Hövzə Xəbər Agentliyinin verdiyi məlumata görə, ölkə üzrə Elmi hövzələrin rektoru Ayətullah Ərafi 5 iyun 1963 - cü il (15 xordad 1342-ci il) qiyamının İslam İnqilabının başlanğıcı və 4 iyun 1989-cu il (14 xordad 1368) İmam Xomeyninin (r) vəfatının ildönümü münasibətilə geniş məzmunlu analitik və strateji mesaj ünvanlamışdır.
Məktubun mətni aşağıdakı kimidir:
بسم الله الرحمن الرحیم و صلی الله علی محمد وآله الطاهرین سیما بقیة الله فی العالمین(ارواحنا فداه)
Bağışlayan və mehriban Allahın adı ilə
Allahın Salamı Məhəmməd peyğəmbərə (s) onun pak Əhli-beytinə (ə) və
Onun yer üzündə olan sonuncu Höcətinə olsun. (Allah onun zühurunu tezləşdirsin).
Siz əzizləri Qədir-Xum və ilahi vilayət bayramı münasibətilə təbrik edirəm. Eyni zamanda İslam İnqilabının böyük rəhbəri İmam Xomeyni (r), şəhid Ayətullah SeyidƏliXamenei (Allah ona rəhmət eləsin) və İslam İnqilabının şərəfli şəhidləri, xüsusilə də müqəddəs müdafiə və üçüncü müharibə (müqavimət və müdafiə dövrü) şəhidlərinin pak ruhlarına salam və ehtiramımı bildirirəm.
İnqilabın parlaq tarixində xordad ayı xüsusi əhəmiyyətə malikdir. Bu ay İslam İnqilabının mühüm hadisələri ilə zəngin, dərin mənalı və dərs dolu tarixi bir dövrü təcəssüm etdirir. Bu ayın səhifələrində elə iki böyük və taleyüklü hadisə var ki, onlar heç vaxt İran xalqının və İslam dünyasının yaddaşından silinməyəcək:
1. 15 Xordad 1342 ( 5 iyun 1963) – İslam İnqilabının başlanğıcı və xalqın ayağa qalxmasının ilk böyük mərhələsi
2. 14 Xordad 1368 (4 iyun1989) – İmam Xomeyni (r)-nin vəfatı, böyük itki və tarixi dönüş nöqtəsi
İmam Xomeyni (r) 15 xordadı uzun müddət ümummilli matəm günü elan etmiş və bu günü “İslam, müstəqillik və azadlıq” bayrağının İran və bütün İslam dünyasında ucaldıldığı simvolik bir gün kimi təqdim etmişdir.
Bu böyük və möhtəşəm xalq hərəkatı bir çox mühüm xüsusiyyətlərə malikdir...
Birinci: Mövcud nizamı dəyişdirən və heyrətamiz hadisələr yaradan hərəkat
Bu ilahi və xalq hərəkatının ən mühüm xüsusiyyətlərindən biri ondan ibarət idi ki, o, həmin dövrün təsəvvürlərini, siyasi və elmi nəzəriyyələrini, təhlillərini və mövcud hesablamalarını aşaraq zamanın hakim nizamını ciddi şəkildə sarsıtdı və dünya, region və milli səviyyələrdə köklü, dərin və heyrətamiz dəyişikliklərin əsasını qoydu.
Birincisi, qlobal müstəvidə 15 Xordad qiyamı elə bir dövrdə meydana çıxdı ki, dünya Şərq və Qərb blokları arasında bölünmüş, bəşəriyyət isə materialist fəlsəfələrin, ateist ideologiyaların, liberal və demokratik düşüncələrin və həmçinin ilahi mənbədən uzaq düşmüş məktəblərin əsarəti altında qalmışdı. İnsanlıq hansı istiqamətə üz tuturdusa, nəticədə özünü maddi dünyagörüşünün və mənəviyyatdan uzaq ideologiyaların girdabında tapırdı.
Həmin dövrdə dünya xalqları İkinci Dünya müharibəsindən sonra meydana çıxmış amansız hegemon güclərin hökmranlığını, yeni və müasir müstəmləkəçiliyin mürəkkəb formalarını, eləcə də azadlıqsevər xalqlara və ölkələrə qarşı fasiləsiz təzyiqləri bütün varlıqları ilə hiss edirdilər. Maddi inkişaf, elmi nailiyyətlər və texnoloji tərəqqi zahirdə rifah, rahatlıq və cazibədar həyat tərzi yaratsa da, eyni zamanda bəşəriyyətin mənəvi, əxlaqi və müqəddəs dəyərlərini sarsıdan güclü tufanlar əsirdi. Dünyaya zülmün, istismarın, talançılığın və dağıdıcılığın toxumları səpilirdi.
