İslam İnqilabı Keşikçiləri Korpusunun ABŞ xalqına müraciətinin məzmunu
Bağışlayan və mehriban Allahın adı ilə
إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنْفُسِهِمْ ۗ
Şübhəsiz ki, bir qövm özlərində olanı (pis xüsusiyyətləri) dəyişməyincə, Allah onlarda olanı (yaxşı xüsusiyyətlərlə) dəyişməz.
Rəd surəsi, 11-ci ayə
Amerika xalqına müraciət
Amerika Birləşmiş Ştatlarının xalqına, o cümlədən alim, tələbə və media nümayəndələrinə ünvanlanan müraciətdə peyğəmbərlərə salam göndərilir, İranla ABŞ arasında baş vermiş müharibənin səbəbləri və nəticələri barədə ətraflı bəhs olunur.
Müraciətdə bildirilir ki, yeddi ay əvvəl ABŞ ordusu beynəlxalq hüququ pozaraq Minab şəhərindəki ibtidai məktəbə hücum edib və 168 məktəbli uşağın ölümünə səbəb olub. Eyni zamanda, İslam İnqilabının Ali Məqamlı Rəhbəri şəhid Seyid Əli Xameneinin iş otağına hücum edilərək onun və ailə üzvlərinin, o cümlədən 14 aylıq nəvəsinin şəhid edildiyi bildirilir. Müharibə nəticəsində 3600-dən çox insanın, o cümlədən 400 uşağın şəhid olduğu, universitet, xəstəxana və məktəblərin bombalandığı qeyd edilir. Müraciətdə vurğulanır ki, bütün bu hücumlara baxmayaraq, ABŞ və İsrail İran İslam Respublikası qarşısında ağır məğlubiyyətə uğrayıblar.
Məktub müəllifləri ABŞ xalqına müraciətlə bildirirlər ki, müharibələrin əsas maliyyə yükünü amerikalı vergi ödəyiciləri daşıyır və buna görə də onlar hökumətlərinin apardığı siyasətin real nəticələrindən xəbərdar olmalıdırlar. Bu çərçivədə bir sıra əsas suallar irəli sürülür. ABŞ ordusu bütün hərbi üstünlüyünə baxmayaraq, nə üçün İranla müharibədə məqsədlərinə nail ola bilmədi? İran xalqı ABŞ xalqına düşməndirmi? «Amerikaya ölüm» şüarının əsl mənası nədir? ABŞ-in İran üzərində hökmranlığını bərpa etmək cəhdləri nə üçün nəticəsiz qalıb və bu siyasətin davamı ABŞ-ni hara aparacaq?
Müraciətdə amerikalılara İranın müxtəlif bölgələrinə səfər etmək və irəli sürülən iddiaları yerində araşdırmaq çağırışı da edilir.
İranın ABŞ təcavüzü ilə qarşıdurmada qələbəsinin amilləri
Müraciətdə bildirilir ki, müharibədə qələbənin əsas meyarı tərəflərin qarşıya qoyduqları məqsədlərə nail olub-olmamasıdır. ABŞ və İsrail əvvəlcə İran İslam Respublikası quruluşunu dəyişdirmək və İranı parçalamaq məqsədini açıqlasalar da buna nail olmadıqdan sonra yeni hədəflər müəyyənləşdiriblər.
Bu məqsədlər sırasında İranın təslim olması, Xark adasının və İran neftinin nəzarətə götürülməsi, quru sərhəd vasitəsilə hücumun həyata keçirilməsi, sənaye və enerji infrastrukturunun məhv edilməsi, İranın nüvə sənayesinin, raket və pilotsuz uçuş aparatı potensialının sıradan çıxarılması, ölkə səmasının nəzarətə götürülməsi və İranın İslam müqavimətinə dəstəyinə son qoyulması kimi hədəflər sadalanır.
Məktubda qeyd olunur ki, ABŞ və İsrail minlərlə bomba və raketdən istifadə etmələrinə baxmayaraq, elan etdikləri əsas məqsədlərə nail ola bilməyiblər. Müəlliflərin fikrincə, müharibənin əsas məqsədlərindən biri də İsrailin Fələstində törətdiyi cinayətlərin dünya ictimaiyyətinin diqqətindən yayındırılması olub, lakin bu məqsəd də reallaşmayıb.
İranın qələbəsinin göstəriciləri
İranın qələbəsi yalnız ABŞ və İsrailin qarşıya qoyduqları məqsədlərə nail olmasına mane olmaqdan ibarət deyil. Müraciətdə əsas nəticələrdən biri kimi ABŞ ordusunun hərbi hegemonluğunun sarsılması və onun fövqəldövlət kimi hərbi nüfuzunun zəifləməsi göstərilir.
