Ali Məqamlı Rəhbərin Allahın bəxş etdiyi nemətlərdən düzgün istifadə etməməyin nəticələri barədə çıxışı

Hövzə Xəbər Agentliyinin verdiyi məlumata görə, həzrət Ayətullah Seyid Müctəba Xamenei çıxışında əzabın müxtəlif yön və təzahürlərini, eləcə də Allahın bəxş etdiyi nemətlərdən düzgün istifadə etməməyin yanlış nəticələrini açıqlayıb.

Biz nemətlərdən düzgün istifadə etməli olduğumuz zaman bunu etmədik. İndi isə bunun nəticəsini dadmalıyıq!

Kafirlər oda təqdim edilərkən onlara belə deyiləcək:

«أَذْهَبْتُمْ طَیِّبَاتِکُمْ فِی حَیَاتِکُمُ الدُّنْیَا» — «Siz dünya həyatınızdakı bütün pak və xoş nemətlərinizi tükətdiniz» (Əhqaf, 20).

Yəni sizə verilən nemətləri dünya həyatınız üçün sərf etdiniz. Buna görə də indi haqq-hesab günü çatdıqda belə cəzalandırılırsınız, xüsusi bir əzabla — zillət və alçalma əzabı ilə.

Bu əzab nəyə görədir?

Burada iki məqam qeyd olunur: Birincisi, sizin təkəbbür göstərməyiniz, ikincisi isə «بِمَا کُنْتُمْ تَفْسُقُونَ» — «etdiyiniz itaətsizliklərə görə» (Əhqaf, 20).

Yəni Allahın əmr və qadağaları mövcud olduğu halda siz onlara tabe olmur, onları pozurdunuz.

Lakin «عَذَابَ الْهُونِ» — «zillət və alçalma əzabı» (Ənam, 93) ifadəsinin işlədilməsinin səbəbi budur ki, əzabın müxtəlif növləri vardır. Əzab yalnız oddan ibarət deyil. Hərçənd od barədə çoxlu təkidlər edilmişdir, lakin elə həsrətin özü də böyük bir əzabdır. Oradakı bu həsrət heç vaxt sona çatmır. Əzablardan biri də məhz bu həsrətdir.

Əzablardan biri də məzəmmət və rüsvay edilməkdir. «Duxan» surəsində belə buyurulur:

«ذُقْ إِنَّکَ أَنتَ الْعَزِیزُ الْکَرِیمُ» — «Dad! Həqiqətən, sən qüdrətli və hörmətli idin» (Duxan, 49).

Bu ifadə insanın başına ən ağır bəla və müsibətlər gətirildiyi bir vaxtda ona deyilir. Əslində, bu ifadə ilə onu məsxərəyə qoyur və məzəmmət edirlər.

Əzablardan biri də qorxudur. Dünya həyatında insan hansı vəziyyətdə olursa-olsun, adətən müəyyən bir ümid qapısı mövcud olur, yəni ölüm gələ bilər və ya vəziyyət dəyişə bilər. Lakin orada artıq belə bir ümid qapısı yoxdur və bu vəziyyət heç vaxt sona çatmayacaq.

Deməli, əzabın müxtəlif növləri vardır. Burada əzablardan biri zillət və alçalma əzabı, digəri isə məzəmmət və rüsvay edilmə əzabıdır. Onlara belə bir məzmunla deyiləcək: Siz nemətlərdən düzgün istifadə etməli olduğunuz zaman bunu etmədiniz, indi isə dadın!