Hövzə Xəbər Agentliyinin məlumatına görə, Əhli-beyt (ə) Fiqh Mərkəzinin Tibb Məsələri Heyətinin ən yeni elmi əsərlərinin təqdimat mərasimi bu mərkəzin İmam Xomeyni (r) zalında, Qum Elmi Hövzəsinin Müəllimlər Cəmiyyətinin üzvü Ayətullah Məhəmməd Cavad Fazil Lənkərani, eləcə də bir qrup alim və hövzə tələbəsinin iştirakı ilə keçirilib.

Tədbirin əvvəlində mərkəzin Tibb Məsələri Heyətinin müdiri Höccətul-İslam vəl-müslimin Qasimi, bu heyətin elmi və tədris fəaliyyətlərinin formalaşma mərhələsi və inkişaf prosesi barədə ətraflı məlumat verib.

Höccətül-İslam vəl-müslimin Qasimi çıxışında bildirdi ki, Tibb Məsələri üzrə elmi fəaliyyətlər ilkin mərhələdə tədqiqat istiqamətində başlanılıb.
O qeyd etdi: Əvvəllər diqqət mərkəzimiz yalnız elmi araşdırmalara yönəlmişdi, lakin əsas məqsədimiz elə bir elmi-inzibati baza yaratmaq idi ki, bu əsas üzərində rəsmi tədris proqramlarının təşkili və ixtisaslı mütəxəssislərin yetişdirilməsi mümkün olsun. Bu gün, bir neçə il keçdikdən sonra, həmin infrastruktur artıq elə səviyyəyə çatıb ki, ayrıca tədris heyətlərinin formalaşdırılmasına imkan verir.

Əhli-beyt (ə) Fiqh Mərkəzinin Tibb Məsələri Heyətinin müdiri əlavə etdi: Hazırda bu ixtisas üzrə 28 nəfər məzun olub, daha 28 nəfər isə təhsilini davam etdirir. Tələbələrin elmi-tədqiqat və tədris fəaliyyəti ümumilikdə qənaətbəxş səviyyədədir. Məzunların bir çoxu elmi fəaliyyətlərini məqalə yazmaq və tədqiqat layihələri həyata keçirmək yolu ilə davam etdirirlər.

Tibb Məsələrində tədris və tədqiqatın qarşılıqlı vəhdəti

Höccətül-İslam Qasimi tədris və tədqiqat sahələrinin vəhdətinin əhəmiyyətinə toxunaraq vurğuladı: Əgər tədris və tədqiqat sahələri bir-birindən ayrı fəaliyyət göstərsə, bu, müəyyən boşluqlara səbəb olacaq. Lakin bu iki istiqamət bir-birini tamamlayan və ixtisaslaşmış şəkildə yanaşı fəaliyyət göstərsə, daha dərin və geniş elmi nəticələr əldə ediləcək.

O, həmçinin müəllimlərin tələbələrin elmi istiqamətləndirilməsindəki fəal roluna diqqət çəkərək dedi: Hörmətli müəllimlər ixtisaslaşmış mövzuların tədrisi və tələbələri məqsədyönlü tədqiqatlara yönəltməklə proqramların keyfiyyətinin yüksəlməsində mühüm rol oynayırlar. Tələbə və tədqiqatçılardan gözlənilir ki, tədris mövzularını elmi layihə formasında davam etdirsinlər və bu layihələri mərkəzin elmi şuralarında təsdiq etdikdən sonra icraya başlasınlar.

Yeni əsərlərin təqdimatı və ixtisaslaşmış jurnalın nəşri

Tibb Məsələri Heyətinin müdiri çıxışının davamında bu sahə üzrə bir neçə yeni kitabın təqdim olunduğunu bildirərək dedi: Bu gün təqdim edilən əsərlər ötən il ərzində tərtib olunmuş, cari ildə isə tamamlanmışdır. Bu əsərlər, fiqh və sağlamlıq sahəsində çalışan mərkəzimizin tədqiqatçılarının ardıcıl elmi səylərinin nəticəsidir.

O, həmçinin “Fiqh və Sağlamlıq Araşdırmaları” adlı elmi-ixtisaslaşmış fəsilənin ilk sayının nəşrindən xəbər verərək əlavə etdi: Bu jurnalın təsis qərarı altı ay əvvəl təsdiqlənmişdi və bu həftə onun ilk sayı çap olunacaq. Bütün tədqiqatçılara və alimlərə müraciət edərək onları elmi məqalələrini bu jurnalda nəşr etdirmək üçün göndərməyə dəvət edirik.

Tədbirin sonunda Əhli-beyt (ə) Fiqh Mərkəzinin Tibb Məsələri Heyətinin son elmi əsərlərinin təqdimatı keçirildi.
Təqdim olunan kitablar aşağıdakılardır:

“Cinsiyyət dəyişikliyindən sonra ər-arvad münasibətlərinin fiqhi təhlili”,

“Ana südü haqqında fiqhi araşdırma”,

“Dölün salınması (abort) məsələsinin fiqhi təhlili”,

“Psixologiya fiqhinin inkişafı”,

“Sperma və yumurta bankı məsələsinin fiqhi araşdırması”,

“Tibb Məsələrinin inkişaf istiqamətləri”

və “Dölün sağlamlıq hüququna dair fiqhi-hüquqi konfransın məqalə xülasələri” toplusu.