Məktubda bildirilir ki, 200-dən çox strateji pilotsuz uçuş aparatı, 12 yanacaqdoldurma və nəqliyyat təyyarəsi, 30 qırıcı təyyarə, ən azı bir AWACS təyyarəsi, çoxsaylı helikopter, radar və hava hücumundan müdafiə sistemi, habelə ABŞ hərbi bazalarına aid yüzlərlə qurğu və infrastruktur məhv edilib, regiondakı ABŞ bazalarının əməliyyat imkanları ciddi şəkildə zəiflədilib.
Müraciətdə İranın qələbəsinin aşağıdakı strateji nəticələri də vurğulanır:
1. ABŞ-in İran xalqına qarşı uzun illər apardığı psixoloji müharibənin nəticəsiz qaldığı və milli-mənəvi birliyin daha da gücləndiyi bildirilir.
2. ABŞ-ə qarşı aparılan media müharibəsinin İran xalqının mövqeyinə təsir etmədiyi, əksinə İranın beynəlxalq mövqeyinin möhkəmləndiyi qeyd olunur.
3. İran xalqının milli birliyinin, eləcə də müxtəlif etnik qrupların vahid milli kimlik ətrafında birliyinin gücləndiyi vurğulanır.
4. İranın Hörmüz boğazında əməliyyat imkanlarının artdığı və ABŞ donanmasının geri çəkildiyi bildirilir.
5. İranın raket və pilotsuz uçuş aparatı imkanlarının məhv edilmədiyi, əksinə istehsalın davam etdiyi qeyd olunur.
6. İranın hava hücumundan müdafiə imkanlarının müharibə boyunca gücləndiyi vurğulanır.
7. ABŞ-in regiondakı hərbi bazalarının fəaliyyət imkanlarının ciddi şəkildə zəiflədiyi bildirilir.
8. İranın İslam müqavimətinə dəstəyinin daha da gücləndiyi qeyd olunur.
9. İran sivilizasiyasının məhv edilmədiyi, əksinə onun beynəlxalq nüfuzunun artdığı vurğulanır.
10. İranın qələbəsinin dünya xalqlarında özünüdərk və özünəinamın güclənməsinə səbəb olduğu bildirilir.
11. ABŞ-in Hörmüz boğazında tətbiq etdiyi məhdudiyyətlərin İranın daxili istehsalını və qonşu ölkələrlə iqtisadi əlaqələrini gücləndirdiyi qeyd olunur.
12. Ayətullah Seyid Əli Xameneinin şəhid edilməsinin vilayəti-fəqih sisteminin mahiyyətini dünya ictimaiyyətinə daha aydın göstərdiyi iddia olunur.
Məktubda vilayəti-fəqih sistemi xalqla hakimiyyət arasında qarşılıqlı məhəbbət və etimad, güclü dövlətlər qarşısında müqavimət göstərmək, dünya xalqlarının qəlblərini qazanmaq, ağır sanksiyalara baxmayaraq iqtisadi və elmi inkişafı davam etdirmək, habelə rəhbərin şəxsi maddi imtiyazlardan uzaq olması kimi xüsusiyyətlərlə xarakterizə edilir.
İranın qələbəsinin əsas səbəbi
Məktubda vurğulanır ki, İranın qələbəsinin əsas səbəbi yalnız raket və pilotsuz uçuş aparatları deyil. Qələbənin üç əsas amili kimi Qurani-Kərim əsas götürülərək, bu məktəb ətrafında xalqın iman və birliyi, habelə ilahi rəhbərliyi göstərilir.
İran İslam İnqilabının təməlində səmimiyyət, azadlıq, hüquq bərabərliyi, sosial ədalət, insanların hüquqlarına hörmət, xeyirxahlıq və insanlıq ideallarına üstünlük verilməsi dayanır. Məktubda bildirilir ki, Quran insanları bir-birinə qarşı qardaş və bacı, bütün insanları isə Allahın bəndələri hesab edir. İrq, rəng və mənşə insanın üstünlüyünün meyarı ola bilməz.
Məktubda İran xalqının müqavimətinin mənəvi kökləri Aşura hadisəsi və İmam Hüseynin (ə) nümunəsi ilə izah edilir. İmam Hüseynin (ə), həzrət Əli Əsğərin (ə), həzrət Əbəlfəzin (ə) və həzrət Zeynəbin (s.ə) fədakarlığı, səbir və müqaviməti İran xalqının zülmə boyun əyməməsinin mənəvi örnəkləri kimi təqdim olunur.
