Hövzə Xəbər Agentliyinin müxbirinin verdiyi məlumata görə, Ayətullah Əlirza Ərafi gecə toplantılarının əsas qərargahının əlaqələndirmə şurasının bir sıra üzvləri ilə görüşüb. O, son aylarda ölkənin ən ağır şəraitində xalqın meydanda iştirakına rəhbərlik edən və bu hərəkata öncüllük edən şəxslərin səylərini yüksək qiymətləndirərək onların fəaliyyətini böyük fəxr mənbəyi adlandırıb.
Elmi Hövzələrin rektoru Ayətullah Ərafi peyğəmbərlərin və ilahi övliyaların, o cümlədən uca məqamlı şəhidlərin, xüsusilə İmam Xomeyni (r) və şəhid Ayətullah Seyid Əli Xameneinin (r) xatirəsini yad edib. O, uca Allahdan İslam ümmətinə, İran xalqına, o cümlədən İslam İnqilabına, müqavimət cəbhəsinə, həmçinin xalqa, silahlı qüvvələrə, rəhbərliyə, eləcə də bu böyük hərəkata və xidmət edən bütün şəxslərə Allahdan yardım diləyib.
Son müharibə dünya mütəfəkkirlərinin illərlə təhlil edəcəyi tarixi mərhələdir
Ekspertlər Məclisinin Rəyasət Heyətinin üzvü Ayətullah Ərafi son yeddi-səkkiz ay ərzində Qumda və digər toplantılarda etdiyi çıxışlarda və söylədiyi xütbələrdə çoxsaylı məsələləri təhlil etdiyini bildirib. O, son iki ildə xarici ölkələrə etdiyi səfərlərə də toxunub. Ayətullah Ərafi on iki günlük müharibədən sonra Malayziyaya səfərini, eləcə də şəhid Ayətullah Seyid Əli Xameneinin dəfn mərasimindən sonra xarici nümayəndə heyətləri ilə geniş əlaqələrini xatırladıb.
O bildirib ki, həmin dövrdə dünyanın müxtəlif bölgələrindən 200-dən çox xarici nümayəndə heyəti iştirak edib. Görüşlər və xarici əlaqələr, demək olar ki, hər həftə davam edib. Hətta ölkənin ən ağır şəraitində, daimi fəaliyyət üçün sabit bir məkanın olmadığı vaxtlarda belə, bu əlaqələr kəsilməyib.
Ayətullah Ərafi iştirakçılara müraciət edərək, onların bəsirətini və mövcud şəraiti düzgün dərk etmələrini yüksək qiymətləndirib. O bildirib ki, iştirakçılar vəziyyəti düzgün qiymətləndirib təhlil etməklə bu hərəkata öncüllük edib və xalqın meydanda iştirakına rəhbərlik etməyi öz üzərlərinə götürüblər.
Ayətullah Ərafi vurğulayıb ki, son müharibədə baş verənlər elə bir nümunə ortaya qoyub ki, dünya mütəxəssisləri və mütəfəkkirləri onu hərbi, təhlükəsizlik, siyasi, sosial və mədəni aspektlərdən illərlə, hətta onilliklər ərzində araşdırmalı olacaqlar.
Səkkizillik İran-İraq müharibəsi, İran və dünya tarixində unudulmaz təcrübədir
Ekspertlər Məclisinin Rəyasət Heyətinin üzvü Ayətullah Ərafi səkkizillik İran-İraq müharibəsi, İran və regiondakı dəyişikliklər prosesindəki əhəmiyyətinə toxunaraq, bu təcrübəni ölkədə baş verən dəyişikliklərin əsas mərkəzlərindən biri adlandırıb.
O bildirib ki, səkkizillik İran-İraq müharibəsidən uzun illər keçməsinə baxmayaraq, dünyada bu barədə təhlillər aparılır və araşdırmalar davam edir. Bu təcrübə müxtəlif aspektlərdən siyasət tarixində və sosial dəyişikliklər prosesində fərqli bir hadisə hesab olunur.
Ayətullah Ərafi səkkizillik müharibənin son günlərini və İmam Xomeyninin (r) atəşkəs qətnaməsinin qəbul edilməsi ilə bağlı bəyanatını xatırladıb. O bildirib ki, İmam Xomeyninin (r) həmin bəyanatda və sonrakı bəyanatlarında İran-İraq müharibəsinin hidayət məşəli kimi qalıcı olmasına xüsusi vurğu etməsi tarixi reallıqdır.
Ayətullah Ərafi qeyd edib ki, dünyanın müxtəlif yerlərində İran xalqının səkkiz il davam edən müharibə boyunca bütün çətinliklərə və itkilərə baxmayaraq göstərdiyi müqavimət xalqları və mütəfəkkirləri heyrətləndirir.
İran-İraq müharibəsinin dünyada dəyişikliklərə təkan verməkdə və ilham mənbəyi olmaqda davam etdiyini bildirən Ayətullah Ərafi vurğulayıb ki, bir xalqın uzunmüddətli təzyiqlər və çətinliklər qarşısında müqavimət göstərməsi müharibənin başa çatması ilə aradan qalxmır. Əksinə, bu təcrübənin təsirləri sonrakı nəsillərdə, eləcə də siyasi, hərbi, mədəni və sosial təhlillərdə yaşamaqda davam edir.
İmam Xomeyninin (r) hərəkatında və İslam İnqilabında tarixə yazılmış dörd zirvə
15 xordad 1342-ci il qiyamı (6 iyun 1963) – Birinci zirvə
Ayətullah Ərafi yarım əsrdən artıq bir dövr ərzində baş vermiş hadisələri təhlil edərək İmam Xomeyninin (r) başlatdığı hərəkatın və İslam İnqilabının tarixə istiqamət verən dörd mühüm mərhələsini zirvə nöqtələri kimi təqdim edib. O bildirib ki, yarım əsrdən artıq müddətdə baş vermiş prosesləri təhlil etmək üçün İranın və regionun tarixinin gedişatını dəyişən bir neçə mühüm dönüş nöqtəsinə diqqət yetirmək lazımdır.
O, 15 xordad 1342-ci il (6 iyun 1963) qiyamını bu tarixi mərhələlərin birincisi kimi səciyyələndirərək qeyd edib ki, həmin dövrdə dünyada materialist düşüncə tərzi və Qərb mədəniyyəti hökmranlıq edirdi. Bir çox təhlillərdə İslam dövrünün sona çatdığı, materialist mədəniyyətin insanların düşüncəsi, təfəkkürü və həyat tərzi üzərində tam üstünlük qazandığı iddia olunurdu. Məhz belə bir şəraitdə İmam Xomeyninin (r) başlatdığı hərəkat dünyada hökm sürən materializmin əsaslarına ciddi sarsıntı gətirdi.
Ölkə üzrə Elmi Hövzələrin rektoru 1342-ci ildə (1963) hərəkatın ilk illərində mövcud olan şəraiti xatırladaraq əlavə edib ki, həmin vaxt biz yeniyetmə idik və Qum şəhərində yaşayırdıq. 15 xordad (6 iyun) qiyamını bilavasitə yaşamasaq da onun davam edən təsirlərini müşahidə edirdik. O dövrdə dünyada geniş yayılmış bir çox nəzəriyyə və təhlillərdə dinin rolunun sona çatdığı, Qərb və materialist mədəniyyətin isə tam üstünlük qazandığı vurğulanırdı.