Məhz belə bir dövrdə, ateizmin, materializmin, zülmün və ümumi susqunluğun hökm sürdüyü bir zamanda, 15 Xordadın nuru İran İslam Respublikasının Qum şəhərində yerləşən Feyziyyə mədrəsəsindən yüksələrək bəşəriyyətə yeni üfüqlər göstərdi.
İkinci səviyyədə isə 15 Xordad elə bir şəraitdə baş verdi ki, İslam dünyası və region imperialist güclərin və onların əlaltılarının hökmranlığı altında əzilirdi. Torpaqlar işğal olunur, sərvətlər talan edilir, müxtəlif ideologiyalara söykənən azadlıq və qurtuluş hərəkatları isə uğursuzluğa düçar olurdu. Ümidsizlik, passivlik, ruh düşkünlüyü və səssizlik İslam ümmətinin üzərinə kölgə salmışdı.
Region ölkələrinin bir qismi xarici güclərin asılı əlaltısına çevrilmiş, digərləri isə qorxu və acizlik içində hərəkətsiz qalmışdı. Gerilik, asılılıq, zillət, təfriqə və daxili çəkişmələr İslam aləminə hakim idi. İsrail isə özünü qalib tərəf kimi təqdim edirdi.
Belə bir mənzərədə 15 Xordad qiyamı İslam dünyasının yarıcan bədəninə yeni ruh üfürdü, mübarizə və azadlıq hərəkatlarına yenidən həyat verdi. Bu ağır müsibətlərin içərisində ümid çıraqları yenidən alovlandı və böyük bir oyanışın təməli qoyuldu.
Üçüncü: İranın taleyini dəyişdirən tarixi dönüş nöqtəsi
Üçüncü baxımdan isə 15 Xordad qiyamı elə bir dövrdə baş qaldırdı ki, əziz İran öz tarixinin ən ağır, ən ağrılı və ən taleyüklü mərhələlərindən birini yaşayırdı. İran, İkinci Dünya müharibəsi zamanı müharibədə iştirak etmədiyini və bitərəfliyini elan etməsinə baxmayaraq, zamanın gedişində dərin yaralar almışdı. Böyük Məşrutə hərəkatı öz məqsədlərinə tam nail ola bilməmiş, ölkə Qacarlar dövrünün istibdadından da ağır olan Pəhləvi diktaturasının əsarətinə düşmüşdü.
Neftin milliləşdirilməsi hərəkatı da arzu olunan nəticəni verməmiş, ölkə 28 Mordad çevrilişi kimi qara və rüsvayçı hadisənin qurbanına çevrilmişdi. İranın müstəqilliyi, azadlığı və milli ləyaqəti talan edilmiş, xalq hərəkatları və azadlıq çağırışları amansızlıqla boğulmuşdu. Siyasi və ictimai qüvvələr kənara sıxışdırılmış, ümidsizlik, qorxu, süstlük və mənəvi tənəzzül cəmiyyətin hər tərəfinə yayılmışdı.
Belə bir şəraitdə qəfil bir qığılcım çaxdı, bir nur parladı və İmam Xomeyninin (r), onun silahdaşlarının, İran xalqının, elmi hövzə və universitet elitasının rəhbərliyi ilə 15 Xordad hərəkatı meydana gəldi. Bu hərəkat ümid yaratdı, hərəkətə təkan verdi və xalqın qarşısında yeni üfüqlər açdı.
15 Xordad qiyamı bu qarışıqlıq, süqut və çıxılmazlıq dövründə, zalımlar ilə məzlumlar arasındakı böyük qarşıdurmanın mərkəzində, haqq ilə batilin sivilizasiya savaşının qızğın çağında meydana çıxdı. O dövrdə dünyada, regionda və həmçinin İranda nicat, qurtuluş və səadət qapıları sanki bağlanmış, ümidlər ümidsizliyə çevrilmişdi. Lakin məhz həmin şəraitdə 15 Xordad hərəkatı ortaya çıxaraq ümid, özünəinam, mübarizə, cihad, azadlıq və qurtuluş arzularını yenidən xalqın, İslam ümmətinin və dünya gəncliyinin qəlbində canlandırdı və tədricən dünya miqyasında mövcud siyasi hesablamaları dəyişdirməyə başladı.