Müdrik və uzaqgörən rəhbər
Məktubda İranın qələbəsinin digər mühüm amili kimi vilayəti-fəqih sisteminə əsaslanan rəhbərlik göstərilir. İran konstitusiyasına əsasən, Ali Məqamlı Rəhbər və Silahlı Qüvvələrin Ali Baş Komandanı vəliyyi-fəqihdir və onun beş əsas xüsusiyyətə malik olması tələb edilir: Elm, təqva, şücaət və dövrün məsələlərindən xəbərdar olmaq.
Məktubda Ayətullah Müctəba Xamenei bu xüsusiyyətlərə malik rəhbər kimi təqdim olunur. Həmçinin şəhid Ayətullah Seyid Əli Xameneinin 37 illik rəhbərliyi, xalq arasında nüfuzu və milyonlarla insanın onun dəfn mərasimində iştirakı xüsusi vurğulanır.
ABŞ və İsrailin məğlubiyyətinin səbəbləri
Müraciətdə ABŞ ordusunun böyük texnologiya, silah və texnika üstünlüyünə baxmayaraq məğlubiyyətinin əsas səbəbi kimi müdrik və uzaqgörən rəhbərin olmaması göstərilir. Məktub müəlliflərinin fikrincə, uzun illər ərzində Vyetnam, Əfqanıstan, İraq, Yəmən və digər müharibələrdə ABŞ ordusunun uğursuzluğu onun məqsəd və ideal böhranını göstərir.
Məktubda ABŞ rəhbərliyinin şəxsi və maliyyə maraqlarını milli maraqlardan üstün tutduğu iddia edilir. Bunun əksinə olaraq, İranın rəhbərlik modelində elm, hikmət, dürüstlük, paklıq, təqva, şücaət və dövrümüzdə baş vermiş məsələləri düzgün təhlil etmək əsas meyarlar kimi təqdim olunur.
Müraciətdə həmçinin Allahın bütün imkanlardan üstün qüdrət sahibi olduğu və haqqın tərəfində olanların sonda qalib gələcəyi vurğulanır.
İran xalqı ABŞ xalqına düşməndirmi?
Məktubda bildirilir ki, İran xalqı ABŞ xalqına düşmən deyil. Əksinə, hər iki xalqın Ağ Ev siyasətindən müxtəlif formalarda zərər çəkdiyi iddia olunur. «Amerikaya ölüm» şüarının ABŞ xalqına deyil, məhz ABŞ-in zalım hakimiyyətinə və onun siyasətinə qarşı yönəldiyi xüsusi vurğulanır.
Məktub müəllifləri ABŞ hakimiyyətini İsrailin maraqlarını ABŞ xalqının maraqlarından üstün tutmaqda, müharibələrə milyardlarla dollar xərcləməkdə və bunun nəticəsində ölkədə yoxsulluq və sosial problemlərin dərinləşməsinə səbəb olmaqda ittiham edirlər.
İran xalqına qarşı 73 illik zülm və qarşıdurma
Məktubda 2026-cı il 28 fevralda başlayan müharibə ABŞ-in İranla qarşıdurmasının başlanğıcı deyil, 1953-cü ildən davam edən uzunmüddətli siyasətin yeni mərhələsi kimi təqdim edilir.
1953-cü il çevrilişi, şah rejiminin dəstəklənməsi, SAVAK-ın yaradılması, İranın sərvətlərinin istismarı, İnqilabdan sonra çevriliş cəhdləri, terror aktları, İran-İraq müharibəsində Səddamın dəstəklənməsi, İran sərnişin təyyarəsinin vurulması, iqtisadi sanksiyalar, media və koqnitiv müharibə, İŞİD-in yaradılması və general Qasim Süleymaninin öldürülməsi ABŞ-in İran xalqına qarşı siyasətinin əsas nümunələri kimi sadalanır.
Məktubda həmçinin Əfqanıstanın işğalı, terrorçu qrupların fəaliyyəti, dərman sanksiyaları və digər təzyiq vasitələrinin İran xalqına qarşı siyasətin tərkib hissəsi olduğu bildirilir.
2025-ci ilin iyununda baş vermiş 12 günlük müharibənin də ABŞ və sionist rejimin məğlubiyyəti ilə başa çatdığı, 2026-cı ilin yanvarında baş verən iğtişaşların isə xalqın birliyi və təhlükəsizlik qüvvələrinin fəaliyyəti nəticəsində nəticəsiz qaldığı iddia edilir. Məktubda 2026-cı il 28 fevralda başlayan yeni müharibənin də ABŞ üçün məğlubiyyətlə nəticələnəcəyi bildirilir.