O, sözünə davam edərək bildirib ki, İmam Xomeyninin (r) Feyziyyə mədrəsəsində və Məscidül-Əzəmdə ucaltdığı etiraz səsi, eləcə də İranın şücaətli xalqının hökm sürən qaranlıq mühitə qarşı qiyamı dünyanı silkələdi. Həmin dövrdə bir çoxları bu hərəkatın mahiyyətini dərk etməsə də bəziləri onu məsxərəyə qoyur, digərləri isə heç bir nəticə verməyəcəyini düşünürdü.
Ayətullah Ərafi həmin dövrdə müxtəlif dünya gücləri və cərəyanları tərəfindən hərəkatın geniş şəkildə pislənməsinə və ona qarşı çıxılmasına toxunaraq vurğulayıb ki, bir çoxları bu hərəkatı tezliklə sönüb gedəcək müvəqqəti bir addım hesab edirdi. Lakin tarixin gedişatı tamamilə fərqli oldu. Həmin etiraz səsi və qiyam tarixdə özünə əbədi yer qazandı və bütün dünyaya təsir göstərdi.
O, mübarizə dövrünün çətinliklərindən danışaraq bildirib ki, həmin mərhələdən növbəti mərhələyə çatmaq üçün təxminən 16 il vaxt lazım gəldi. Bu illər həbs, sürgün, əzab-əziyyət və şəhadətlə müşayiət olundu. Bir çoxları ağır qəriblik şəraitində həyatını itirsə də İmam Xomeyninin (r) ucaltdığı bayrağın altında möhkəm dayandı.
Ölkə üzrə Elmi Hövzələrin rektoru hərəkatın qələbəsində xalqın həlledici rolunu vurğulayaraq bildirib ki, bu tarixi dönüşdə əsas pay İran xalqına məxsusdur. Əgər İmam Xomeyni (r) min dəfə də öz etiraz səsini ucaltsaydı, lakin xalq ona qoşulmasaydı, bu hərəkat necə nəticə verə bilərdi? Tarixdə böyük dəyişikliklərə nail olmağa çalışan, lakin cəmiyyətin dəstəyini qazana bilmədikləri üçün məqsədlərinə çata bilməyən çoxsaylı rəhbərlər olub.
O, əlavə edib ki, bu sivilizasiya dəyişikliyinin başlanğıcında məhz 1342-ci ildə (1963) meydana atılmağın və İmam Xomeyninin (r) yolu ilə hərəkət etməyin zəruriliyini dərk edən qadınların, kişilərin və gənclərin dəstəyi dayanırdı. İran xalqı öz fəal iştirakı ilə müasir tarixdə yeni bir səhifə açdı və yeni, özünəməxsus sivilizasiya hərəkatının əsasını qoydu.
İran üçün hesablanmış müharibənin başa çatması | Ağır və çətin günlərdə baş tutmuş üçüncü zirvə
Ayətullah Ərafi tarixə istiqamət verən üçüncü mərhələnin İranın üzərinə qoyulmuş müharibənin başa çatması və qətnamənin qəbul edilməsi olduğunu bildirib. O qeyd edib ki, bu mərhələ müəyyən acılarla müşayiət olunsa da mahiyyət etibarilə böyük qələbələrlə yadda qalıb. Məhz bu dövr İran-İraq müharibəsinin təcrübəsini formalaşdıraraq uzunmüddətli izlər buraxıb.
O, bu mərhələnin yalnız müharibənin başa çatması ilə bağlı çətinliklər baxımından qiymətləndirilməməli olduğunu vurğulayaraq əlavə edib ki, səkkizillik İran-İraq müharibəsi təcrübəsi, xalqın müqaviməti və əldə olunan nailiyyətlər İslam İnqilabının tarixi sərvətinin bir hissəsidir. Bu təcrübənin təsirləri bu gün də İranda və regionda baş verən proseslərdə özünü göstərir.
Son dövrdə İran üçün hesablanmış müharibə | İnqilab tarixinin dördüncü zirvəsi və fərqli mərhələsi
Ölkə üzrə Elmi Hövzələrin rektoru 12 günlük müharibəni və son 40 gündə davam edən müharibəni İslam İnqilabının tarixə istiqamət verən dördüncü zirvəsi kimi səciyyələndirib. O bildirib ki, bu mərhələ həm hərəkatın 60 ildən artıq tarixində, həm də İslam İnqilabının qələbəsindən sonrakı dörd onillikdən artıq dövrdə baş verən digər mərhələlərdən miqyasına və əhəmiyyətinə görə fərqlənir.
O, bu qarşıdurmanın iki əsas tərəfini düşmənin iradəsi və İran xalqının müqaviməti kimi müəyyənləşdirərək vurğulayıb ki, hazırkı mərhələnin fərqliliyi həm düşmənin əvvəldən malik olduğu və bu gün də qoruyub saxladığı iradə, həm də İran xalqının buna qarşı göstərdiyi müqavimətlə bağlıdır. Bu mərhələdə baş verənlər əvvəlki təcrübələrdən ciddi şəkildə fərqlənir.
Ayətullah Ərafi Əqsa Tufanı əməliyyatından və İsmayıl Həniyənin şəhadətindən sonra baş verən proseslərlə bağlı öz qiymətləndirmələrini bölüşərək bildirib ki, ilkin mərhələdə formalaşmaqda olan dalğanın miqyasını bu qədər ciddi hesab etmirdi. Lakin sonradan müavinlər şurasının müxtəlif iclaslarında dəfələrlə vurğulayıb ki, əvvəlki bütün dalğalardan fərqlənən yeni bir dalğa hazırlanır və hərəkətə keçir.
O əlavə edib ki, bu qiymətləndirməni müxtəlif məqamlarda ifadə edib. Həmin dalğanın əsas xüsusiyyəti ondan ibarət idi ki, dünyanın böyük gücləri tam qətiyyətlə hərəkət edir, bəzi digər qüvvələr isə susmaqla və onlara dəstək verməklə bu istiqamətdə mövqe tuturdular. Bütün bu proseslər İranı və İslam İnqilabını əsas hədəf seçən bir xətt üzrə inkişaf edirdi. Bu mərhələni əvvəlki dövrlərlə asanlıqla müqayisə etmək olmaz.
İslam İnqilabının qələbəsi və İnqilabın ikinci zirvəsi
Ayətullah Ərafi tarixə istiqamət verən ikinci zirvənin 22 Bəhmən 1357-ci ildə (11 fevral 1979) İslam İnqilabının qələbəsi olduğunu bildirib. O qeyd edib ki, İnqilabın qələbəsi həm ölkə daxilində, həm də beynəlxalq miqyasda heyrətamiz bir hadisə idi və bir çoxları İmam Xomeyninin (r) başlatdığı hərəkatın belə bir nəticə əldə edəcəyinə inanmırdı.
