Hövzə xəbər agentliyinin verdiyi məlumata görə,Höccətül-islam Höccət Qasimxani bu gün Xoy şəhərinin məscidində keçirilən cümə namazı xütbəsində bildirib:
“Beynəlxalq arenada "müharibə kölgəsi" elə bir vəziyyətdir ki, güclü dövlətlər birbaşa hərbi qarşıdurmaya girmədən, maraqlarını təmin etmək və təhlükələri neytrallaşdırmaq üçün gərginlik və qeyri-sabitlik yaradırlar. Müharibə kölgəsi psixoloji müharibə vasitəsilə analitiklərin və qərar qəbul edənlərin hesablamalarını təhrif edə, ölkə idarəçiliyini real problemlərdən uzaq sala və milli təhlükəsizliklə iqtisadiyyatı risk altına qoya bilər.
O əlavə edib: Amerikalılar 46 ildir ki, İranı təhdid edirlər və indi, dörd onillikdən sonra, Tramp İran xalqını yüzlərlə dəfə təhdid edənlər sırasına qoşulub. Halbuki xəyali müharibə kölgəsi arxasında həqiqi müharibə artıq çoxdan başqa bir sahədə - iqtisadi istiqamətdə başlayıb. Bəzi qüvvələr müxtəlif bəhanələrlə xalqı və dövləti bu əsas müharibədən yayındırmağa çalışırlar. Müharibə kölgəsi ilə aldanışın iki nəticəsi var: Birincisi, iqtisadi savaş meydanında gedən real mübarizəni unutmaq, ikincisi isə ölkəni xəyali müharibədən xilas etmək bəhanəsi ilə məcburi danışıqlara sürükləməkdir.

Xoy şəhərinin imam cüməsi bildirib:
Fərz edək ki, İran və ABŞ arasındakı gərginlik müharibəyə çevrilir. Bu müharibənin üç mümkün forması var: məhdud müharibə, genişmiqyaslı müharibə və vasitəçi qüvvələr vasitəsilə aparılan müharibə. Birinci ehtimalda ABŞ və ya onun bölgədəki müttəfiqləri, məsələn, sionist rejim, İranın nüvə obyektlərinə və ya hərbi bazalarına məhdud hücumlar edərək İrana təzyiq göstərməyə çalışa bilər. Belə bir vəziyyətdə, İranın cavabı böyük ehtimalla ABŞ-ın həmin bazalarının yerləşdiyi ölkələrdəki obyektlərinə raket və pilotsuz uçuş aparatları ilə hücumlar olacaq.
O əlavə edib: ABŞ-ın İrana qarşı ehtimal olunan müharibəsinin nəticələri arasında Fars körfəzində təhlükəsizliyin pozulması, qlobal enerji axınının təhdid edilməsi, neft qiymətlərinin artması və beynəlxalq iqtisadi böhranların dərinləşməsi var. Bundan əlavə, beynəlxalq təşkilatların atəşkəs və gərginliyin azaldılması üçün müdaxilə etməsi gözlənilir. Əgər genişmiqyaslı müharibə baş verərsə, İran və Müqavimət Cəbhəsinin müttəfiqləri hərtərəfli cavab verəcəklər. Bu, Hörmüz boğazının bağlanması və qlobal neft ticarətinin pozulmasını, ABŞ bazalarına, hətta Qətər və BƏƏ-də yerləşən bazalara raket hücumlarını, sionist rejimin təhdid olunmasını və Livan ilə işğal olunmuş Fələstin sərhədlərində gərginliyin artmasını əhatə edəcək.

Höccətül-islam Qasimxani bildirib:
Bu müharibənin ən mühüm, eyni zamanda müsbət nəticələrindən ikisi bunlardır: Birincisi, ABŞ-ın insan və maliyyə itkiləri səbəbilə bölgədən mümkün çıxışı; ikincisi isə güc balansının İran və Müqavimət Cəbhəsinin xeyrinə dəyişməsi. ABŞ-ın geri çəkilməsi və İranın çəkindirici gücünün qələbəsi ən mümkün nəticədir. Bunun əsas səbəbi İranın yüksək çəkindirici qabiliyyəti, eləcə də ABŞ-ın daxili siyasi çətinlikləri, iqtisadi böhranları və ictimai rəyin yeni müharibələrə qarşı olmasıdır.
O, həmçinin ABŞ-ın dolayı yollarla müharibə aparmaq ehtimalına toxunaraq deyib:

ABŞ birbaşa qarşıdurmaya girmək əvəzinə, İrana qarşı dolayı müharibə metodlarından istifadə edə bilər. Bu, terrorçu qruplara maliyyə, silah və logistika dəstəyi vermək, etnik və məzhəbi gərginliyi artırmaq üçün separatçı qrupları qızışdırmaq, İran daxilində və sərhədlərində sabitsizlik yaratmaq, təxribatlar, terror hücumları və hərbi komandirlərin sui-qəsdlərini təşkil etməklə həyata keçirilə bilər. Bu, Amerikanın İran xalqına qarşı ənənəvi düşmənçilik taktikalarındandır.

O bildirib, İranın bu təhdidlərə qarşı effektiv cavabı, Müqavimət qrupları ilə əməkdaşlığın gücləndirilməsi, raket potensialının inkişaf etdirilməsi və daxili təhlükəsizlik orqanları vasitəsilə daxili təhdidlərə qarşı qətiyyətli mübarizə aparmaq olacaq.