İnqilab Keşikçiləri Korpusunun terrorizmlə əlaqəsi
Məktubda terrorizm və insan hüquqları anlayışlarının siyasi məqsədlərlə manipulyasiya edildiyi iddia olunur. İnqilab Keşikçiləri Korpusunun isə İran İnqilabından sonra konstitusiyaya əsasən xalq tərəfindən yaradılmış, inqilabı, ölkənin müstəqilliyini və təhlükəsizliyini qorumaq məqsədi daşıyan qurum olduğu bildirilir.
Məktub müəllifləri ABŞ və bəzi Avropa dövlətlərinin İnqilab Keşikçiləri Korpusunu terrorçu adlandırmasını onun ABŞ və müttəfiqlərinin İrana qarşı həyata keçirdiyi çevriliş, terror, müharibə və digər planların qarşısında dayanması ilə əlaqələndirirlər. Korpusun terrorizmlə mübarizədə dünyanın ən böyük və uğurlu qurumlarından biri olduğu iddia edilir.
ABŞ hökuməti nə üçün tənəzzülə doğru gedir?
Məktubda zülm, yalan, korrupsiya, mənəvi dəyərlərin zəifləməsi, əsas məsələlərdən uzaqlaşmaq və yanlış qərarlar tarixi imperiyaların süqutunun əsas əlamətləri kimi təqdim edilir və bu xüsusiyyətlərin müasir ABŞ hakimiyyətində də mövcud olduğu bildirilir.
ABŞ-in müxtəlif ölkələrdə hərbi müdaxilələri, çevrilişlərə dəstəyi və müharibələri sadalanır. Xüsusilə Fələstindəki vəziyyətə diqqət çəkilir və Qəzzada çoxsaylı insanların, o cümlədən uşaqların öldürülməsi, ev, məktəb və universitetlərin dağıdılması ABŞ-in İsrailə dəstəyi ilə əlaqələndirilir. ABŞ hərbçisi Aron Buşnellin də Qəzzadakı hadisələrə etiraz olaraq özünü yandırdığı xatırladılır.
Yalan və yanlış siyasət
Məktubda Ağ Evin Əfqanıstan, İraq və İranın nüvə proqramı barədə dünyaya yanlış məlumatlar verdiyi iddia olunur. İranın nüvə bombası hazırladığı barədə uzun illər davam edən ittihamlar nümunə kimi göstərilir və Bərcam sazişinin mövcudluğuna baxmayaraq ABŞ-in bu sazişdən çıxması tənqid edilir.
Məktubda həmçinin ABŞ prezidentlərinin müharibələrə son qoymaq, Vaşinqtondakı korrupsiyanı aradan qaldırmaq və ölkə iqtisadiyyatını yaxşılaşdırmaq barədə vədlərinin həyata keçirilmədiyi iddia olunur.
İkinci dərəcəli məsələlər və nəticəsiz müharibələr
Məktub müəllifləri ABŞ rəhbərliyini əsas sosial və iqtisadi problemlər əvəzinə ikinci dərəcəli məsələlərlə məşğul olmaqda ittiham edirlər. Əfqanıstan və İraq müharibələri bunun nümunəsi kimi göstərilir.
Əfqanıstanda 20 il davam edən müharibəyə 3 trilyon dollar xərcləndiyi, minlərlə insanın öldüyü və nəticədə ABŞ ordusunun ölkədən geri çəkildiyi bildirilir. İraqda isə 8 il 8 ay davam edən müharibənin milyardlarla dollar xərcə və böyük insan itkilərinə səbəb olduğu, nəticədə ABŞ ordusunun ölkədən çıxmasının tələb edildiyi qeyd olunur.
Məktubda bu müharibələrin ABŞ iqtisadiyyatına da ağır zərbə vurduğu, ölkənin dünya ÜDM-indəki payının azaldığı, dövlət borcunun artdığı, yoxsulluğun və evsizliyin genişləndiyi bildirilir.
ABŞ xalqının süqutdan xilas olması üçün çıxış yolu
Məktubda ABŞ xalqına müraciətlə bildirilir ki, ölkənin taleyini dəyişmək üçün ilk növbədə hakimiyyətin siyasətində dəyişiklik edilməlidir.
Quranda Allah buyurur:
إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنْفُسِهِمْ ۗ
Şübhəsiz ki, bir qövm özlərində olanı (pis xüsusiyyətləri) dəyişməyincə, Allah onlarda olanı (yaxşı xüsusiyyətlərlə) dəyişməz.