O, 1357-ci ildə (1979) keçirilən yürüşlərlə bağlı xatirələrini bölüşərək bildirib ki, hətta həmin dövrdə də bəzi insanlar yürüşlərdə iştirak etmələrinə baxmayaraq, İmam Xomeyninin (r) başlatdığı hərəkatın uğur qazanmayacağını düşünürdülər. Onların fikrincə, mübarizə sonda yalnız partizan fəaliyyətləri ilə məhdudlaşacaqdı. Lakin İmam Xomeyni (r) xalqı yaxşı tanıyır və onların gücünə arxalanırdı.
Ekspertlər Məclisinin Rəyasət Heyətinin üzvü Ayətullah Ərafi 1357-ci ilin 20, 21 və 22 Bəhmən (9, 10 və 11 fevral 1979) tarixlərini xatırladaraq deyib ki, həmin günlərdə Tehranda olub və yürüşləri, eləcə də baş verən hadisələri yaxından müşahidə edib. Xüsusilə 21 Bəhmən gününün ikinci yarısında İmam Xomeyninin (r) xalqı küçələrə çıxmağa çağıran müraciətindən sonra küçələrdə təəccüblü bir mənzərə yaranıb.
O əlavə edib ki, küçələrin boş qalmasını nəzərdə tutan qərarların qəbul edildiyi və bununla bağlı planların hazırlandığı bir şəraitdə İmam Xomeyninin (r) müraciətindən sonra Tehran küçələri insanlarla dolub-daşıb. Xalqın iştirak etməyəcəyinə əsaslanan planlar və hesablamalar alt-üst olub. Xalqın bu möhtəşəm iştirakı İslam İnqilabının tarixində daha bir böyük və möcüzəvi zirvə nöqtəsi olub.
Həmçinin düşmənin məhdud və müvəqqəti məqsədlərlə kifayətlənəcəyini düşünmək də düzgün deyil.
İrana qarşı hücumlar dünya gücləri arasındakı zahiri fikir ayrılıqlarından daha geniş miqyasda
İrana qarşı baş vermiş hücumlar
Ayətullah Ərafi gecə toplantılarında xalqın fəal iştirakını bir daha yüksək qiymətləndirərək vurğulayıb ki, siz müasir tarixdə misli görünməmiş, heç bir tarixi nümunəsi olmayan hücum qarşısında İran xalqının böyük, genişmiqyaslı və sivilizasion mübarizəsinin sıralarında dayanırsınız. Bu fəaliyyətin əhəmiyyəti qarşıdurmanın miqyasını və bu mübarizədə iştirak edən qüvvələrin genişliyini nəzərə aldıqda daha aydın görünür.
O, ABŞ-də demokratlarla respublikaçılar arasında mövcud olan bəzi siyasi fikir ayrılıqlarına, eləcə də Avropa ölkələrinin və regiondakı əhəmiyyətsiz əlaltılarının fərqli mövqelərinə toxunaraq bildirib ki, bu siyasi cərəyanlar və ölkələr arasında müəyyən fikir ayrılıqlarının mövcudluğunu inkar etmək olmaz. Lakin son iki-üç il ərzində hazırlanmış siyasətin əsas mahiyyətində nəzərəçarpacaq dərəcədə uzlaşma var və onların hamısı bu məsələdə ortaq mövqedən çıxış edirlər. Dünya miqyasında baş verən hadisələri təhlil edərkən nəzərə alınmalı olan reallıq məhz budur.
Ölkə üzrə Elmi Hövzələrin rektoru Ayətullah Ərafi müharibənin ilk həftələrində daxil olan məlumat və mesajlara toxunaraq bildirib ki, elə ilk günlərdən etibarən Rusiyadan Pakistana və bir sıra digər ölkələrə qədər müxtəlif tərəflərdən, o cümlədən kəşfiyyat xidmətlərindən məlumatlar daxil olurdu. Bu mesajların bir çoxu təəssüf və narahatlıq ifadə edən məzmun daşıyırdı. Bəzi tərəflər yaranmış vəziyyətə son qoymaq üçün çıxış yolu tapmağı təklif edirdilər. Çünki onlar İranın bu hücum qarşısında heç bir halda bir ay belə müqavimət göstərə bilməyəcəyini düşünürdülər.
Ayətullah Ərafi bəzi ölkələrin göndərdikləri mesajlarda amerikalıların çox amansız olduqlarını və vəziyyətin bu həddə çatmasına yol verilməməli olduğunu bildirdiklərini qeyd edərək sözünə davam edib. O vurğulayıb ki, bu mesajların bəziləri səmimi, bəziləri isə zahiri xarakter daşıyırdı. Bununla belə, ümumilikdə bir çox tərəf müharibənin ilk həftələrində İranın belə bir təzyiqə tab gətirə biləcəyini düşünmürdü. Bəziləri əllərindən hər hansı bir kömək gələcəyi təqdirdə buna hazır olduqlarını bildirir, digərləri isə yaranmış vəziyyətdən çıxış yolu tapmağın zəruriliyini vurğulayırdılar.
O, bu qiymətləndirmələrin bir çox beynəlxalq aktorun İranın müqavimət imkanları barədə təsəvvürünü əks etdirdiyini bildirərək vurğulayıb ki, nəticədə baş verənlər əvvəlki təcrübələrlə müqayisədə daha böyük miqyaslı bir hadisə oldu. Bu hadisə keçmişdə tarixə istiqamət vermiş təcrübələrin davamı olsa da müəyyən cəhətlərinə görə onlardan fərqlənir. Çünki bu dəfə dünyanın böyük gücləri birbaşa qarşıdurmaya qoşuldular.
Ölkə üzrə Elmi Hövzələrin rektoru Ayətullah Ərafi region ölkələrindən, o cümlədən Birləşmiş Ərəb Əmirlikləri və Səudiyyə Ərəbistanından siyasi və diplomatik nümayəndə heyətlərinin qarşılıqlı səfərlərinə toxunaraq qeyd edib ki, diplomatiyanın öz yeri var və o, öz funksiyasını yerinə yetirməlidir. Lakin ölkələrin mövqelərində müşahidə olunan zahiri fəallıq və fikir ayrılıqları ilə yanaşı, pərdəarxası məqsədlərə və hesablamalara da diqqət yetirmək lazımdır.
O bildirib ki, fikir mübadilələri və diplomatik danışıqlar məsələnin zahiri tərəfidir. Pərdəarxasında isə onların hamısı İslam İnqilabının ideoloji-siyasi xəttinə zərbə vurulmasının zəruriliyi barədə ortaq mövqedə dayanırlar. Ayətullah Ərafi əlavə edib ki, bu mənzərənin təhlilində əsas məsələ zahiri diplomatik mövqelərin arxasında hansı məqsədin dayandığını müəyyənləşdirməkdir. Başlıca ortaq məqsəd İslam İnqilabının ideoloji-siyasi xəttinə zərbə vurmaq və İran xalqının əzəmətini sarsıtmaqdır. Hərçənd bu məqsədə nail olmaq üçün seçilən üsullarda müxtəlif aktorlar arasında müəyyən fərqlər ola bilər.
