Hövzə xəbər agentliyinin verdiyi məlumata əsasən, Höccətül-İslam vəl-Muslimin Seyyid Sacid Əli Nəqəvi, Pakistan Şiə Alimlər Şurasının sədri, İran İslam Respublikası ilə Amerika Birləşmiş Ştatları arasında aparılan danışıqlarla bağlı verdiyi bəyanatda vurğulayıb:

Bu danışıqlar yalnız o zaman müsbət və davamlı nəticələrə gətirib çıxara bilər ki, bərabərlik prinsipi, qarşılıqlı hörmət və hər cür təhdid və siyasi təzyiqdən uzaq bir atmosferdə keçirilsin.

O, ABŞ rəsmilərinin danışıqlardan öncə verdiyi hədələyici açıqlamaları tənqid edərək bildirib:

İrana qarşı hərbi müdaxilə ilə hədələmək, müstəqil bir ölkənin milli suverenliyinə açıq şəkildə təcavüz sayılır. Beynəlxalq ictimaiyyət belə təhlükəli və təxribat xarakterli yanaşmalara qarşı ciddi və məsuliyyətli reaksiya göstərməlidir.

 Pakistanın tanınmış böyük alimi əlavə edib:

Tarixi təcrübə göstərir ki, davamlı və təsirli razılaşmalar yalnız o zaman mümkün olur ki, tərəflər ortaq maraqlar, qarşılıqlı etimad və beynəlxalq prinsiplərə hörmət əsasında danışıqlara girsinlər – üstünlük və hegemonluq mövqeyindən deyil. ABŞ-ın birtərəfli davranışları təkcə qlobal sülhə zərər vurmaqla kifayətlənmir, həm də regiondakı böhranların dərinləşməsinə zəmin yaradır.

Pakistan Şiə Alimlər Şurasının sədri, Höccətül-İslam vəl-Muslimin Seyyid Sacid Əli Nəqəvi, ABŞ və sionist rejimin ikili standartlara əsaslanan siyasətlərinə toxunaraq bildirib:

Qərb bir tərəfdən İranı dinc məqsədli nüvə texnologiyasına çıxışdan məhrum etməyə çalışdığı halda, digər tərəfdən sionist rejimin Pakistan kimi İslam ölkələri tərəfindən tanınmasını istəyir. Bu açıq-aşkar ziddiyyət, özlərini demokratiya və insan hüquqlarının müdafiəçisi kimi təqdim edənlərin əsl simasını dünya ictimaiyyətinə nümayiş etdirmişdir.

O, eyni zamanda ABŞ-ın işğalçı sionist rejimə qeydsiz-şərtsiz dəstəyinin dağıdıcı təsirinə diqqət çəkərək vurğulayıb:

Bu siyasətlər regionda bir çox gərginlik və müharibələrin əsas səbəbidir. Onların davamı isə dünyanı daha genişmiqyaslı toqquşmaların astanasına gətirib çıxara bilər.

Höccətül-İslam vəl-Muslimin Seyyid Sacid Əli Nəqəvi sonda ümid etdiyini bildirib ki:

İran ilə ABŞ arasında aparılan danışıqlar düşmənçilik dolu təbliğatın sonlanmasına, İranın müstəqillik mövqeyinin güclənməsinə və regionda, eləcə də dünyada davamlı sülh və sabitliyin bərqərar olunması istiqamətində mühüm bir addıma çevriləcəkdir.