Bu böyük və yeni yaranmış hərəkat ilahi möcüzənin, gözə görünməz yardımın, böyük İmam Xomeyninin (r) istisna olan liderliyinin, eləcə də qədim tarixə, dərin köklərə, hikmətə, dini dəyərlərə və cəsarətə malik İran xalqının qüdrətinin təzahürü idi.
İkinci: Hərəkatın İslami mahiyyəti
15 Xordad hərəkatı dünya, region və İran tarixində baş vermiş əvvəlki hərəkatların təcrübələrindən bəhrələnmiş, müasir İran tarixinin və Tütün Hərəkatı, Məşrutə İnqilabı və neftin milliləşdirilməsi kimi böyük hadisələrin təkamül mərhələsi olmuşdur. Lakin onun əsas mahiyyəti və kökləri İslam dinində, həzrət Peyğəmbərin (s) və onun pak Əhli-beytinin (ə) yüksək təlimlərində, xüsusilə də Aşura məktəbində, imam Hüseynin (ə) qiyamında, eləcə də intizar və məhdəviyyət düşüncəsində axtarılmalıdır.
Bu hərəkatın əsası Qurani-Kərimdən, həzrət Peyğəmbərin (s) sünnəsindən və Əhli-beytin (ə) maarifindən qaynaqlanan saf İslam düşüncəsi və ilahi maarif idi. İran və dünya tarixində baş vermiş müasir hərəkatlar və inqilablar arasında 15 Xordad hərəkatı bütün sütunları, dayaqları və istiqamətləri tamamilə saf İslam təfəkkürü üzərində qurulmuş nadir bir hadisə kimi seçilir.
Üçüncü: İslamın ictihadçı, əqli və cihad ruhlu təfsiri
15 Xordad hərəkatı İslamın, Qurani-Kərimin və sünnənin ictihadçı yanaşma əsasında dərk edilməsinə söykənirdi. Bu hərəkat İslamın hərtərəfli, düzgün və balanslı təfsirini əsas götürür, qərb meyilli, qarışıq və təhrif olunmuş baxışlardan, eləcə də donuq, dar düşüncəli və mütəhəccir yanaşmalardan uzaq dayanırdı.
Məhz İslamın bu doğru, hərtərəfli, cəlbedici və həyatverici təqdimatı xalqı ayağa qaldıran əsas hərəkətverici qüvvəyə çevrildi. Elə bir dövrdə ki, İslam haqqında səthi, yanlış, liberal və geridəqalmış təfsirlər yayılırdı, İmam Xomeyni (r) düzgün və təmiz İslamın ictihadçı, həqiqi, etibarlı, hərtərəfli, cəlbedici, rasional, inqilabi və praktik təfsirini təqdim etdi. Bu baxış sonradan İslam İnqilabının əsas ideoloji sütununa çevrildi.
Dördüncü: Dini mərciiyyət və vilayəti-fəqih
15 Xordad hərəkatı dini mərciiyyətin, vilayəti-fəqih prinsipinin və hikmətli, ədalətli, cəsarətli rəhbərlərin hidayəti üzərində qurulmuşdur. Bu hərəkatın əsasını dərin dini düşüncəyə, fəqihliyə və onun zəruri şərtlərinə inam və bağlılıq təşkil edirdi. Məhz bu fundamental amil hərəkatın orijinallığının qorunmasında və onun davamlılığında əvəzsiz rol oynadı.
Tarix boyu bir çox hərəkat və inqilabların uğursuzluğa düçar olmasının əsas səbəblərindən biri saf İslam düşüncəsinə lazımi diqqətin göstərilməməsi, İslamın düzgün təfsirindən uzaq düşülməsi və xüsusilə dini mərciiyyətlə, eləcə də vilayəti-fəqih institutu ilə sistemli əlaqənin olmaması olmuşdur.
Dini demokratiya və vilayəti-fəqih nəzəriyyəsi bu boşluğu aradan qaldırdı. İmam Xomeyninin (r) rəhbərliyi və vilayət nurunun parlaq təzahürü, daha sonra isə şəhid rəhbər Ayətullah Seyid Əli Xameneinin (Allah ona rəhmət eləsin) rəhbərliyi sayəsində İslam İnqilabının yolu aydınlaşdı, inkişaf və tərəqqi istiqamətləri müəyyənləşdi və bu böyük hərəkat öz bəhrəsini verdi.