Ayətullah Ərafi hazırkı şəraitdə arxayınlaşmağın və təhdidlərin sona çatdığını düşünməyin yolverilməz olduğunu vurğulayaraq bildirib ki, İslam İnqilabının Ali Məqamlı Rəhbərinin də qeyd etdiyi kimi, əldə edilmiş böyük nailiyyətlərə baxmayaraq, hər kəs mübarizə meydanında qalmalı və üzərinə düşən məsuliyyəti yerinə yetirməyə davam etməlidir.
İran xalqının gördüyü iş o qədər böyükdür ki, Allah eləməsin, bu mərhələdə də məğlubiyyətə uğrasaq belə, tarix iki il ərzində beynəlxalq miqyasda ən böyük dalğalara və dünya güclərinə qarşı dayanaraq öz varlığını qoruyub saxlamış bir xalq haqqında yazacaq. Bununla belə, Allahın lütfü sayəsində belə bir hadisənin baş verməyəcəyinə və ölkənin izzət və əzəmət yolunda irəliləməyə davam edəcəyinə ümid edirik.
Xarici nümayəndə heyətlərinin xalqın iştirakı ilə bağlı təəssüratları – çoxlarının təsəvvür belə edə bilmədiyi mənzərə
Elmi Hövzələrin rektoru şəhid Ayətullah Seyid Əli Xameneinin (r) dəfn mərasimində xarici nümayəndə heyətlərinin iştirakına toxunaraq çoxsaylı xarici vətəndaşlarla keçirdiyi görüşləri xatırladıb. O bildirib ki, həmin dövrdə müxtəlif ölkələrdən gəlmiş yüzə yaxın şəxsiyyətlə görüşüb. Onların bir çoxu İranda müşahidə etdikləri mənzərəni asanlıqla təhlil edə bilmirdi.
Ekspertlər Məclisinin Rəyasət Heyətinin üzvü Ayətullah Ərafi əlavə edib ki, Tehran və Qum şəhərlərinə gəlmiş Afrikanın və digər bölgələrin bir sıra tanınmış alimləri insanların gündəlik həyatının adi qaydada davam etdiyini və xalqın hadisələrin mərkəzində fəal iştirakını qoruyub saxladığını gördükdə heyrətə gəlirdilər. Onlar baş verən hadisələrdən sonra həyatın öz axarı ilə davam edəcəyini və insanların yenə də fəal şəkildə meydanda olacaqlarını təsəvvürlərinə belə gətirə bilmirdilər.
Ayətullah Ərafi bu reaksiyaları İranda baş verən hadisələrin dünya miqyasında geniş əks-səda doğurmasının göstəricisi kimi qiymətləndirərək bildirib ki, İranda formalaşmış reallığı bəzi xarici müşahidəçilər nə təsvir edə, nə də təhlil edə bilirdilər. Onlar tamamilə fərqli mənzərə gözləyirdilər, lakin əvvəlki hesablamaları və təsəvvürləri ilə üst-üstə düşməyən bir reallıqla qarşılaşdılar.
O, yüzdən çox ölkənin nümayəndələrinin və müxtəlif dinlərin təmsilçilərinin iştirak etdiyi Malayziya sammitindəki təcrübəsindən danışaraq bildirib ki, bu sammit Malayziyanın baş nazirinin təşəbbüsü ilə təşkil olunmuş, onun maliyyə təminatını isə Səudiyyə Ərəbistanı ilə əlaqəli qurumlar öz üzərinə götürmüşdü. Bununla belə, toplantı zamanı diqqət mərkəzində olan əsas ölkə İran idi.
Ölkə üzrə Elmi Hövzələrin rektoru əlavə edib ki, sammitin xərcləri başqa bir tərəf tərəfindən qarşılanmasına baxmayaraq, toplantıda dəfələrlə İranın adı çəkilir, İran nümayəndə heyətinin mövqeləri müzakirə olunur, müxtəlif şəxsiyyətlər isə İran nümayəndə heyəti ilə söhbət etmək üçün görüşlərə müraciət edirdilər. Bu, İranın dünya miqyasındakı ideoloji və siyasi proseslərdə tutduğu mövqenin yalnız maliyyə imkanlarından və ya hər hansı tədbirə ev sahibliyi etməkdən asılı olmadığını göstərirdi.
Ayətullah Ərafi həmin sammitdə iştirak edən bəzi şəxsiyyətlərlə apardığı söhbətlərə toxunaraq bildirib ki, hətta öz ölkələrinin rəsmi siyasəti çərçivəsində fəaliyyət göstərən şəxslər belə, davranış və çıxışlarında İrana və şiəliyə xüsusi diqqət yetirirdilər. Bu təcrübələr göstərir ki, dünya miqyasında mühüm bir potensial əldə olunub. Bu potensialdan düzgün istifadə etmək üçün isə yeni planlaşdırma və təşəbbüskarlıq tələb olunur.
Ayətullah Ərafi vurğulayıb ki, müasir dünyada ölkələr adlarının tanınması və diqqət mərkəzinə düşməsi üçün böyük vəsaitlər xərcləyirlər. Lakin bu gün İran dünya ictimaiyyətinin diqqət mərkəzindədir. Bu mövqe dəyərli bir potensialdır və onu tanımaq, qorumaq, eləcə də düzgün planlaşdırma yolu ilə uzunmüddətli imkanlara çevirmək lazımdır.
Gecə yürüşləri – İranın və İslam İnqilabının dünya miqyasında izzətini yüksəldən böyük zəncirin bir halqası
Ölkə üzrə Elmi Hövzələrin rektoru son hadisələr fonunda gecə yürüşlərinin əhəmiyyətini vurğulayaraq bildirib ki, sizin gecə yürüşləriniz məhdud və təcrid olunmuş bir fəaliyyət deyil. Əksinə, bu hadisə İslamı, İranı, İslam İnqilabını, eləcə də İran xalqının izzət və əzəmətini dünya miqyasında irəli aparan böyük bir zəncirin halqasıdır.
Ekspertlər Məclisinin Rəyasət Heyətinin üzvü Ayətullah Ərafi əlavə edib ki, bu zəncir hər gecə diqqət mərkəzində saxlanılmalı və heç bir amilin ona zərər vurmasına yol verilməməlidir. Son hadisələr zamanı üzə çıxan yeni reallıqlardan biri də ictimai və milli gücün məhz bu toplantılarda və insanların küçələrdə fəal iştirakında kök salmasıdır.
Ayətullah Ərafi raket potensialının, silahlı qüvvələrin, İslam İnqilabı Keşikçiləri Korpusunun, eləcə də ölkənin hərbi və təhlükəsizlik sahəsində həyata keçirdiyi tədbirlərin əhəmiyyətinə toxunaraq bildirib ki, bütün bu imkanlar son dərəcə mühümdür. Lakin gücün əsas mənbəyi olan xalq meydana çıxmasaydı və fəal iştirak etməsəydi, digər imkanlar da eyni şəkildə və eyni təsirlə fəaliyyət göstərə bilməzdi.
