və haqqında nisbətən az danışılan bu mühüm qəhrəmanlıq hadisəsi “Zülfüqari əməliyyatı” adlandırılıb. Bu hadisə vətənimizə qarşı istənilən dövrdə düşmənlərlə və təcavüzkarlarla mübarizə aparmaq baxımından çoxsaylı dərslər verib.
Həmin günlərdə İraqa onun xalqının etiqad və ənənələri ilə lazımi münasibəti olmayan bir diktator rəhbərlik edirdi. O, haqlı olaraq İran xalqının qardaşı hesab etdiyi, rəşadətli İraq xalqının düşüncə və amalına zidd olaraq, bəzi şüar və əsassız iddialar irəli sürməklə iki xalq arasında Əhli-beyt (ə) məktəbinə və onlara bəslənən məhəbbətə söykənən dərin tarixi bağlılığı qıra biləcəyini düşünürdü.
Bəs rejiminin düşməni də həmin günlərdə, bugünkü düşmən kimi, təcavüz, işğal və mühasirə kimi ənənəvi üsullardan istifadə edirdi. Onun mənfur planına qarşı səmərəli mübarizənin aparılması və qələbənin əldə olunmasının yolu isə xalqın və canını vətən uğrunda fəda etməyə hazır olan qüvvələrin uzaqgörənliyi, onların igidliklə müqavimət göstərməsi, eləcə də ordunun və İslam İnqilabı Keşikçiləri Korpusunun cəsur döyüşçülərinin qəhrəmanlığı idi.
Həmin günlərdə sadə və qeyrətli bir iranlı fəhlə fədakarlıq və canından keçmək bahasına xalqı düşmənin mənfur planından xəbərdar etdi. Bölgənin bir qrup xalq qüvvəsi və məscid əhli ilahi iman və motivasiya, ən az imkanlarla, Abadanın mücahid və fədakar cümə imamı, əməli saleh və cəsur alim mərhum Ayətullah Cəminin (Allah ona rəhmət etsin) rəhbərliyi altında mübarizə meydanına çıxdı.
Xalqın bu hərəkatı müasir silahlarla təchiz olunmuş təcavüzkar düşməni öz addımından peşman etdi. Çox keçmədi ki, İran xalqının müxtəlif etnik qruplarını təmsil edən insanlar ölkənin şimalından cənubuna, şərqindən qərbinə qədər İslam İranının sərhədlərini müdafiə etmək üçün vahid cəbhədə birləşdilər. Nəhayət, bir ildən də az müddət sonra İmam Xomeyninin (r) əmri və ilahi lütf sayəsində Abadan mühasirəsinin yarılması gerçəkləşdi.
Bu gün də məhz həmin sayıqlıq və iman, həmin motivasiya və iradə, həmin fədakarlıq və canından keçməyə hazırlıq, həmin qeyrət və müqavimət uca Allahın inayəti və eləcə də həzrət İmam Zamanın (ə.f) xüsusi diqqəti sayəsində İranın məzlum, lakin qüdrətli xalqına Amerikanın hökmranlıq siyasəti, cinayətləri və həmçinin təcavüzü ilə mübarizədə, eləcə də üçüncü məcburi müharibədə qələbəyə çatmaqda yardım edir.
«وَما النَّصرُ إِلّا مِن عِندِ الله العَزیزِ الحَکیمِ.»
Qələbə yalnız yenilməz qüdrət və hikmət sahibi olan Allah tərəfindəndir.
Seyid Müctəba Hüseyni Xamenei
9 Aban 1405 (31 oktyabr 2026-cı il)
Rəyiniz