Hövzə Xəbər Agentliyinin məlumatına görə, Qısamüddətli Təlim və Təhsil İmkanları İnstitutunun qəbul və əlaqələr üzrə müavini Dr. Yəzdiyan, bu elmi konfransın əvvəlində rusiyalı qonaqları salamlayaraq institutun mahiyyəti və fəaliyyəti haqqında məlumat verdi. O bildirdi ki: "Qısamüddətli Təlim Mərkəzi, dünyanın müxtəlif ölkələrindən olan iştirakçılar üçün təlim və bilik artırma proqramları təşkil edən bir qurumdur. Bu mərkəzdə iştirakçılar İslam elmləri və humanitar sahələr üzrə müxtəlif kurslarda təhsil alırlar."

O həmçinin institutun əsas məqsədləri kimi elmi elitanın qarşılıqlı əlaqəsinin artırılmasını, yerli və xarici alimlər arasında elmi dialoqun möhkəmləndirilməsini, habelə İranın mədəniyyəti və sivilizasiyası ilə tanışlığı qeyd etdi. Dr. Yəzdiyan, təlim proqramlarının tələbələrə uyğun şəkildə təşkil edildiyini və qəbul prosesinin də bu əsasda həyata keçirildiyini vurğuladı.

Konfransın elmi katibi Höccətül-İslam vəl-müslimin Nəcəfi isə İslamı rəhmət dini kimi təqdim edərək Ali-İmran surəsinin 64-cü ayəsinə istinad etdi və dedi: "İslamın baxışı millətlərə və digər dinlərə qarşı deyil, zülm, istibdad və təkəbbürə qarşıdır." O, həmçinin Qurani Kərimə əsaslanaraq İslam İnqilabının Ali Rəbərinin Hz. İsa və Hz. Musanın (ə) həyatında ədalətin yeri ilə bağlı fikirlərinə toxundu.

Kazan şəhərində yerləşən Müqəddəs Nikolay Kilsəsinin baş keşişi Nikita Kuznetsov, çıxışı zamanı Rus Pravoslav kilsəsi ilə bağlı elmi kompleks və məktəblər haqqında məlumat verdi. O, Rus Pravoslav kilsəsinin ölkənin ən böyük kilsəsi olduğunu və bir çox ölkələrdə nümayəndəliklərinin fəaliyyət göstərdiyini vurğulayaraq dedi: "Kilsənin əsas məqsədi sülh, dostluq və dinc birgə yanaşı  yaşamaqdır."

Kazan şəhərindəki Baş Yeparxiyasasına bağlı kilsənin baş rahibi Raman Modin, Rusiyada müxtəlif dinlərin nümayəndələrinin dinc birgə yaşayışına diqqət çəkərək bildirdi: Dinlər arasında qarşılıqlı anlaşma və sülh içində yaşamaq, bu mühitdən uzaq olanlar üçün belə təəccüblüdür.
O qeyd etdi ki, mənəvi və ruhi enerji bütün dinlərdə ortaq xüsusiyyət kimi mövcuddur.

Kazan Pravoslav Dini Məktəbinin İslam Araşdırmaları şöbəsinin rəhbəri Roqatin Vladimir Nikolayeviç isə çıxışı zamanı bu məktəbdə aparılan dinlərarası dialoqla bağlı müzakirələrdən söz açdı və İslam dünyası ilə əlaqələr qurmaq məqsədilə strateji bir qrupun formalaşdırıldığını elan etdi.

Eyni məktəbdə İslam Araşdırmaları kafedrasının dosenti Yelena Sergeyevna Roqatina dinlərarası dialoqun əhəmiyyətini vurğulayaraq, İran və Rusiyada dini liderlərin vəzifəsini milli, dini və məzhəbi gərginliklərin qarşısını almaq baxımından olduqca mühüm hesab etdi.

Tədbirin sonunda dinlər üzrə birgə tədris proqramlarının təşkili, mədəni uçurumların azaldılması üçün model təklifləri, və dinlərarası dialoqun gücləndirilməsi məqsədilə praktik həll yolları ilə bağlı suallar səsləndirildi. Bununla yanaşı, rusiyalı qonaqlara xatirə hədiyyələri təqdim olundu.