O, İnqilabın sabiq Rəhbərinin şəhadətinə, eləcə də ölkənin kəşfiyyat, təhlükəsizlik və hərbi strukturlarına vurulmuş zərbələrə toxunaraq bildirib ki, baş verən hadisələr zamanı ölkənin tanınmış hərbi və təhlükəsizlik xadimləri həyatlarını itirib, müxtəlif qurumlara və sistemlərə ciddi ziyan dəyib. Bütün bunlara baxmayaraq, ölkə öz yoluna davam edib və dövlət işlərinin idarə olunması dayanmayıb. Həmin şəraitdə bəzi qurumlar və bölmələr ciddi çətinliklərlə üzləşib, bir çox hallarda adi iclasların keçirilməsi və mövcud iş mexanizmlərinin davam etdirilməsi belə mümkün olmayıb. Buna baxmayaraq, ölkə öz ayaqları üzərində dayanmağı bacarıb. Bu reallıq göstərir ki, ölkənin gücü yalnız rəsmi strukturlarla məhdudlaşmır. Bu gücün arxasında iman, bəsirət, iradə və xalqın fəal iştirakına söykənən dərin dayaqlar dayanır.
Ölkə üzrə Elmi Hövzələrin rektoru ölkənin birliyinin və bütövlüyünün qorunmasında xalqın rolunu vurğulayaraq bildirib ki, raketlər, silahlı qüvvələr və təhlükəsizlik imkanları mühüm əhəmiyyət daşıyır. Lakin bu imkanları vahid milli güc sistemində birləşdirən, tarixi dönüş nöqtələrində xalqın nümayiş etdirdiyi fəal iştirak və məsuliyyət hissidir.
Müharibə günlərində hadisələrin mərkəzində olmaq – çətin şəraitə hazır olmağın zəruriliyi
Ayətullah Ərafi müharibənin ilk günlərindəki şəraitə toxunaraq bildirib ki, hələ müharibənin ilk günlərində işlərin elə planlaşdırılmasının vacibliyini vurğulamışdı ki, hətta uzun müddət ərzində xarici əlaqələr və dəstək tamamilə kəsilsə, heç kim ölkə ilə maraqlanmasa belə, bütün işləri idarə etmək mümkün olsun.
Ölkə üzrə Elmi Hövzələrin rektoru bu zərurətin müharibənin xüsusi şəraitindən irəli gəldiyini bildirərək vurğulayıb ki, adi mexanizmlərə və daimi əlaqələrə arxalanmağın mümkün olmadığı vəziyyətlərə də hazır olmaq lazımdır. Bu dövrdə ölkəyə dayaq olan əsas amillər İran gənclərinin və cəmiyyətinin mənəvi gücü, ideoloji baxışları, bəsirəti, dünyagörüşü və aydın düşüncəsi olub.
O, cəmiyyətin müxtəlif təbəqələrinin inqilabi qüvvələrin əsas nüvəsi ətrafında birləşməsinə toxunaraq bildirib ki, bu hərəkatın əsas nüvəsini inqilabçı, Hizbullahçı və yüksək ruhlu qüvvələr təşkil edir. Bununla yanaşı, xalqın digər təbəqələri də meydana çıxaraq fəal iştirak etməyə başladılar. Bu əlavə potensialı qorumaq, düşünülmüş tədbirlər və düzgün planlaşdırma yolu ilə həmin insanların dəstəyinin davamlılığını təmin etmək lazımdır.
Ayətullah Ərafi müharibə günlərində təhlükəsizlik sahəsində yaranmış çətinliklərə toxunaraq Tehranda bəzi polis məntəqələrinin və polis şöbələrinin fəaliyyət şəraitinin dəyişməsini, eləcə də müxtəlif qurumlara ziyan dəyməsini xatırladıb. O bildirib ki, həmin günlərdə kəşfiyyat, təhlükəsizlik və polis orqanlarına zərbələr endirilməsinə baxmayaraq, xalq yenə də meydanda idi.
Tehranda şəxsən müşahidə etdiklərinə toxunan Ayətullah Ərafi bildirib ki, bəzi gecələr şəhərdə dolaşır və mövcud vəziyyəti yaxından müşahidə edirdi. Çətin şəraitə və dəymiş ziyana baxmayaraq, şəhər canlılığını qoruyub saxlayır, insanlar isə küçələrdə fəal iştiraklarını davam etdirirdilər. Bu xalqın iradəsi, imanı, dözümü və müqaviməti heyrətamiz bir reallıq idi.
Ölkə üzrə Elmi Hövzələrin rektoru vurğulayıb ki, bu iştirak İran cəmiyyətinin ən ağır şəraitdə belə ictimai həyatını qoruyub saxlamaq və öz fəaliyyətini davam etdirmək imkanına malik olduğunu göstərdi. Bu potensialın davamlılığını təmin etmək üçün məqsədyönlü planlaşdırma aparmaq, insanlar arasında, eləcə də xalqla məsul qurumlar arasında əlaqələri gücləndirmək lazımdır.
Müharibə başa çatmayıb – xalq meydanı tərk etməməlidir
Ayətullah Ərafi təhdidlərin sona çatdığı qənaətinə gəlməyin yanlış olduğunu vurğulayaraq bildirib ki, kimsə hər şeyin bitdiyini və artıq xalqın iştirakına ehtiyac qalmadığını düşünürsə, yanılır. Ölkənin izzət və əzəmətinin qorunub saxlanılması məhz bu iştirakdan asılıdır. Bütün dünya hiss etməlidir ki, İran xalqı ən ağır şəraitdə belə meydanı tərk etmir.
O əlavə edib ki, bu mesaj aydın şəkildə çatdırılmalıdır: Düşmən müxtəlif variantlara əl atsa və vəziyyət daha da çətinləşsə belə, bu ehtimala qarşı da əvvəlcədən planlaşdırma aparılıb. Belə bir şəraitdə də şəhərlərimizin küçələri canlılığını qoruyacaq, izdihamlı olacaq və xalqın iştirakı ilə dolub-daşacaq. Bayraqlar dalğalanmaqda davam edəcək, şüarlar səsləndiriləcək, düşüncə və bəsirət fəallığını qoruyacaq, təhlillər isə İranın və İslam İnqilabının izzət və əzəmətinin müdafiəsinə yönələcək.
Ölkə üzrə Elmi Hövzələrin rektoru xalq toplantılarının bu hərəkatın hərəkətverici qüvvəsi və döyünən ürəyi olduğunu vurğulayaraq iştirakçılara müraciətlə bildirib ki, siz bu toplantıların təşkilində və davamlılığının təmin olunmasında xidmət göstərirsiniz və gördüyünüz işin dəyərini sözlə ifadə etmək mümkün deyil. Biz tarixin taleyüklü və həlledici dönüş nöqtəsində dayanmışıq. Bu mərhələdə səhlənkarlığa yol verilsə, qarşıdakı bir-iki əsr ərzində tamamilə fərqli şəraitdə yaşamalı olacağıq.
O əlavə edib ki, sizin gördüyünüz iş böyük tarixi qarşıdurma qarşısında dayanan cəbhəyə dəstək verməkdir. Bu iştirakın əhəmiyyətini tarixi dəyişikliklərin miqyası və onların uzunmüddətli nəticələri kontekstində qiymətləndirmək lazımdır.