İlahi lütf sayəsində bu yol vilayəti-fəqihin davamlılığı, yeni rəhbərliyin müdrikliyi və böyük İran xalqının iradəsi ilə gələcəkdə daha da çiçəklənəcək və inkişaf edəcəkdir.
Beşinci: Xalqın ilahi dirçəlişi və dini demokratiya
15 Xordad hərəkatı ziyalıların, alimlərin, universitet və hövzə nümayəndələrinin, ictimai və siyasi xadimlərin rolundan bəhrələnsə də, onun əsas dayağı xalq kütlələri, gənclər və cəmiyyətin canlı təbəqələri olmuşdur.
Bu hərəkatın hərəkətverici qüvvəsini xalqın coşqusu, gənclərin fədakarlığı, dini qeyrət hissi və ümumi oyanışı təşkil edirdi. Məhz xalq mərkəzli bu mədəniyyət hərəkatın metod və üslubunda özünü göstərdi, istibdadla mübarizədə yeni bir siyasi və ictimai diskurs yaratdı, gücün formalaşması və davamlılığının yeni modelini ortaya qoydu və bu proses bu gün də davam etməkdədir.
İslam İnqilabının və onun rəhbərliyinin ən böyük uğurlarından biri xalqın bu möhtəşəm potensialını düzgün istiqamətləndirməsi oldu. İnqilab xalqın və region xalqlarının rolunu üç əsas istiqamətdə təşkil edə bildi:
1. xalqın meydanlarda fəal iştirakı;
2. Dini demokratiya və İslam Respublikası nəzəriyyəsinin formalaşdırılması;
3. Cəmiyyətin idarə edilməsində həm ümumi, həm də xüsusi səviyyələrdə xalqın iştirakının təmin olunması.
Altıncı: Genişmiqyaslı və sivilizasiya yönümlü baxış
İslam hərəkatının və İnqilabın ən mühüm xüsusiyyətlərindən biri onun İslama hərtərəfli, sistemli, strateji və sivilizasiya quruculuğu baxımından yanaşması olmuşdur. Bu hərəkat İslamın, eləcə də xalqın, universitetlərin, elmi hövzələrin, ruhaniliyin və ziyalıların böyük potensialına inanaraq onları uzun və çətin inkişaf yoluna yönəltdi.
Tarix boyu İslam dünyasında İslamın səthi, birtərəfli, dar çərçivəli və pərakəndə təfsirləri mövcud olmuş və bu yanaşmalar çoxsaylı problemlərə səbəb olmuşdur. Lakin İslamı dərin, hərtərəfli və dəqiq şəkildə təqdim edən düşüncə məktəbinin əsasları böyük mütəfəkkirlər tərəfindən qoyulmuşdur.
Bu məktəbin formalaşmasında və inkişafında mərhum Əllamə Təbatəbai, şəhid Mürtəza Mütəhhəri, şəhid Məhəmməd Baqir Sədr və digər müasir İslam mütəfəkkirləri mühüm rol oynamışlar. Bu ideyanı ən yüksək səviyyədə inkişaf etdirənlər isə İmam Xomeyni (r) və şəhid rəhbər Ayətullah Seyid Əli Xamenei olmuşdur.
Bu baxış sonradan İslam İnqilabında və İslam Müqaviməti cəbhəsində özünün ən parlaq təzahürünü tapdı. Eyni zamanda xalqın, gənclərin, Allah yolunda mübarizə aparan mücahidlərin, inqilabi rəhbərlərin, sərkərdələrin və fədakar əsgərlərin əzmkarlığı bu düşüncənin daha da yayılmasına səbəb oldu.
Beləliklə, İranı, İslam dünyasını və dünyanın məzlum xalqlarını əhatə edən güclü bir cəbhənin formalaşacağına ümid yarandı. Yeni qüdrətin və yeni sivilizasiya quruculuğunun ilkin əlamətləri görünməyə başladı.
Bu gün dünya, bəşəriyyətə və İslam ümmətinə qarşı aparılan üçüncü böyük müharibə fonunda İslam İnqilabının, İslam Müqavimətinin və İslam oyanışının yeni və dönüş yaradan mərhələsinin şahididir.
