Hövzə Xəbər Agentliyinin məlumatına görə, bu gün axşam saatlarında Pakistanın Baş naziri cənab Şahbaz Şərif və onu müşayiət edən nümayəndə heyəti ilə görüşən İslam İnqilabının Ali Rəhbəri Həzrət Ayətullah Xamenei, Pakistanın İslam dünyası daxilində xüsusi mövqeyinə toxunaraq, Qəzzada sionist rejimin cinayətlərinin dayandırılması üçün İran və Pakistan arasında birgə və təsirli fəaliyyətlərin zəruriliyini vurğuladı.

Görüşün əvvəlində Ali Rəhbər Pakistanla Hindistan arasında müharibənin başa çatmasından məmnunluq ifadə edərək iki ölkə arasında fikir ayrılıqlarının sülh yolu ilə həll olunacağına ümid etdiyini bildirdi. O, son illər ərzində Fələstin məsələsində Pakistanın çox yaxşı və qətiyyətli mövqe sərgilədiyini qeyd edərək dedi: Son illər ərzində İslam ölkələrinin sionist rejimlə münasibət qurması üçün müxtəlif təhrikedici səylər göstərilsə də, Pakistan bu cür vəsvəsələrin təsiri altına düşməyib.

Həzrət Ayətullah Xamenei müsəlman ümmətinin dünya arenasında daha böyük nüfuza malik olması üçün sahib olduğu geniş potensiala diqqət çəkərək əlavə etdi: Dünyada müharibəsevərlərin qarşıdurma və parçalanma yaratmağa çoxlu marağı olduğu bir vaxtda, İslam ümmətinin təhlükəsizliyini təmin edə biləcək yeganə yol İslam ölkələri arasında həmrəylik və bu ölkələr arasındakı əlaqələrin gücləndirilməsidir.

O, Fələstin məsələsini İslam dünyasının birinci problemi adlandıraraq Qəzzadakı acınacaqlı vəziyyətə toxundu və bildirdi: Hazırkı vəziyyət o həddə çatıb ki, Avropa və ABŞ-da sadə insanlar küçələrə çıxaraq öz hökumətlərinə etiraz edirlər. Təəssüf ki, belə bir vəziyyətdə bəziləri özlərini İslam dövləti adlandırmalarına baxmayaraq, sionist rejimin tərəfində dururlar.

İslam İnqilabının Ali Rəhbəri vurğuladı ki, İran İslam Respublikası və Pakistan birgə əməkdaşlıqla İslam dünyasında təsirli rol oynaya bilər və Fələstin məsələsini yanlış yoldan çıxara bilərlər. O, əlavə etdi: Biz İslam dünyasının gələcəyinə nikbin yanaşırıq və bir çox hadisələr bu nikbinliyimizi təsdiqləyir.

Həzrət Ayətullah Xamenei, İran və Pakistan arasındakı münasibətləri daim səmimi və qardaşcasına qiymətləndirərək Pakistanın İranın müqəddəs müdafiə (İran-İraq müharibəsi) dövründəki yaxşı mövqeyini bu qardaşlıq münasibətlərinin nümunəsi kimi göstərdi. Bununla belə, hazırkı əməkdaşlıqları gözlənilən səviyyədən aşağı qiymətləndirərək dedi: İki ölkə bir çox sahələrdə bir-birinə yardım edə bilər. Ümid edirik ki, bu səfər əlaqələrin hərtərəfli genişlənməsinə, xüsusilə iqtisadi, siyasi və mədəni sahələrdə, təkan verəcək.

Ali Rəhbər həmçinin İran və Pakistanın İqtisadi Əməkdaşlıq Təşkilatını (EKO) daha fəal və təsirli hala gətirmək üçün əməkdaşlığının vacibliyini də vurğuladı.

Görüşdə İran Prezidenti cənab Məsud Pezeşkian da iştirak edirdi. Pakistanın Baş naziri cənab Şahbaz Şərif, Ali Rəhbərlə görüşdən böyük məmnunluq duyduğunu bildirib, Pakistan və Hindistan arasında baş verən gərginliyin səngidilməsində İran İslam Respublikasının müsbət roluna görə təşəkkürünü ifadə etdi. O, son qarşıdurmalarla bağlı məlumat verərək Qəzza məsələsinə toxundu və dedi: Təəssüf ki, beynəlxalq ictimaiyyət Qəzzada baş verən fəlakətin dayandırılması üçün heç bir təsirli tədbir görmür.

Pakistanın Baş naziri, Tehranda apardığı faydalı və konstruktiv danışıqlara istinad edərək bu səfərin iki ölkə arasındakı münasibətlərin daha da genişlənməsi üçün zəmin yaradacağına ümid etdiyini bildirdi.