Hövzə Xəbər Agentliyinin beynəlxalq xidmətinin məlumatına görə, Bağdadın cümə imamı və Müqəddəs Nəcəf şəhərinin Elmi Hövzəsinin tanınmış alimlərindən biri olan Ayətullah Seyid Yasin Musəvi, bu həftəki cümə xütbəsində İraqdakı seçki prosesi və ümumi siyasi vəziyyəti sərt şəkildə tənqid edib. O vurğulayıb ki, ölkə artıq 22 ildir “zahiri demokratiya” şəraitində fəaliyyət göstərir. Ayətullah Musəvi xalqı qarşıdan gələn seçkilərdə tam şüurlu və məsuliyyətli şəkildə iştirak etməyə, həmçinin seçiləcək nümayəndələri “xalqın vəkili”, yoxsa “onların üzərində hökmranlıq edən şəxs” kimi davranmağa məcbur etməyə çağırıb.

Bağdadın cümə imamı yaxınlaşan seçkilərə toxunaraq deyib: Bu gün biz yeni bir seçki mərhələsinin astanasındayıq bu isə düşüncə və dərin təhlil tələb edən mühüm bir mərhələdir.

O əlavə edib: Bu gün əsas problem artıq seçkilərdə iştirak etmək və ya etməmək məsələsi deyil. Əsas məsələ kimi seçdiyimiz və nəyə əsasən seçdiyimizdir.

Ayətullah Musəvi İraqda son iyirmi ildən artıq müddətdə keçirilən seçkilərin təcrübəsini xatırladaraq qeyd edib: Bu seçkilər bizə pərdəarxası reallıqları, işlərin əslində necə idarə olunduğunu göstərdi.

O, bir sıra əsas suallar irəli sürüb: Ümumiyyətlə, seçkilərin keçirilməsinin məqsədi nə idi? Onlardan nə gözlənilirdi? Və seçilən şəxsin dəqiq rolu nədən ibarətdir?

Ayətullah Musəvi izah edib ki, seçici ilə seçilən arasında münasibət aydın və konkret bir “vəkalət əlaqəsi” üzərində qurulmalıdır: Seçici birinə səs verdikdə, əslində onu parlamentdə öz vəkili kimi təyin edir ki, xalqın iradəsini və tələblərini təmsil etsin. Bu, ona xalq adından hökmranlıq etmək və ya özbaşına qərar vermək səlahiyyəti qazandırmır.

Bağdadın cümə imamı Ayətullah Seyid Yasin Musəvi öz xütbəsində kəskin şəkildə “qapalı qapılar arxasında qəbul edilən qərarları” tənqid edib. O bildirib: Bu illər ərzində bizdən heç kimə baş nazirin, prezidentin və ya nazirlərin təyin olunması zamanı rəy soruşulubmu? Qərarlar həmişə partiyaların və fraksiya rəhbərlərinin istəklərinə əsaslanıb, xalqın iradəsinə yox.

Ayətullah Musəvi bu vəziyyəti “demokratiya deyil, demokratiya adı altında hökm sürən diktatura” kimi qiymətləndirib və qeyd edib ki, İraq bu illər ərzində partiya hakimiyyətindən fərdi və tayfa idarəçiliyinə qədər müxtəlif idarəçilik formalarını təcrübədən keçirib. Lakin bütün bu hallarda xalq iradəsinin olmaması ortaq cəhət olub.

O, gələcək parlament üzvlərinə müraciət edərək məsuliyyətlərini dərindən dərk etməyə çağırıb: Təkcə ‘bu namizəd yaxşı insandır’ deməklə və ya ‘filan şəxs onu dəstəkləyib’ deyə qəbul etməklə kifayətlənmək olmaz. Namizədlər üçün konkret meyarlar müəyyən edilməli və bu meyarlara əsasən onlardan hesabat tələb olunmalıdır. Yalnız bu yolla inzibati, maliyyə və mənəvi korrupsiyanın qarşısını almaq mümkündür.

Ayətullah Musəvi həmçinin vurğulayıb ki, konstitusiyanın tam şəkildə icrası, gerçək demokratik sistemin qurulması istiqamətində atılmalı birinci addımdır: Ali dini rəhbərlik konstitusiyanın qəbul olunduğu vaxtdan bəri onun bəzi maddələrinə dair iradlarını bildirmişdi, lakin gələcəkdə islahat aparılacağı ümidi ilə onu qəbul etmişdi. Təəssüf ki, bu günə qədər heç bir ciddi islahat həyata keçirilməyib. Əgər konstitusiya tam şəkildə tətbiq olunsaydı, korrupsiya və geriliklə bağlı problemlərin 80–85 faizi aradan qalxardı.

Xütbənin digər hissəsində Ayətullah Musəvi namizədlərin şəxsi münasibətlər və ya reklam kampaniyaları əsasında seçilməsi meylini də tənqid edib: Bəzi siyasətçilər elə düşünürlər ki, şəkillərinin hansısa namizədin afişasında yer alması ona populyarlıq qazandıracaq. Halbuki bu, əks effekt yaradır çünki bir çox seçicilər etimadını itirmiş simalarla əlaqəli namizədlərdən uzaq dururlar.

O, çıxışının sonunda aydın və real seçki proqramlarının təqdim edilməsinin zəruriliyini vurğulayıb: Namizədlər yalnız ‘dəyişiklik siyahısı’ kimi ümumi şüarlarla kifayətlənməməlidirlər. Onlar işsizlik, elektrik enerjisi, su təchizatı, kənd təsərrüfatı, sənaye və infrastruktur sahələrində dəqiq və şəffaf proqramlar təqdim etməlidirlər.