Höccətül-islam Qasimxani çıxışında İran və ABŞ arasında diplomatik münasibətlərin kəsilməsinin ildönümünə toxunaraq bildirib:
1979-cu ilin aprelin 7-də ABŞ prezidenti Cimmi Karter İran İslam Respublikası ilə siyasi və ticarət əlaqələrinin kəsilməsinə dair göstəriş verdi. Bu qərar, Tehrandakı ABŞ səfirliyinin ələ keçirilməsindən beş ay sonra baş verdi.

O əlavə edib: ABŞ tarixi boyu dəfələrlə göstərib ki, xarici siyasətində maraqlarını təmin etmək üçün heç bir qanunsuz və qeyri-etik addımdan çəkinmir. Onlar istənilən səviyyədə müqavilələri və sazişləri əsassız bəhanələrlə pozmağa hazırdırlar.
Xoy şəhərinin  imam cüməsi, həmçinin aprelin 9-da qeyd olunan Milli Nüvə Texnologiyası Gününün əhəmiyyətinə toxunaraq deyib:

İllər boyu xarici və daxili düşmənlər daim İran xalqının beyninə bu fikri yeritmək istəyiblər ki, 'siz özünüzü idarə edə bilməzsiniz', 'inkişaf yolunda irəliləyə bilməzsiniz' və ya 'heç vaxt dünya ilə ayaqlaşa bilməzsiniz'. Lakin hər bir elmi nailiyyət, xüsusilə nüvə texnologiyasındakı irəliləyişlər, bu əsassız iddialara tutarlı cavabdır. Bu uğurlar, izzət, müstəqillik və azadlığı hər şeydən üstün tutan bir millətin müqavimətinin rəmzidir."

Xoy şəhərinin  imam cüməsi son günlər sionist rejiminin Suriyaya olan hücumlarına toxunaraq bildirib:
Colani son günlər yeni kabinetini 5 illik müddətə elan edərkən azlıqlara meydan vermək görüntüsü yaratmağa çalışırdı. Lakin "Təhrir əl-Şam" terrorçuları Colaninin rəhbərliyi altında Suriyanın nəzarətini ələ keçirdikdən sonra ölkə xalqının problemləri əhəmiyyətli dərəcədə artıb. Colani populist vədlərlə özünü Dəməşqin hakimi kimi göstərdi, lakin zaman sübut etdi ki, onun hakimiyyəti nə qanunidir, nə də xalqa xidmət edir. Əksinə, bu, yalnız Suriyanı məhv etməyə çalışan dağıdıcı bir qrupdur."

O əlavə edib:"Colaninin ən mühüm addımlarından biri Suriya iqtisadiyyatını çökdürmək olub. Onun hakimiyyəti dövründə dövlət işçilərinə qarşı ədalətsiz siyasətlər həyata keçirilib. Rabitə, neft, səhiyyə və təhsil nazirliklərinin əsas işçilərini kütləvi şəkildə işdən çıxarmaqla dövlət qurumlarının strukturunu iflic vəziyyətinə salıb.

Höccətül-islam Qasimxani bildirib: Colani hökuməti sülh yaratmaq əvəzinə, dünya ictimaiyyətini şoka salan cinayətlər törədib. Daha əvvəl onlara amnistiya verilmiş 9000 suriyalı hərbçinin həbs edilməsi, bu cinayətlərin yalnız kiçik bir hissəsidir. Son 100 gün ərzində 1500-dən çox Ələvi öldürülüb və minlərlə digər insan kütləvi qətliamlarda həyatını itirib. Colani hətta sahil bölgələrində yaşayan Ələvilərin infrastrukturuna da rəhm etməyib və bu ərazilərin 60 faizinin meşələrini yandırıb."

O əlavə edib: Colani rejiminin birbaşa nəticələrindən biri İsrailin Suriya torpaqlarının daha böyük hissəsini işğal etməsi oldu. Colaninin hakimiyyətinin ilk iki həftəsində İsrail Suriyaya 105 hava hücumu həyata keçirdi. Bu hücumların nəticələri fəlakətli idi: Suriya ordusunun yerüstü silahlarının 60 faizi məhv edildi, hava bazalarının 30 faizi dağıdıldı və Suriya Hərbi Hava Qüvvələrinin 96 faizi  döyüş təyyarələri məhv oldu. Bundan əlavə, 60 faiz hərbi helikopterlər və 40 faiz sursat anbarları da hədəfə alındı. Bu statistika göstərir ki, Suriya faktiki olaraq müdafiə qabiliyyətini itirib və Colaninin hakimiyyəti altında xarici hücumlara qarşı müdafiəsiz qalıb.

Xoy şəhərinin  imam cüməsi, həmçinin Amerikanın Yəməndəki uğursuzluğuna toxunaraq bildirib:
Yəmən xalqı, Fələstinin məzlum insanlarını müdafiə etmək və İsrailin Qəzza zolağına hücumlarına cavab vermək üçün işğal olunmuş ərazilərə gedən gəmilərə və İsrailə qarşı hücumlara başlayıb. ABŞ isə ilk hərbi missiyasını Yəməndə həyata keçirməyi qərara alıb və son həftələrdə Yəmənin müxtəlif bölgələrinə davamlı hücumlarla Ənsarullah və Yəmən xalqını təslim etməyə çalışır. ABŞ-ın əsas məqsədi Ənsarullahın raket potensialını məhv etməkdir. Lakin buna baxmayaraq, Yəmən inqilabçılarının Amerika və İsrailə qarşı hücumları davam edir. Bu isə Amerikanın Yəmənə qarşı missiyasının uğursuzluğunu və Tramp administrasiyasının Yəmənlilərlə mübarizədə məğlubiyyətini göstərir.

Mətnin sonu.