Hövzə Xəbər Agentliyinin tərcümə qrupu xəbər verir ki, Pakistanın Dini İşlər və Məzhəblərarası Əməkdaşlıq Nazirliyi ilk dəfə olaraq Qurani-Kərimin gözəl tilavəti üzrə beynəlxalq müsabiqəni Pakistanın İslamabad şəhərində möhtəşəmliklə keçirmişdir. Qurana ülfət dolu bir mənəvi atmosfer yaradan bu tilavət tədbirində tanınmış qarilərin və 37 İslam ölkəsindən olan nümayəndələrin iştirakı xüsusi bir gözəllik yaratmışdır.
Bu mərasimdə Pakistan Şiə Alimləri Şurasının sədr müavini Höccətül-İslam vəl-müslimin Arif Hüseyn Vahidi açılış proqramında və yarışların final mərhələsində iştirak edib. O, tədbirin kənarında Pakistanın Federal Dini İşlər Naziri Sərdar Məhəmməd Yusif, Milli Assambleyanın sədri Sərdar Ayaz Sadiq, İran İslam Respublikasının səfiri Rza Əmiri Müqəddəm və bir sıra tanınmış dini və siyasi şəxslərlə görüşüb söhbət etmişdir.
Quranın İslam ümmətinin birliyində rolu
Höccətül-İslam vəl-müslimin Arif Hüseyn Vahidi çıxışında Qurani-Kərimi “bəndəlik qanunu, həyat manifesti və insan həyatının ən kamil proqramı” kimi təsvir edib və bu beynəlxalq yarışların keçirilməsini Qurani-Kərimin nurlu mədəniyyətinin təbliği yolunda böyük və tarixi bir addım adlandırıb.
O əlavə edib ki, Quran tilavəti sahəsində Pakistanın bu ilk qlobal təcrübəsi təkcə ölkə üçün milli bir qürur deyil, eyni zamanda Quran maarifinin genişlənməsi və cəmiyyətin dini kimliyinin möhkəmlənməsi üçün mühüm bir zəmin sayılır.
Pakistanın tanınmış alimi proqramın mənəvi bərəkətlərinə ümidvar olduğunu bildirərək vurğulayıb ki, ilahi rəhmət, davamlı inkişaf, ictimai sabitlik və daha çox aramlıq Qurani-Kərimlə ünsiyyətdən və ona diqqətdən doğan bərəkətlərdəndir və Pakistan üçün də belə faydalar gətirəcəkdir.
Birlik, həmrəylik və qardaşlıq mesajı
O həmçinin müxtəlif ölkələrdən tanınmış qarilərin iştirakını dünya ictimaiyyətinin Pakistana olan etimad və ehtiramının bir göstəricisi hesab edərək belə bildirib: Dünyanın hər yerindən seçilmiş Quran tilavətçilərinin iştirakı Pakistan xalqı üçün böyük bir şərəfdir və bu proqram İslam ümmətinə və bütün dünyaya birlik, həmrəylik və qardaşlıq barədə aydın bir mesaj çatdırır.
Qurani-Kərim – ümmətin ortaq mövqeyi və birliyin meyarıdır
Höccətül-İslam vəl-müslimin Arif Vahidi Qurani-Kərimin müsəlmanlar arasındakı əvəzolunmaz mövqeyini vurğulayaraq belə dedi: “Qurani-Kərim İslam ümmətinin ortaq mərkəzidir. Həmçinin hidayət mənbəyi olan, insan tərbiyə edən, hər cür təhrifdən qorunmuş və bütün İslam məzhəbləri tərəfindən qəbul edilən bir kitabdır.” O əlavə etdi ki, əgər İslam ümməti bu ilahi kitabı öz işlərinin meyarı və əməl proqramı kimi qəbul etsə, həqiqi vəhdətin gerçəkləşməsi mümkündür və əldə edilə biləcək bir hədəfdir.
Bu müsabiqələrin mənəvi atmosferi və Qurani-Kərimin İslam ümmətini birləşdirmə roluna edilən vurğular, bu tədbiri Pakistanın Quran fəaliyyətləri tarixində mühüm bir dönüş nöqtəsinə çevirmişdir.
Xəbərin sonu.
Rəyiniz