Yeddinci: İrana, İslam ümmətinə və dünya məzlumlarına hərtərəfli baxış, beynəlxalq yanaşma
15 Xordad hərəkatı İranın müstəqilliyi, izzəti və özünəməxsus kimliyini ön plana çıxarmaqla yanaşı, İranı bu böyük yolun öncül və fəal bazası kimi qəbul etmiş, eyni zamanda İslam ümmətinin birliyinə, dünya məzlumlarının zalım güclərə qarşı ayağa qalxmasına və bəşəriyyətin ümumi mənafelərinə xüsusi diqqət yetirmişdir. Bu hərəkat başlanğıcdan etibarən qlobal, beynəlxalq və sivilizasiya qurucu mahiyyətini ortaya qoymuşdur.
Bu geniş baxış, uzaqgörən yanaşma və yeni sivilizasiya quruculuğu ideyası hələ İmam Xomeyninin (r) Feyziyyə mədrəsəsindəki çıxışlarında öz əksini tapmış, daha sonra İslam İnqilabında çiçəklənmişdir. Şəhid Ayətullah Seyid Əli Xamenei həzrət də (Allah ona rəhmət eləsin) bu strateji baxışın davam etdirilməsində daim israr etmişdir.
İslam İnqilabının və 15 Xordad hərəkatının düşüncə sistemi bir tərəfdən İranın əzəmətinə, milli birliyinə, istiqlaliyyətinə, azadlığına və inkişafına böyük əhəmiyyət verir, digər tərəfdən isə İslam ümmətinin ali mənafelərini və bəşəriyyətin ehtiyaclarını nəzərə alır. Bu yanaşma milli maraqları dar çərçivədə deyil, daha geniş, dinamik və beynəlxalq perspektiv daxilində qiymətləndirir.
Səkkizinci: Hərəkatın davamlılığı və tarixi uzantısı
15 Xordad hərəkatının ən mühüm xüsusiyyətlərindən biri onun yüksək dayanıqlılığı və zaman keçdikcə daha da genişlənərək davam etməsi olmuşdur.
Bu ilahi və xalq hərəkatı yolunun müxtəlif mərhələlərində amansız təqiblərlə, ağır repressiyalarla, sürgünlərlə, həbs və şəhadətlərlə üzləşsə də, heç vaxt sönməmişdir. Ayıq və uzaqgörən ruhanilər, oyanıq universitet çevrələri, şüurlu xalq və cəsur gənclər bu məşəli daim yandırmış, onu qorumuş və nəticədə bu məşəl böyük bir vulkana çevrilmişdir.
Məhz həmin vulkanın mərkəzindən İslam İnqilabı, İslam Respublikası və İslam müqaviməti meydana çıxmışdır. Uca Allahın köməyi ilə bu izzət, istiqlal və yeni sivilizasiya quruculuğu yolu bundan sonra da davam edəcək, onun yeni təzahürləri və yeni üfüqləri ortaya çıxacaqdır.
Bu xalqa bağlı və daxildən doğan dirçəliş müxtəlif mərhələlərdə yenilənmiş, daha da güclənmişdir. Bu gün isə biz onun daha kamil mərhələsini üçüncü müqəddəs müdafiə dövründə müşahidə edirik. Bu səbəbdən meydan, küçə, elmi və mədəni müstəvilərdə, eləcə də həyatın bütün sahələrində bu müqavimət ruhunun, dözümlülüyün və mübarizə əzminin davam etdirilməsi zəruridir.
Doqquzuncu: Ümmətin və İmam Xomeyninin (r) xüsusiyyətlərinin aynası
Hər bir hadisənin və ya hərəkatın mahiyyətini onu meydana gətirənlərin simasında axtarmaq lazımdır. Bu möhtəşəm hərəkatın yaradıcıları, bir tərəfdən, qədim və zəngin tarixi keçmişə malik olan böyük İran xalqı idi. Bu xalq ağıl və təfəkkür sahibi olmaq, sivilizasiya yaratmaq, güclü iman ruhuna malik olmaq, dini qeyrət, qəhrəmanlıq ruhu və Aşura mədəniyyəti kimi xüsusiyyətlərlə seçilirdi. Bu xalqın başıuca oğul və qızları, xüsusilə də gəncləri, həmçinin bu hərəkatın və inqilabın öncülləri və mübarizləri iman, müqavimət, şücaət və sədaqətin ən yüksək nümunələrini nümayiş etdirdilər və ilahi əhdə sonadək sadiq qaldılar.