Xalqların qərarların qəbul edilməsi prosesindən kənarda qalması – nəsillər boyu ağır bədəllər ödənilməsinə səbəb ola biləcək tarixi təcrübə
Ayətullah Ərafi sabiq rəhbər şəhid həzrət Ayətullah üzma Xameneinin xalqların dünya miqyasında baş verən proseslərdən kənarda qalmasının nəticələri ilə bağlı söylədiyi fikri xatırladaraq bildirib ki, bazar ertəsi günləri keçirilən toplantıların birində bir qrup şəxs ondan bir neçə kəlmə danışmağı xahiş edib. Həmin görüşdə şəhid rəhbərin toxunduğu məsələlərdən biri İkinci Dünya müharibəsinin başa çatması və qalib güclərin dünyanı öz aralarında bölüşdürməsi olub. O bildirib ki, İkinci Dünya müharibəsi başa çatdıqdan sonra müttəfiqlər və qalib dövlətlər bir araya gələrək dünya xəritəsini masanın üzərinə qoyub, müxtəlif bölgələri tortu öz aralarında bölüşdürdükləri kimi bölüblər. Çünki həmin vaxt İslam dünyası, Qərbi Asiya regionu və Yaxın Şərq bu proseslər qarşısında səssiz qalmış, təsirli iştirak nümayiş etdirməmişdi. Nəticədə bu bölgələr hər şeylərini itirmiş və faktiki olaraq beynəlxalq hesablamalardan kənarda qalmışdılar.
Ölkə üzrə Elmi Hövzələrin rektoru bu fikrin daşıdığı mesaja diqqət çəkərək bildirib ki, bir xalq və ya cəmiyyət taleyüklü bir məqamda hadisələrin gedişindən kənarda qalarsa, bunun bədəlini yüz, hətta iki yüz il ərzində ödəməli ola bilər. Tarixin həlledici məqamlarında iştirak etmək yalnız müəyyən bir dövrə aid addım deyil, xalqların və gələcək nəsillərin taleyinə təsir göstərən mühüm amildir.
O, son aylarda apardığı tarixi araşdırmalara toxunaraq bildirib ki, gecələr oyaq qalması və yaranmış imkanlar sayəsində bu müddət ərzində İran, Osmanlı və digər tərəflər arasında baş vermiş müharibələrə dair yüzdən çox tarixi kitab oxuyub. Bu araşdırmalar bir daha göstərib ki, bəzi tarixi məğlubiyyətlər və müqavilələr ölkə üçün uzunmüddətli nəticələrə səbəb olub.
Ayətullah Ərafi İranın keçmişdə apardığı müharibələrə və Türkmənçay müqaviləsi kimi sənədlərə toxunaraq bildirib ki, həmin müharibələrin bəzilərində hər iki tərəfin hərbi qüvvələri olub. Lakin bəzən top kimi yeni silahın meydana çıxması və ya qoşunlar arasında qorxu yaranması döyüş ruhunun sarsılmasına və geri çəkilməyə səbəb olub. Məsələ yalnız hərbi vasitələrin üstünlüyündən ibarət deyildi. Bəzi hallarda qorxu və müqavimət iradəsinin itirilməsi böyük məğlubiyyətlər üçün zəmin yaradırdı. Belə məğlubiyyətlərin nəticəsində müəyyən dövrlərdə İran ərazilərinin bir hissəsi ölkədən ayrılıb və ağır şərtlər nəzərdə tutan müqavilələr qəbul etdirilib. Həmin müqavilələrin izləri bu gün də regionun tarixində və coğrafiyasında qalmaqdadır.
Ölkə üzrə Elmi Hövzələrin rektoru keçmişdə İrandan ayrılmış ərazilərə toxunaraq bildirib ki, Rusiyaya etdiyi səfərlər zamanı həmin bölgələrin bəzilərini yaxından müşahidə edib. Orada İranla mədəni və tarixi bağlılığı göstərən izlərə rast gəlinir. Hətta bəzi bölgələrdə məscidlər, dini mərkəzlər və tələbələrin dini təhsil alması ənənəsi də mövcuddur.
O, Bəhreynin ana vətənindən ayrılması təcrübəsinə də toxunaraq tarixi qərarların və müqavilələrin nəticələrini dərindən öyrənməyin vacibliyini vurğulayıb. Əlavə edib ki, bəzi dövrlərdə ərazilərin verilməsi elə şəkildə həyata keçirilib ki, beynəlxalq müstəvidə bu qərarlara etiraz etmək və məsələni yenidən gündəmə gətirmək imkanları da məhdudlaşıb. Bu təcrübələr taleyüklü məqamlarda iştirak etməyin və qətiyyətlə dayanmağın nə qədər mühüm olduğunu göstərir.
Ayətullah Ərafi daha sonra səkkizillik İran-İraq müharibəsinin bədəllərinə və çoxsaylı insanların, eləcə də döyüşçülərin şəhid olmasına toxunaraq bildirib ki, İran xalqı həmin müharibədə çox ağır itkilər verib, lakin ölkə ərazisinin bir qarışının belə ayrılmasına imkan verməyib. Bu, keçmişdəki bəzi tarixi təcrübələrdən mühüm fərq təşkil edir.
O vurğulayıb ki, bu gün də qarşı tərəf bilir ki, İran ərazisinə daxil olmaq və onun hər hansı bir hissəsini ayırmağa cəhd göstərmək səkkizillik İran-İraq müharibəsi təcrübəsinə malik bir xalqın müqaviməti ilə üzləşəcək. Bu təcrübə İran xalqının möhkəmliyini və dönməz iradəsini dünyaya nümayiş etdirib.
Düşmən İran ərazisinə daxil olmaq üçün geniş hazırlıq aparsa və helikopterlə desant çıxarmağı planlaşdırsa da, ölkə ərazisinə daxil olmağa cəsarət etməyib.
Ölkə üzrə Elmi Hövzələrin rektoru əlavə edib ki, gecə toplantılarında gördüyünüz işin əhəmiyyəti məhz bu çərçivədə daha aydın görünür. Siz iki yüz gecədən artıqdır ki, meydandasınız və bu hərəkatın davam etdirilməsi üçün də planlaşdırma aparmalısınız. Ümid edirik ki, uca Allah da bu yolda sizə yardımçı olacaq.
Gecə yürüşlərinin gücləndirilməsi üçün səkkiz praktiki istiqamət
Ayətullah Ərafi çıxışının digər hissəsində qaldırılan məsələlərə toxunaraq gecə yürüşlərinin təşkilati strukturunun və dəstək mexanizmlərinin gücləndirilməsinin vacibliyini vurğulayıb, bununla bağlı bir sıra əməli təkliflər irəli sürüb.
1\. Məsul şəxslərin yürüşlərdə müntəzəm iştirakı
O, ilk istiqamətin məsul şəxslərin gecə toplantılarında iştirakının planlaşdırılması olduğunu bildirib və qeyd edib ki, şəhər icra hakimiyyətinin başçısı və digər məsul şəxslər elə bir proqram hazırlamalıdırlar ki, hər gecə onların müəyyən hissəsi xalqın arasında olsun və iştirakçılarla birbaşa əlaqələri güclənsin.