Rəd surəsi, 11-ci ayə
Məktubda ABŞ xalqının, xüsusilə gənclərin Fələstin məsələsində etirazlarının vicdanın oyandığını göstərdiyi bildirilir. Tələbə və professorların elmi fəaliyyətlərinin müdafiəsiz qadın və uşaqların öldürülməsində istifadə edilməsinə etiraz etməsi müsbət hal kimi təqdim olunur.
ABŞ xalqına digər ölkələrin işğalına, çevrilişlərə, diktatorlara dəstəyə, hərbi müdaxilələrə və sərvətlərin talanmasına imkan verməmək çağırışı edilir. ABŞ-in xaricdəki çoxsaylı hərbi bazalarını bağlaması, İsrailə yardımlara son qoyması, mənasız müharibələrdən və çevrilişlərdən imtina etməsi, hərbi və kəşfiyyat xərclərinin elm, istehsal və xidmət sahələrinə yönəldilməsi iqtisadiyyatın dirçəldilməsi üçün çıxış yolu kimi göstərilir.
Məktubda bütün dinlərdə və mənəvi məktəblərdə mövcud olduğu bildirilən ümumbəşəri prinsip də xatırladılır:
Özün üçün bəyənmədiyini başqaları üçün də bəyənmə.
İncil kitabında da eyni məzmunlu fikirlər gətirilərək ABŞ xalqına Fələstin və Livandakı hadisələrə öz vicdanı ilə yanaşmaq çağırışı edilir.
Məktub müəllifləri ABŞ xalqının «əlimizdən heç nə gəlmir» bəhanəsini qəbul etmir və bildirirlər ki, hakimiyyəti formalaşdıran və seçkilərdə səs verən xalq öz iradəsindən istifadə etməlidir.
Bu müharibənin sonu hara gedəcək?
Məktubun sonunda bildirilir ki, ABŞ-in İrana qarşı müharibəni davam etdirməsi regional və qlobal nəticələrə səbəb ola bilər. Şəhid Ayətullah Seyid Əli Xameneinin düşmən hücum edəcəyi təqdirdə müharibənin regional xarakter alacağı barədə xəbərdarlığı xatırladılır və İran xalqının birliyinin bu proqnozu doğrultduğu bildirilir.
Məktub müəlliflərinin fikrincə, ABŞ-in zülm və təcavüz siyasətini davam etdirməsi dünya xalqlarının reaksiyasını gücləndirəcək və ABŞ-in iqtisadi və siyasi maraqlarına ciddi zərbə vura bilər.
Sonda ABŞ xalqına Fələstin işğalına dəstəyi dayandırmaq, «uşaq qatili» və korrupsiyaya uğramış hakimiyyətləri kənarlaşdırmaq, ölkəni mütəfəkkirlərə və layiqli insanlara etibar etmək çağırışı edilir.
Məktubda belə deyilir:
«Bu əsr xalqların iradəsinin üstünlük qazandığı əsrdir.»
Müəlliflər bildirirlər ki, bütün çətinliklərə baxmayaraq, bəşəriyyəti zorakılıq və hegemonluqdan azad etmək uğrunda mübarizəni davam etdirəcəklər və işğal olunmuş Fələstinin azad olunacağına inanırlar. Həmçinin həzrət Məhəmməd peyğəmbərin (s) təbliğ etdiyi İslam dininin imamı, həzrət Məhdi (ə.f) ilə birlikdə həzrət Məsihin (ə) zühur və qayıdışına ümid ifadə edilir və onların ədalətsevər məzlumların yanında dayanacağı vurğulanır.
Müraciət ABŞ xalqının gələcəkdə ədalətsevər məzlumların cəbhəsində dayanması arzusu ilə başa çatır:
«Zülm və təcavüzlərin sona çatması, bütün xalqların hegemonların əsarətindən azad olması, qardaşlıq və dünya sülhü şəraitində həyat ümidi ilə.»
وَلَقَدْ كَتَبْنَا فِي الزَّبُورِ مِنْ بَعْدِ الذِّكْرِ أَنَّ الْأَرْضَ يَرِثُهَا عِبَادِيَ الصَّالِحُونَ
Şübhəsiz ki, Zikrdən sonra Zəburda da: “Yer üzünə saleh qullarım varis olacaqdır!” - deyə yazmışdıq. (Təfsirçilərin bir qismi yuxarıdakı ayədə qeyd edilən “Zikr” kəlməsi ilə “Tövrat”ın, bir qismi isə “Lövhi-məhfuz”un nəzərdə tutulduğunu ifadə etmişlər.)
Ənbiya surəsi, 105-ci ayə
Rəyiniz