Digər tərəfdən, bu hərəkatın və inqilabın memarı olan böyük İmam Xomeyni (r) təkbaşına bir ümmətə bərabər şəxsiyyət idi. Onun saysız-hesabsız fəzilətləri və kamillikləri onu nadir bir simaya çevirmişdi. O, daxili və xarici zalım və amansız tağutlara qarşı qorxmadan, ixlasla, qüdrətlə və eyni zamanda məzlumcasına mübarizə meydanına atıldı. Bütün o güc nümayişləri və təhdidlər qarşısında geri çəkilmədi, qorxmadı və ümidsizliyə qapılmadı. Uca üfüqlərə, parlaq gələcəyə baxaraq, Allaha təvəkkül və tam mənada Ona yönəlməklə bu hərəkatın bünövrəsini qoydu və ona rəhbərlik etdi.
Onun yüksək düşüncəsi, böyük iradəsi, dərin baxışı və yolgöstərən tədbirləri yeni bir dünya yaratdı, İslam hərəkatını, İslam İnqilabını, İslam quruluşunu və həmçinin İslam müqavimət cəbhəsini formalaşdırdı, zülmə qarşı mübarizə dalğalarını bütün dünyaya yaydı. Bu yol sonradan onun layiqli davamçısı olan Şəhid Ayətullah Seyid Əli Xamenei (r) tərəfindən davam etdirildi, daha da inkişaf etdirildi və uca zirvələrə yüksəldildi. Uca Allahın yardımı ilə bu yol bu gün də İslam İnqilabının Ali Məqamlı Rəhbəri həzrət Ayətullah Seyid Müctəba Xamenei (Allah onu qorusun) tərəfindən davam etdiriləcəkdir, inşallah.
İmam Xomeyninin (r) vəfatının 37-ci ildönümündə, 15 Xordad qiyamının 63-cü ildönümündə və İran xalqının, qüdrətli Silahlı Qüvvələrin və İslam müqavimətinin Ramazan ayında baş vermiş müharibəsindən sonra, İmam Xomeyninin (r), Şəhid Ayətullah Seyid Əli Xameneinin(r) və ali məqamlı şəhidlərin (Allah onlara riayət eləsin) xatirəsini yad edərək hamımız bu nurlu yolun davamı, yüksək İslam ideallarının gerçəkləşməsi, böyük İran xalqının daha da parlaq gələcəyi və İslamın, eləcə də İslam ümmətinin qələbəsi naminə sadalanan xüsusiyyətlərin qorunmasına ciddi şəkildə bağlı qalmalıyıq.
Eyni zamanda aşağıdakı strateji məqamları xüsusi əhəmiyyətlə nəzərə almalı və həyata keçirməliyik:
A) Cəmiyyətdə və xüsusilə gənclər arasında yaranan yeni ehtiyaclara, müasir tələblərə, suallara və çağırışlara diqqət yetirmək zəruridir. Bununla yanaşı, 15 Xordad hərəkatının saflığını, kimliyini və orijinallığını, İslam İnqilabının uca ideallarını, ali məqamlı şəhidlərin amalını, İmam Xomeyninin (r) və Şəhid Ayətullah Xameneinin (r) düşüncə və tövsiyələrini qorumaq vacibdir. Qarşıdakı mərhələlərin tamamlanması, müqavimət və tərəqqi zəncirinin davam etdirilməsi hər birimizin əsas vəzifəsi və məqsədi olmalıdır.
C) 15 Xordad hərəkatının davamı və inkişafı üçün İslamla küfr arasında gedən müasir, hərtərəfli mübarizənin mahiyyətini düzgün dərk etmək zəruridir. Bu qarşıdurma izzət, istiqlal, şərəf və azadlıq uğrunda aparılan böyük bir savaşdır. Bu yolda qələbə qazanmaq üçün İslam mədəniyyətinə, tərəqqiyə, ədalətə və müqavimət ruhuna söykənmək vacibdir. Siyasət formalaşdıran qurumlar və dövlət rəhbərləri idarəçilikdə, iqtisadiyyatda, təhlükəsizlikdə və mədəniyyət sahəsində bu düşüncə xəttinə uyğun addımlar atmalı, xalqın fəaliyyət imkanlarını genişləndirməli, İslam təfəkkürünü, özünəinam mədəniyyətini və ağıllı, cəsarətli müqavimət strategiyasını əsas meyar kimi qəbul etməlidirlər.
Böyük İran xalqı, xüsusilə də gənclər və İslam ümməti öz müqəddəs birliyi və ilahi oyanışı ilə bu yolda irəliləməlidir. Bu mübarizə meydanında maddi və mənəvi imkanların, proqramların, vasitələrin, güc və potensialların davamlı şəkildə yenilənməsi, gücləndirilməsi və yenidən qurulması zəruridir.
