Hövzə xəbər agentliyinin Təbrizdən verdiyi məlumata görə, Məsud Pezeşkiyan qeyri-rəsmi səfəri çərçivəsində Təbrizə gəlib və mübarək Ramazan ayının iyirmi üçüncü gecəsində qəfil şəkildə Təbriz Universitetinin məscidinə baş çəkərək Qədr gecəsi mərasimində iştirak edib.

O, gecəni ibadətlə keçirən insanlarla qısa çıxış edib və Qurani-Kərimin təlimlərinə əməl etməyin vacibliyini vurğulayıb.

Pezeşkiyan, "Qədr" surəsinə toxunaraq bildirib: "Quran yalnız oxumaq üçün deyil, əməl etmək üçün nazil olub. Allah bu kitabı bizə göndərib ki, bizi qaranlıqlardan nura, zillətdən izzətə yönəltsin.

O əlavə edib: Hər birimiz Qədr gecəsində öz yolumuzu müəyyənləşdirməliyik. Əgər mövcud vəziyyətimizdən razı olsaq, heç bir dəyişiklik baş verməyəcək. Amma daha yaxşı olmağa qərar versək, Quran da bizdən məhz bunu istəyir.

Pezeşkiyan Mövlanənin şeirlərinə və Cöşən-Kəbir duasına istinad edərək vurğulayıb: Cöşən-Kəbirdə oxuduğumuz hər şey bizim üçündür. Biz doğru yolu tapmalı və bilməliyik ki, indiki halımız həqiqi məqamımız deyil. Hər kəs hansı mövqedə olursa-olsun, daha yaxşı olmaq üçün çalışmalıdır.

Pezeşkiyan davam edərək bildirib: Bizim ibadət etdiyimiz Allah bütün yaxşılıqların mənbəyidir. Biz Ona doğru hərəkət etməliyik. Ola bilsin ki, heç vaxt Onun kamilliyinə çata bilmərik, amma daim inkişaf və həqiqi müsəlman olmaq yolunda irəliləməliyik.

O, həmçinin qeyd edib: Həqiqi müsəlman digər müsəlmanların dərdini hiss edir və İslam cəmiyyətinin izzəti və ucalığı üçün çalışır. Biz elə bir cəmiyyət qurmalıyıq ki, orada İslam dəyərləri tam şəkildə yaşansın.

Prezident Ramazan ayının əhəmiyyətinə toxunaraq deyib: İbadət insanı islah etmək üçündür və Ramazan ayı dəyişmək üçün bir fürsətdir. Bu gecə qərar verməliyik ki, həyatımızda yeni bir səhifə açaq və özümüzü, ailəmizi, məhəlləmizi və ölkəmizi ən gözəl şəkildə formalaşdıraq. Oyanmalıyıq və elə bir bədənə sahib olmalıyıq ki, ruh onun içində canlı olsun, ruhsuz bir cisim kimi yox.

Sonda isə o, ümidvar olduğunu bildirərək deyib: Əgər biz Allaha doğru hərəkət etsək, heç bir qüvvə, hətta Amerika belə, bizim qarşımızı ala bilməz. Dua edin ki, dəyişək və Quranın bizə öyrətdiyi əxlaq, doğruluq, ləyaqət və birlik kimi dəyərlərə yönələk. Allahdan istəyirik ki, bizi xalqımız, şəhidlərimiz və imamımız qarşısında üzüqara etməsin.