Hövzə Xəbər Agentliyinin məlumatına görə, mübarək Ramazan ayında hər gün "Həyatqurucu ayələr" rubrikası ilə birlikdə olaq; bu, Qurani-Kərim ayələrinin qısa və praktik təfsiri ilə müşayiət olunan bir topludur. Bu ayələr həyat və xoşbəxtlik üçün bələdçi rolunu oynayır. Gəlin, Ramazan ayının günlərini Allahın kəlamı ilə daha nurlu edək. 

Höccətul-İslam vəl-Muslimin Cavad Muhddesi:

Bismillahir-Rəhmanir-Rəhim. Allah-Təala Ənkəbut surəsi, 41-ci ayədə gözəl və mənalı bir misal gətirir:

«مَثَلُ الَّذینَ اتَّخَذُوا مِنْ دُونِ اللَّهِ أَوْلِیاءَ کَمَثَلِ الْعَنْکَبُوتِ اتَّخَذَتْ بَیْتًا وَ إِنَّ أَوْهَنَ الْبُیُوتِ لَبَیْتُ الْعَنْکَبُوتِ لَوْ کانُوا یَعْلَمُونَ».

“Allahdan qeyrisini dost və himayədar qəbul edənlərin halı, ev quran hörümçəyin halına bənzəyir. Halbuki evlərin ən zəifi, şübhəsiz ki, hörümçək evidir. Kaş biləydilər!”

Bu ayədə Allah-Təala, Özündən qeyrisinə arxalanan və Allahdan başqasını himayədar qəbul edənlərin halını, özünə ev quran hörümçəyə bənzədir.

Hörümçək evi zahirən dəqiq mühəndisliklə və incə, nizamlı ipliklərlə qurulmuş kimi görünür, amma əslində ən zəif evdir. Sadəcə bir əsinti belə əsərsə və ya ən kiçik bir zərbə olsa, bu ev dərhal dağılacaq və məhv olacaq.

Həyatlarında Allahdan qeyrisinə təvəkkül edib və özlərinə himayədar olaraq varlıları, güclüləri və maddi qüdrətləri seçənlər, son nəticədə fəlakət və dağılma ilə qarşılaşacaqlar.

Onlar, ya tez, ya da gec, görəcəklər ki, bu boş dayaq nöqtələri bir gün boşalacaq və onları saxlayacaq heç bir güc qalmayacaq.

Bütün qüdrətlər Uca Allahın əlindədir və Onun xaricində olan hər şey bir gün dağılacaq. Şəhid Seyid Həsən Nəsrullah, çıxışlarının birində siyonist rejiminə ünvanlanmış sözlərində bu ayədən istifadə edərək demişdir:

"Siz, zəif və boş evlər qurmusunuz; bu evlər, hörümçək evləri kimi, dayanıqsızdır və asanlıqla dağılacaqdır."

Bu, Qurani-Kərimin işarə etdiyi eyni həqiqətdir; hər bir güc ki, Allahdan başqa bir əsas üzərində qurulubsa, axırda dağılacaq və fəlakətə uğrayacaqdır.

Əgər fərdi, cəmiyyəti, hökuməti və beynəlxalq məsələlərdə arxalanacağımız yeganə dayaq Allahdan başqa bir şey olarsa, biz köməksiz qalacağıq. Qurani-Kərim buyurur:

«اللَّهُ وَلِیُّ الَّذینَ آمَنُوا»؛

"Allah, inananların dostudur"; yəni, Allah inananların həm də himayədarı və himayə edicisidir.

Allaha arxalananlar heç vaxt köməksiz qalmazlar, amma Allahdan başqa birini özlərinə himayədar qəbul edənlər bir gün görəcəklər ki, onların arxalandığı hər şey, hörümçək evi kimi dağılacaq və onları köməksiz qoyacaq.

Mətnin sonu.