İdrak, düşüncə və informasiya müharibəsində, eləcə də hadisələrin təqdimatı və şərhində milli və beynəlxalq səviyyədə meydanın yenidən təşkilinə və yeni strategiyaların hazırlanmasına ciddi ehtiyac vardır. Düşmən bu istiqamətdə bir neçə əsas xətt üzrə fəaliyyət göstərir:
Cəmiyyətin və gənclərin dini, mənəvi və maarifləndirici əsaslarını sarsıtmaq, İslam mədəniyyətinin, milli kimliyin, həmçinin saf İran-İslam həyat tərzinin təməl prinsiplərinə hücum etmək;
İran və İslam düşmənlərinin – Pəhləvi rejimindən tutmuş Amerika və onun tərəfdarlarına qədər – xəyanətlərini və zəifliklərini kiçiltmək, onların qara və rüsvayedici keçmişini təmizə çıxarmağa çalışmaq;
İnqilabın, İslam Respublikasının və böyük İran xalqının müxtəlif sahələrdə qazandığı möhtəşəm nailiyyətləri kiçiltmək;
Düşmənlərin güclü tərəflərini və uğurlarını şişirtmək, hətta yalan məlumatlar vasitəsilə onları olduğundan böyük göstərmək;
Ölkədə mövcud olan və ya ehtimal edilən problemləri, çatışmazlıqları və nöqsanları həddindən artıq böyütmək.
Bütün bu fəaliyyətlərin məqsədi xalqın, xüsusilə gənc nəslin inamını, ümidini və müqavimət ruhunu zəiflətmək, İran və İslamın kimliyinə və mənəvi əsaslarına zərbə vurmaq, ədalət, izzət və azadlıq çağırışlarını susdurmaq, İslam düşüncəsinin və İslam sivilizasiyasının işığını söndürməkdir.
Bu fitnə və təxribatların qarşısında bir tərəfdən hövzə və universitet alimləri, mədəniyyət, iqtisadiyyat və siyasət sahələrinin məsul şəxsləri yeni şəraitə uyğun fəaliyyət meydanı formalaşdırmalı, digər tərəfdən isə elm, fikir, mədəniyyət, incəsənət və media xadimləri, aidiyyəti dövlət və beynəlxalq qurumlar, xüsusilə də məsuliyyətli universitet müəllimləri, fəal hövzə tələbələri, ayıq və məlumatlı ruhaniyyət nümayəndələri, qeyrətli və vətənpərvər gənclər, güclü bəsic qüvvələri bu düşüncə və idrak cəbhəsində daha geniş iştirak etməlidirlər.
Onlar analizlər, ideyalar, rəvayətlər və ictimai fikrin formalaşdırılması sahəsində yeni təşəbbüslər ortaya qoymalı, daha güclü hazırlıq görməli, daha böyük imkanlar toplamalı və bu böyük maarifləndirmə, təfəkkür və izah cihadını daha da genişləndirməlidirlər. Bu istiqamətdə hamımız məsuliyyət daşıyırıq və səhlənkarlığa yer yoxdur.
Bu müqəddəs yolda uca Allahdan yardım diləməli, ilahi övliyalara və xüsusilə də həzrət İmam Zamana (ə.f) təvəssül etməliyik.
E) Ramazan ayında baş vermiş müharibə haqq ilə batilin, İslam ordusu ilə Amerika və sionist təkəbbürlü cəbhənin qarşıdurmasının zirvə nöqtəsi, 15 Xordad hərəkatının davamı, mərhum İmam Xomeyninin (r) və şəhid Ayətullah Seyid Əli Xameneinin (r) ali ideyalarının təcəssümü, həmçinin böyük İran xalqının, qüdrətli silahlı qüvvələrin, müqavimət cəbhəsinin və inqilabi siyasətçi və idarəçilərin müqavimət tarixində parlaq bir mərhələdir.
Bu həlledici dövrdə alimlərin, ziyalıların, dövlət və hərbi rəsmilərin, xüsusilə də universitet və hövzə elm adamlarının üzərinə ağır vəzifələr düşür. Cəmiyyətin bütün sahələrində, o cümlədən həm maddi imkanlar, həm də düşüncə və mədəniyyət müstəvisində onların təşəbbüsünə, liderliyinə, yaradıcılığına və strateji baxışına ciddi ehtiyac vardır.
