Hövzə Xəbər Agentliyinin İsfahandan verdiyi məlumata görə, ağıllı texnologiyaların yayılması ilə birlikdə ənənəvi oyunların uşaqların həyatındakı rolu getdikcə azalır. Psixoloqların fikrincə, əyləncə və oyun uşaqların zehni, emosional və sosial inkişafının ən mühüm amillərindən biri sayılır. Valideynlər, övladları üçün uyğun əyləncə növlərini seçməkdə daha diqqətli olmalıdırlar ki, həm onların yaradıcılıq və maraqlarını gücləndirsinlər, həm də virtual məkanın zərərlərindən qorumuş olsunlar.

Oyun və əyləncənin uşaqların inkişafına təsiri, rəqəmsal dövrün çağırışları

Qüdrətullah Zarean, psixoloq və universitet müəllimi, İsfahandan Hövzə xəbər agentliyinə verdiyi müsahibədə bildirib ki, psixoloqların araşdırmaları uşaqların əsas ehtiyaclarından birinin oyun və əyləncə təcrübəsi olduğunu göstərir. Bu, onların zehni, emosional və sosial inkişafında əsas rol oynayan bir amildir. Oyun təkcə əyləncə vasitəsi deyil, eyni zamanda uşağın maraq, yaradıcılıq və intellektual qabiliyyətlərini inkişaf etdirən bir prosesdir.

O əlavə edib: Uşağa uyğun əyləncə növünün seçilməsi onun tərbiyə yolunu formalaşdıra bilər. Uşaqlar daha yaxşı inkişaf edə bilmələri üçün valideynlərin nəzarəti altında əşyalar və oyuncaqlarla sərbəst şəkildə qarşılıqlı əlaqədə olmaq imkanı qazanmalıdırlar. Bu proses onların ətraf mühiti anlama qabiliyyətini artırır və zehni, sosial bacarıqlarının inkişafına kömək edir.

Psixoloq daha sonra deyib: Ağıllı texnologiyaların yayılması ilə bir çox uşaq fiziki oyunlar əvəzinə mobil telefon və virtual məkana asılı vəziyyətə düşüb. Nəticədə, onların ətraf mühitlə effektiv ünsiyyəti zəifləyib, fiziki və sosial inkişaf üçün lazım olan hərəkətlilik azalıb. Müasir uşaqlar getdikcə daha çox “elektron uşaqlar”a çevrilir və vaxtlarının böyük hissəsini virtual oyunlar və rəqəmsal dünya ilə keçirirlər.

O, bu həyat tərzinin psixoloji və sosial zərərlərinə diqqət çəkərək bildirib ki, uşaqlar çox asanlıqla gördüklərini təqlid edirlər və virtual məkanda qarşılaşdıqları məzmun onların zehni və davranışlarına ciddi təsir göstərə bilər. Bəzi oyunlar zorakılıq, narahatlıq və sosial əlaqələrin zəifləməsi kimi hallara səbəb ola bilər.

Zarean vurğulayıb ki, valideynlər fiziki oyun şəraiti yaratmaqla yanaşı, övladlarının virtual məkanda keçirdiyi vaxt üzərində ciddi nəzarət etməlidirlər. Rəqəmsal dünyanın faydaları inkar edilə bilməz, lakin nəzarətsiz və sərhədsiz istifadəsi uşağın inkişaf və tərbiyəsi üçün mənfi nəticələr doğura bilər.

O, sonda qeyd edib ki: Uşaqların sosial bacarıqlarının inkişafı üçün qrup oyunlarına, həmyaşıdları ilə ünsiyyətə, rəqabətə və fiziki fəaliyyətlərə ehtiyacı var. Bu baxımdan, qumla oyun, plastilinlə məşğuliyyət, hərəkətli fəaliyyətlər, pazl oyunları və rəsm çəkmək kimi oyunlar uşağın hərtərəfli inkişafına kömək edə bilər.

Mətnin sonu.