Hövzə Xəbər Agentliyinin paytaxt Tehran üzrə müxbirinin verdiyi məlumata görə, sionist rejimin İran xalqına qarşı həyata keçirdiyi 12 günlük təcavüzkar hücumlarında şəhid olanların qırxıncı günü münasibətilə bu gün İmam Xomeyni (r) Hüseyniyyəsində İslam İnqilabının Ali Rəhbərinin təşəbbüsü ilə şəhidlərin xatirəsinə həsr olunmuş anım mərasimi keçirilib. Mərasimdə şəhid ailələri, cəmiyyətin müxtəlif təbəqələrindən olan insanlar, eləcə də bir sıra dövlət rəsmiləri iştirak ediblər.

Mərasimdə çıxış edən İslam İnqilabının Ali Rəhbəri Seyyid Əli Xamenei bu müharibəni İran İslam Respublikasının iradə və gücünün təzahürü kimi qiymətləndirərək bu hadisənin ölkənin misilsiz və möhkəm dayanıqlığını dünyaya nümayiş etdirdiyini vurğulayıb. O, düşmənçiliyin əsas səbəbinin İran xalqının imanı, elmi və birliyi ilə bağlı olduğunu qeyd edərək bildirib: Xalqımız, Allah-Təalanın inayəti ilə imanını gücləndirmək və müxtəlif elmləri inkişaf etdirmək yolundan əsla dönməyəcək və düşmənin gözləri qarşısında İranı tərəqqi və inkişafın ən yüksək zirvəsinə çatdırmağa müvəffəq olacaq.

Ayətullah Xamenei son müharibədə şəhid olan hərbi komandirlərin, elm adamlarının və əziz vətəndaşların ailələrinə bir daha başsağlığı verərək əlavə edib: İran xalqı bu 12 günlük müharibə ərzində yalnız böyük qürur və şərəfə nail olmaqla kifayətlənmədi, eyni zamanda öz gücünü, dözümünü, əzmini və mütəşəkkil imkanlarını bütün dünyaya göstərdi. Elə bir mərhələyə çatdıq ki, İslam Respublikasının gücü bütün dünya gördü.

Ali Rəhbər bu son hadisədə İran İslam Respublikasının sarsılmaz əsaslarının təcəssümünü ölkənin mühüm nailiyyətlərindən biri kimi qeyd edərək deyib: Bu kimi hadisələr bizim üçün yeni bir hadisə deyil. İran İslam Respublikası son 46 il ərzində səkkiz illik müharibə ilə yanaşı, dəfələrlə çevriliş cəhdləri, hərbi, siyasi və təhlükəsizlik yönümlü iğtişaşlar, habelə zəif iradəli şəxslərin xalqla üz-üzə qoyulması kimi fitnələrlə qarşılaşıb və bütün bu təxribatları uğurla zərərsizləşdirib.

Sonda Ayətullah Xamenei, İran İslam Respublikasının əsaslarının “din” və “elm” üzərində qurulduğunu vurğulayıb və qeyd edib: İran xalqı və gəncləri bu iki sütuna arxalanaraq düşməni müxtəlif sahələrdə geri çəkilməyə məcbur ediblər və bundan sonra da eyni iradə və qətiyyətlə yollarına davam edəcəklər.

Ayətullah üzma Xamenei çıxışında qlobal istikbarın xüsusilə cinayətkar Amerika hökumətinin İran İslam Respublikasına qarşı düşmənçiliyinin əsas səbəbinin, İran xalqının din, elm, Qurani-Kərim və İslam bayrağı altında olan birlik və vəhdətin olduğunu vurğulayaraq deyib: Onların nüvə proqramı, uranın zənginləşdirilməsi və insan hüquqları kimi məsələləri gündəmə gətirmələri sadəcə bəhanədir. Əslində isə onları narahat edən məsələ, yeni bir fikrin meydana çıxması və İran İslam Respublikasının müxtəlif elmi, humanitar, texniki və dini sahələrdə nümayiş etdirdiyi bacarıqlardır.

Ayətullah Xamenei sözlərinin davamında bildirdi: İran xalqı, Allahın lütfü ilə nə dinindən keçəcək nə də elmini kənara qoyacaq. Biz dinin möhkəmləndirilməsi və müxtəlif elmlərin inkişafı və genişləndirilməsi yolunda daha böyük addımlar atacağıq və düşmənin gözləri qarşısında ölkəmizi tərəqqi və inkişafın zirvəsinə çatdıracağıq.

Mərasimdə Quran qairləri Qurani-Kərimin bir neçə müqəddəs ayələrini tilavət etdilər. Daha sonra Höccətül-İslam doktor Rəfii çıxış edərək Nəhcül-Bəlağənin 182-ci xütbəsinə istinadla Siffeyn döyüşünün şəhidlərinin xüsusiyyətlərini xatırlatdı və bu xüsusiyyətləri sionist rejimin son 12 günlük təcavüzündə şəhid olanların onlar ilə eyni ruhda olduğunu bildirdi.

O, şəhidlərin səciyyəvi xüsusiyyətlərini belə sadaladı:

haqq yolunda sabitqədəm olmaq,

haqqın ətrafında hərəkət etmək,

Qurani-Kərim tilavət etmək və ona uyğun əməl etmək,

vacibatları yerinə yetirmək,

İlahi sünnətləri həyata keçirmək 

Bidətlərə qarşı mübarizə aparmaq,

Cihad zamanı o yolda iştirak etmək,

Rəhbərliyə itaət etmək.

Höccətül-İslam doktor Rəfii qeyd etdi: Qurani-Kərimin açıq-aşkar ayələrinə əsasən, iman və təvəkkül Allahın yardımının iki əsas amilidir və bu iki mühüm ünsür son 12 günlük təcavüzkar müharibədə də bariz şəkildə müşahidə olundu və İran xalqının müqavimət və qələbəsinə zəmin yaratdı. Mərasimdə həmçinin cənab Məhəmməd Rza Bəzri, sionist düşmənə qarşı qəhrəmancasına şəhid olanların igidliyini tərənnüm edən şeirlər səsləndirdi və Əhli-Beyt (ə) müsibətləri ilə bağlı mərsiyə oxudu.