Xüsusilə aşağıdakı istiqamətlərdə daha böyük fəaliyyət gözlənilir:
Yeni İslam sivilizasiyasının nəzəri əsaslarının hazırlanması;
İran-İslam inkişaf və ədalət modelinin formalaşdırılması və həyata keçirilməsi;
Cəmiyyətin ehtiyaclarına və İslam düşüncəsinə əsaslanan fundamental və tətbiqi elmlərin inkişaf etdirilməsi;
İslam humanitar elmlərinin istehsalı və genişləndirilməsi;
Elm və texnologiyanın ön cəbhələrində irəliləyişlərin təmin olunması;
Güclü və müqavimətə əsaslanan mədəniyyətin və iqtisadiyyatın qurulması;
Elm, mədəniyyət, təhsil və tərbiyə sistemlərinin, eləcə də hövzə və universitetlərin yenidən qurulması və təkmilləşdirilməsi;
Gənclərin və ictimai rəyin maarifləndirilməsi və inandırılması;
Elmi, iqtisadi, mədəniyyət və izahedici cihadın daha da gücləndirilməsi.
Yeni şəraitə uyğun olaraq bu sahələrdə daha böyük hərəkətlilik və dönüş yaradan təşəbbüslər gözlənilir.
V) Dünya alimlərindən, ziyalılarından və xüsusilə İslam ölkələrinin elm və fikir adamlarından gözlənilir ki, İslam düşmənlərinin təbliğat toruna düşməsinlər və haqq ilə batilin bu böyük qarşıdurmasında tarixin doğru tərəfində yer alsınlar. Onlar İslam dünyasının alimləri və dini rəhbərləri ilə birlikdə İslamı, müqavimət cəbhəsini və İslam İnqilabının düşüncə xəttini müdafiə etməlidirlər. Çünki tarixin taleyüklü məqamlarında meydandan kənarda qalmaq ağır və bərpası çətin nəticələr doğurur.
Eyni zamanda region xalqlarının ayıq və müsəlman gənclərindən, həmçinin dünyanın məzlum və azadlıqsevər insanlarından gözlənilir ki, İslam tarixinin bu həssas mərhələsində İslamın və müqavimət cəbhəsinin yanında dayansınlar, yeni yaranmış tarixi imkanları İslam gücünün formalaşdırılması, İsrail və Amerikanın məğlubiyyəti, bölgənin xarici və Amerika qüvvələrinin təsirindən azad edilməsi üçün dəyərləndirsinlər və hərtərəfli mübarizəyə qoşulsunlar.
Z) Region dövlətlərinə xatırladırıq ki, öz izzətini, istiqlalını, şərəf və ləyaqətini Amerika, İsrail və digər xarici güclərlə əlaqədə axtarmasınlar. Onlar öz yollarını bu saxta və kövrək güclərdən ayırmalı, öz xalqlarına yaxınlaşmalı və bölgədə baş verən yeni dəyişiklikləri düzgün dərk etməlidirlər.
Bilməlidirlər ki, qüdrətli rəhbərlik, güclü silahlı qüvvələr, İslam Respublikası, İslam İnqilabı, müqavimət cəbhəsi və İranın müdrik, şüurlu və cəsur xalqı region ölkələrinin xeyrini istəyir, onlarla dostluq və islami münasibətlərin inkişafına maraqlıdır.
Özünüzü Allahın qəzəbindən, İslam ümmətinin və öz xalqlarınızın narazılığından uzaq tutun. Bu halda birlikdə bölgəni inkişaf etmiş, müstəqil və nümunəvi bir bölgəyə çevirə bilərik.
Lakin İran İslam Respublikası heç vaxt düşmən bazalarının mövcudluğunu əvvəlki dövrlərdə olduğu kimi qəbul etməyəcək və düşmənlərin muzdurlarının xəyanəti qarşısında səbir göstərməyəcəkdir.
İlahi peyğəmbərlərin, Allah dostlarının və ali məqamlı şəhidlərin, xüsusilə də İmam Xomeyninin(r) və şəhid Ayətullah Seyid Əli Xameneinin (r) pak ruhlarına salam və ehtiramla, uca Allahdan böyük İran xalqına, əziz silahlı qüvvələrə, müqavimət cəbhəsinə, xalqa xidmət edən bütün şəxslərə, xüsusilə də İslam İnqilabının Ali Məqamlı Rəhbərinə (Allah onu qorusun) uğur, izzət və başucalığı, həmçinin İslam ordusuna təkəbbürlü qüvvələr üzərində qələbə nəsib etməsini diləyirəm.
Ölkə üzrə Elmi hövzələrin rektoru
Əlirza Ərafi
Rəyiniz