2\. Xidmət masalarının növbəli qaydada təşkili
Ölkə üzrə Elmi Hövzələrin rektoru ikinci istiqamətin xidmət masalarının fəaliyyətinin təşkili olduğunu bildirərək əlavə edib ki, bu masalar müvafiq planlaşdırma əsasında gecə toplantılarında növbəli şəkildə fəaliyyət göstərməlidir. Bununla da insanlar məsul qurumların təqdim etdiyi xidmətlərdən yararlana və onları maraqlandıran məsələlərlə bağlı cavab ala bilərlər.
3\. Ruhanilərin və əlaqələndirici qurumların iştirakının gücləndirilməsi
Ayətullah Ərafi gecə yürüşlərinin təşkilində ruhanilərin və Əlaqələndirmə Şurasının roluna toxunaraq bildirib ki, ofislər, ruhanilər və əlaqələndirməyə məsul qurumlar öz iştiraklarını daha müntəzəm və səmərəli şəkildə təmin etməlidirlər. Gecə toplantılarında iştirak etdiyim axşamlarda bəzi dostlarımızın fəaliyyətini müşahidə etdim və onların səylərinə görə təşəkkürümü bildirirəm. Bununla belə, həmin iştirak daha da gücləndirilməli və daha ciddi xarakter almalıdır.
4\. İcra hakimiyyəti orqanlarının əməkdaşlarının iştiraka təşviq edilməsi
O, dördüncü istiqamətin ölkənin inzibati sisteminin gecə toplantılarına daha fəal cəlb edilməsi olduğunu bildirərək qeyd edib ki, idarə və müəssisələrin əməkdaşları bu toplantılarda iştirak etməyə həvəsləndirilməli və təşviq olunmalıdırlar. Burada məqsəd heç kəsi məcbur etmək deyil. Əksinə, məqsədyönlü yanaşma, təşviq və maraq yaradılması vasitəsilə əməkdaşların daha fəal iştirakına şərait yaradılmalıdır.
Ölkə üzrə Elmi Hövzələrin rektoru vurğulayıb ki, inzibati sistem də bu işə fəal şəkildə qoşulmalıdır. Müvafiq məsul şəxslər şəhər icra hakimiyyətinin başçısı ilə koordinasiyalı şəkildə bu məsələnin həyata keçirilməsinə ciddi diqqət yetirməlidirlər. Məsul şəxslərin səylərini yüksək qiymətləndiririk, lakin mövcud imkanların daha dəqiq planlaşdırma əsasında səfərbər edilməsi zəruridir.
5\. Məscidlərin, camaat namazı imamlarının və Bəsic bazalarının gecə toplantıları ilə əlaqələrinin gücləndirilməsi
Ayətullah Ərafi beşinci istiqamətin məscidlərlə gecə toplantıları arasında əlaqələrin gücləndirilməsi olduğunu bildirərək qeyd edib ki, məscidlər, camaat namazı imamları və Bəsic bazaları bu hərəkatın əsas dayaqlarındandır. Buna görə də onların gecə toplantıları ilə əlaqələri daha sistemli şəkildə qurulmalıdır.
O, bu sahədə yeni fəallığın yaradılmasının vacibliyini vurğulayaraq əlavə edib ki, müvafiq məsul şəxslər və bu sahədə fəaliyyət göstərən şəxslər birgə fəaliyyət göstərərək əhalinin gecə toplantılarında iştirakını artırmaq, məhəllələr və məscidlərlə bu toplantılar arasında əlaqələri gücləndirmək məqsədilə proqramlar hazırlamalıdırlar.
6\. Şagirdlərin mütəşəkkil iştirakının təmin edilməsi və müharibə təcrübəsinin tərbiyəvi məktəbə çevrilməsi
Ölkə üzrə Elmi Hövzələrin rektoru Təhsil Nazirliyinin roluna toxunaraq bu məsələnin mühüm zərurətlərdən biri olduğunu bildirib. O qeyd edib ki, təhsil sahəsində məsul şəxslərlə koordinasiyalı şəkildə orta məktəblərdə təhsil alan qız və oğlan şagird qruplarının gecə toplantılarında mütəşəkkil iştirakına şərait yaradılmalıdır.
O əlavə edib ki, əvvəlki müxtəlif görüşlərdə də dəfələrlə vurğulamışam ki, son müharibənin təcrübəsi tərbiyəvi bir məktəbə çevrilməlidir. Bu məktəb təhsil sisteminə və məscidlərə daxil olmalı, gənc nəslə təsir göstərməlidir.
Ayətullah Ərafi bu təcrübənin yalnız hərbi və ya siyasi hadisə olmadığını vurğulayaraq bildirib ki, son müharibə mühüm tərbiyəvi və ictimai aspektlərə malik ola bilər. Gənc nəslin dünyagörüşünün, məsuliyyət hissinin, imanının və ictimai həyatda iştirakının gücləndirilməsi üçün bu təcrübənin imkanlarına xüsusi diqqət yetirilməlidir.
7\. Gecə yürüşlərinin təminat və təchizat imkanlarının genişləndirilməsi
O, yeddinci istiqamətin gecə yürüşlərinin maliyyə, avadanlıq və təşkilati baxımdan təminatının gücləndirilməsi olduğunu bildirərək qeyd edib ki, bizim ofisimiz də öz imkanları çərçivəsində müəyyən yardımlar göstərib.
Ölkə üzrə Elmi Hövzələrin rektoru əlavə edib ki, bu yardımlarla yanaşı, bələdiyyə, şəhər şurası, şəhər icra hakimiyyəti və digər məsul qurumlar da mövcud ehtiyaclara uyğun olaraq lazımi dəstək göstərməli və koordinasiyanı təmin etməlidirlər. Bununla təşkilati fəaliyyət zamanı yaranan çatışmazlıqlar aradan qaldırılar, işlərin daha nizamlı və səmərəli şəkildə davam etdirilməsinə şərait yaranar.
8\. Əlaqələndirmə Şurası – xalqın birbaşa iştirakı ilə gecə toplantılarının əsas idarəetmə mərkəzi
Ayətullah Ərafi çıxışının davamında Əlaqələndirmə Şurasının iclaslarının müntəzəm keçirilməsinin zəruriliyini vurğulayaraq bildirib ki, bu şura gecə toplantılarının təşkili və idarə olunması üzrə əsas mərkəzdir. Mövcud şəraitdə şura həftədə ən azı bir dəfə iclas keçirməli, irəli sürülən məsələlər və təkliflər nəzərdən keçirilməli, onlar barədə müvafiq qərarlar qəbul edilməlidir.
Ölkə üzrə Elmi Hövzələrin rektoru əlavə edib ki, xalq nümayəndələrinin ruhanilər və digər məsul şəxslərlə birlikdə iştirakı problemlərin daha dəqiq müəyyənləşdirilməsinə, koordinasiyanın gücləndirilməsinə və qarşılıqlı etimadın artırılmasına kömək edə bilər. Bu iclaslar müntəzəm keçirilməli, gecə toplantılarında qaldırılan məsələlər də həmin çərçivədə müzakirə olunmalıdır.
