Höccətül-İslam vəl-müslimin Məhəmmədhadi Hidayət Hövzə Xəbər Agentliyinin müxbiri ilə söhbətində belə bildirib: Uca Allah “Ənkəbut” surəsinin 67-ci ayəsində buyurur:
 «أَوَلَمْ یَرَوْا أَنَّا جَعَلْنَا حَرَماً آمِناً»
 Məgər onlar üçün müqəddəs, təhlükəsiz bir yer etdiyimizi görmürlərmi?
Məkkə Mükərəmə Allahın əmin-amanlıq hərəmidir, lakin rəvayətlərə əsasən başqa şəhərlər də bu hərəmə qoşulmuşdur. “Biharül-ənvar” kitabında “Allah tərəfindən tərif olunmuş şəhərlər” adlı bir qapı mövcuddur ki, orada ilk müqəddəs şəhər kimi Qum zikr olunmuşdur.

Qum – Əhli-Beytin (ə) əmin-amanlıq hərəmi

O, belə bəyan edib ki, Qum Həzrət Fatimeyi-Zəhranın (s.ə) övladlarının sığınacağı və şiəliyin mərkəzidir. İmam Sadiq (ə) buyurub:
«اِنَّ لِلّهِ حَرَما وَ هُوَ مَکَّةُ، وَ لِرَسُولِهِ حَرَما وَ هُوَ الْمَدینَةُ، وَ لاَِمیرِ الْمُؤمِنینَ حَرَما وَ هُوَ الکُوفَةُ، وَ لَنا حَرَما وَ هُوَ قُم، وَ سَتُدْفَنُ فیها امْرَأةٌ مِنْ وُلْدی تُسَّمی فاطِمةُ، مَنْ زارَها وَ جَبَتْ لَهُ الجَنَّةُ».
«Həqiqətən Allahın bir hərəmi vardır ki, o Məkkədir. Peyğəmbərin də hərəmi vardır ki, o Mədinədir. Əmirəl-mömininin də hərəmi vardır ki, o Kufədir. Bizim də bir hərəmimiz vardır ki, o Qumdur. Yaxında mənim övladlarımdan bir xanım orada dəfn ediləcək, adı Fatimə olacaq. Hər kəs onu ziyarət etsə, cənnət ona vacib olar.»

Höccətül-İslam vəl-müslimin Hidayət əlavə edib: İmam Sadiq (ə) xəbər vermişdir ki, gələcəkdə onun övladlarından biri – «Fatimə» adlı bir qız Qum şəhərində dəfn olunacaq. Ayətullah Cavadi Amulinin sözlərinə görə, bu rəvayətlər göstərir ki, Həzrət Məsumə (s.ə) elə bir vəd olunmuş şəxsiyyət idi ki, Əhli-beyt (ə) onun Qumda dəfn ediləcəyini xəbər vermişdilər və onun mövcudluğu bu şəhərə əmin-amanlıq və müqəddəslik bəxş etdi.

İmamzadələr arasında Həzrət Məsumənin (s.ə) xüsusi mövqeyi

Hövzə ustadı qeyd edib: Ölkəmizdə 6150 imamzadə mövcuddur ki, onlardan 400 nəfəri – İmam Musa ibn Cəfərin (ə) övladları yalnız Qum şəhərində dəfn olunublar. Bütün imamzadələr arasında yalnız üç imamzadənin ziyarətnaməsi daha çox təkid olunmuşdur. Həzrət Əbülfəzl Abbas (ə), Həzrət Əli Əkbər (ə) və Həzrət Fatimeyi-Məsumə (s.ə).

O əlavə edib: İmam Rza (ə) Səd Əşərinin sualına cavab olaraq buyurmuşdur:
 «لَنا عِندَکُم قَبر» 
“Sizin aranızda bizdən bir qəbir vardır ki, bizim varlığımızdan bir parça oradadır.” Bu qəbir Həzrət Məsumənin (s.ə) məzarıdır ki, Əhli-beytin (ə) hərəmi sayılır.

Həzrət Məsumənin (s.ə) əsas möcüzəsi: Qumu elm və şiə mərkəzinə çevirməsi

Höccətül-İslam vəl-müslimin Hidayət Ayətullah Cavadi Amulinin sözlərinə istinad edərək bildirib: Həzrət Fatimeyi-Məsumənin (s.ə) kəraməti yalnız xəstələrə şifa vermək və ehtiyacları təmin etməklə məhdudlaşmır. Onun əsas möcüzəsi odur ki, Qum adlı səhranı alimlərin yetişdiyi və İslamın təbliğ olunduğu bir mərkəzə çevirdi.

O əlavə edib: Qumda formalaşmış dərslər, təfsirlər və İslam elmlərinin hamısı Həzrət Fatimeyi-Məsumənin (s.ə) mövcudluğunun bəhrəsidir; bunlara Ayətullah Cavadi Amulinin “Təsnim” təfsiri də daxildir ki, bu da Həzrət Məsumənin (s.ə) hərəminin ətrafındakı elmi mühitin nəticəsidir.

Həzrət Fatimeyi-Məsumə (s.ə) – İmam Zamanın (ə.f) yardımında nümunə modeli

İlahiyyatçı vurğulayıb: Həzrət Fatimeyi-Məsumənin (s.ə) əzəməti bir sözdə cəmlənir: «Mövcud İmama yardım». O, İmam Rzanı (ə) sevgi ilə dəstəkləyərək Məddinədən Tusa yola düşdü və yol boyu şəhadətə yetdi. Qumda 17 gün ərzində Həzrət Fatimeyi-Məsumə (s.ə) Əhli-beytin (ə) maariflərini tədris edib təbliğ etdi və şiələri tərbiyə etdi.

Həzrət Fatimeyi-Məsumənin (s.ə) bənzərsiz kəraməti və hörməti

Höccətül-İslam vəl-müslimin Hidayət, Həzrət Fatimeyi-Məsumənin (s.ə) yüksək məqamına istinad edərək bildirib: Qum sakinləri həmişə bu möhtərəm xanımın şəhərlərində olmasından qürur duyublar. Həzrət Fatimeyi-Məsuməyə (s.ə) göstərilən xüsusi hörmət onun İmamın qızı, İmamın bacısı kimi mövqeyindən qaynaqlanırdı.

O, tarixi bir müqayisəyə istinad edərək əlavə edib: Həzrət Zeynəb Kubrada (s.ə) eyni mövqeyə sahib idi, lakin Şamda çox böyük müsibətlərlə üzləşdilər; bu müsibət Əhli-beytin (ə) qəlbini qan etmişdi.

Höccətül-İslam vəl-müslimin Hidayət sonda bildirib: Həzrət Fatimeyi Məsumənin (s.ə) hərəmi yalnız müqəddəs bir məkan deyil, eyni zamanda İslam yolunda alimlərin və mücahidlərin yetişdirildiyi bir məktəbdir. Tarix boyu bütün böyük hövzə alimləri bir mənada Həzrət Fatimeyi-Məsumənin (s.ə) tərbiyə şagirdləri sayılır və bu bərəkət bu günə qədər davam edir.

Xəbərin sonu