İnqilabi ruh yüksəkliyinin qorunub saxlanılması, müxtəlif baxışlara hörmət və xalqın haqlı tələblərinə diqqət yetirilməsi
Mübariz ruh yüksəkliyinin qorunması, müxtəlif baxışlara hörmətlə yanaşılması və xalqın tələblərinin nəzərə alınması
Ayətullah Ərafi müxtəlif baxışlara hörmətlə yanaşmağın zəruriliyini vurğulayaraq bildirib ki, gecə yürüşlərində iştirak edən insanların fərqli baxışları və tələbləri ola bilər. Bu fərqliliklərə hörmətlə yanaşılmalı və insanlar diqqətlə dinlənilməlidir. Xüsusilə tənqid və tələblər məsuliyyət hissindən və mübariz ruh yüksəkliyindən qaynaqlandıqda, onlara xüsusi diqqət yetirilməlidir.
O əlavə edib ki, tənqid və tələbkarlıq məsuliyyət hissindən və mövcud məsələlərə həssas münasibətdən irəli gəldiyi təqdirdə, mütləq nəzərə alınmalıdır. Bununla yanaşı, İslam İnqilabının Ali Məqamlı Rəhbərinin də vurğuladığı kimi, xalqın möhtəşəm toplantılarının əzəməti və cəmiyyətin müxtəlif təbəqələrinin bu toplantılarda iştirakı qorunub saxlanılmalıdır.
Ölkə üzrə Elmi Hövzələrin rektoru qeyd edib ki, müxtəlif baxışlara malik insanların da bu toplantılarda iştirak edə, öz fikirlərini sərbəst şəkildə ifadə edə biləcəklərini hiss etmələri üçün müvafiq şərait yaradılmalıdır. Hətta kimsə hər hansı bir fikirlə razılaşmasa belə, öz baxışını ifadə etmək və fikrinin dinləniləcəyinə əmin olmaq imkanına malik olduğunu hiss etməlidir.
Ayətullah Ərafi müxtəlif baxışların və fərqli yanaşmaların qorunmasının inqilabi ruh yüksəkliyinin zəifləməsinə səbəb olmamalı olduğunu vurğulayaraq bildirib ki, bunun həlli tarazlığın yaradılmasından və dialoq mexanizmlərinin gücləndirilməsindən keçir. Əlaqələndirmə Şurası müntəzəm şəkildə toplanmalı, zərurət yarandıqda isə müxtəlif baxışları və fikir ayrılıqlarını araşdırmaq üçün ayrıca iclaslar da keçirilməlidir.
O əlavə edib ki, ayrı-ayrı şəxslərin müəyyən şəxslərin fəaliyyəti və ya müxtəlif məsələlərlə bağlı fərqli baxışları varsa, onları bir iclasda bir araya gətirmək, müzakirə aparmalarına və bir-birlərinin fikirlərini dinləmələrinə şərait yaratmaq mümkündür. Bu yanaşma fikir ayrılıqlarının aradan qaldırılması və ictimai həmrəyliyin gücləndirilməsi üçün nümunəyə çevrilə bilər. Fikir ayrılıqlarının qeyri-rəsmi mühitdə qalmasına imkan vermək əvəzinə, birbaşa və qarşılıqlı hörmətə əsaslanan dialoq üçün şərait yaradılmalıdır.
Ekspertlər Məclisinin Rəyasət Heyətinin üzvü Ayətullah Ərafi vurğulayıb ki, bu yanaşma həm yürüşlərin əzəmətinin qorunmasına, həm cəmiyyətin müxtəlif təbəqələrinin iştirak imkanlarının genişləndirilməsinə, həm də xalqın inqilabi ruh yüksəkliyinin və məsuliyyət hissinin zəifləməsinin qarşısının alınmasına xidmət edir.
Məsul şəxslərə və fəallara təşəkkür – xidmətlərin davam etdirilməsinin zəruriliyi
Ölkə üzrə Elmi Hövzələrin rektoru çıxışının digər hissəsində son aylarda işlərin təşkili və gecə toplantılarının dəstəklənməsi üçün səylər göstərən şəhər icra hakimiyyətinin başçısına, digər məsul şəxslərə və qurumlara təşəkkürünü bildirərək qeyd edib ki, ictimai ehtiyacların qarşılanmasında və təşkilati məsələlərin həllində çətinliklərin yarandığı bir dövrdə məsul şəxslər iş başında qalıb, problemlərin həlli üçün səylə çalışıblar.
Ekspertlər Məclisinin Rəyasət Heyətinin üzvü Ayətullah Ərafi müharibə şəraitinin yaratdığı çətinliklərə və müxtəlif qurumların əməkdaşlarının səylərinə toxunaraq bildirib ki, həmin dövrdə bir çox məsələlərin həlli ciddi çətinliklərlə üzləşmişdi və ölkənin idarə olunması müxtəlif qurumların fasiləsiz fəaliyyətini tələb edirdi. Məsul şəxslərin iş başında qalaraq vəzifələrini davam etdirməsi təqdirəlayiq addım idi və buna görə onlara təşəkkür edilməlidir.
Ayətullah Ərafi böhranlı şəraitdə rəhbər vəzifəli şəxslərin məsuliyyətdən yayınaraq vəzifələrini tərk edə biləcəkləri ilə bağlı xarici ölkələrdə səsləndirilən bəzi qiymətləndirmələrə toxunaraq bildirib ki, bəziləri belə şəraitdə məsul şəxslərin meydanı tərk edəcəyini düşünsələr də, onların bir çoxu iş başında qalıb, zəhmət çəkib və işlərin davam etdirilməsi üçün səylərini əsirgəməyib.
O, məsul şəxslərin xidmətlərinə görə təşəkkür etməyin tənqidləri görməzdən gəlmək mənasına gəlmədiyini vurğulayaraq əlavə edib ki, danışıqlarla bağlı bəyanatda da zəruri mövqeyimi və müvafiq qeydlərimi ifadə etdiyim kimi, tənqid və tələbkarlıqla yanaşı, görülmüş işləri və göstərilmiş səyləri də etiraf etmək mümkündür. Ədalətli tənqid və xidmət göstərən şəxslərə minnətdarlıq bir-birini tamamlamalı, hər ikisinə eyni zamanda yer verilməlidir.
Ölkə üzrə Elmi Hövzələrin rektoru çıxışının sonunda gecə yürüşlərinin fəallarına və bu hərəkatın davam etdirilməsi üçün çalışan hər kəsə bir daha təşəkkürünü bildirib, onlara uğurlar diləyib. O, xalqın iştirakının davam etdirilməsinin, ictimai həmrəyliyin gücləndirilməsinin, qurumlar arasında koordinasiyanın möhkəmləndirilməsinin və bu tarixi mərhələdə formalaşmış ictimai potensialın qorunub saxlanılmasının zəruriliyini vurğulayıb.
Xəbərin sonu /
Rəyiniz